DIOSQA munarqa allinta kausakunanchejta. Payqa munarqa jallpʼantinpi kausakojkuna kamachisqanta kasukunankuta, yuyaychasqasninta japʼikunankuta, pay jina kʼachataj kanankuta. Munallarqataj sonqo tiyasqa tiyakunankuta, kusisqa familiasniyoj kanankuta, mosoj imasta rejsinankuta, jallpʼantintataj uj paraisoman tukuchinankuta.

• “Tukuy kay pachapi chʼajwasta chʼinyachin” (Salmo 46:9).

• Señalasqa tiempopis chayamun ‘jallpʼata pierdechejkunata tukuchinanpaj’ (Apocalipsis 11:18).

• “Mana pipis nenqachu: Onqosqa kani, nispaqa” (Isaías 33:24).

• “Ajllasqasniypis makisninkoj tarpusqanta mikhurikonqanku” (Isaías 65:22).

¿Imaynatá Dios chaykunata juntʼanqa? Diosqa Wawan Jesusta ajllarqa cielomantapacha jallpʼantinta gobernamunanpaj. Biblia nisqanman jina, chay gobiernoqa Diospa Gobiernon sutikun (Daniel 2:44). Jesusmanta parlaspataj nin: ‘Diostaj payta churanqa kamachinanpaj, Gobiernontaj mana tukukonqachu’, nispa (Lucas 1:32, 33).

Jesusqa jallpʼapi kashaspa ashkha milagrosta ruwarqa. Chaywantaj rikucherqa pay gobernashajtin, runasqa allinta kausakunankuta.

• Tukuy laya onqosqastataj sanoyacherqa, ajinamanta rikucherqa tukuy laya onqoykunata chinkachinanta (Mateo 9:35).

• Sinchʼi loco wayrata chʼinyacherqa, ajinamanta rikucherqa chaykunata chʼinyachinanpaj atiyniyoj kasqanta (Marcos 4:36-39).

• May chhika runasta mikhucherqa, ajinamanta rikucherqa tukuy ima necesitasqanchejta qoyta atiwasqanchejta (Marcos 6:41-44).

• Uj casamientopi yakuta vinoman tukucherqa, ajinamanta rikucherqa kusisqa kausakunanchejpaj yanapanawanchejta (Juan 2:7-11).

Dios imastachus nisqanta japʼinapajqa, Biblia nisqanman jina kausakuna. Chaytaj ‘kausayman pusaj ñanta’ riy jina, chayta tarejkunaqa pisilla kanku (Mateo 7:14).

Kausayman pusaj ñanqa, Diospa kamachisqanta kasukuy. Dios nin: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki”, nispa (Isaías 48:17). Chay ñan jinaqa mana waj kanchu.

Jesús nerqa: “Noqa ñan kani, cheqa kajtaj, kausaytaj”, nispa (Juan 14:6). Jesuspa yachachisqanta kasukuspa, pay jinataj ruwaspa astawan Diosman qayllaykusunchej. Ajinamanta aswan allinta kausakusunchej.

¿Imaynatá chay ñanta tarisunman? Ashkha religiones kajtinpis, Jesús nerqa: “Mana tukuy pikunachus  ‘Señor, Señor’ niwajkunachu cielopi kaj Gobiernoman yaykonqanku. Manachayqa, cielopi kashaj Tataypa munayninta ruwajkunalla yaykonqanku”, nispa (Mateo 7:21). Nillarqataj: “Paykunataqa ruwasqasninkunejta allinta rejsinkichej”, nispa (Mateo 7:16). Bibliaqa reparachiwasunman mayqen religiontachus Dios allinpaj qhawasqanta (Juan 17:17).

¿Imatá ruwasunman kausayman pusaj ñanta rinapaj? Pichus kausayta qowanchej chayta rejsina. Yachananchej tiyan pichus kasqanta, imachus sutin kasqanta, imaynachus kasqanta, imatachus ruwashasqanta, imatatajchus ruwananchejta munasqanta. *

Jehová Diosqa munarqa trabajananchejta, mikhunanchejta, kusirikunanchejta, familiayojtaj kananchejta. Astawanpis munallarqataj payta rejsinanchejta, amigosnintaj kananchejta. Payta kasukuspaqa, munakusqanchejta rikuchinchej. Jesús nerqa: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3).

Diosta kusichinapajqa, kausayninchejta cambiananchej tiyan. Ichá wakin kuteqa mana atillasunchu, chaywanpis aswan allinta kausakusun Diospa ñanninpi purispa. Diosmanta astawan yachakuyta munanki chayqa, Internetpi kay www.ps8318.com/qu nisqaman yaykuspa qhelqamuwayku. Jehovaj testigosnintaj, visitasonqanku, maykʼajchus, maypichus munasqaykiman jina.