CANADÁ suyumanta Dan sutiyoj hermanoqa, mayta kallpachakun callespi tiyakoj runaswan parlarinanpaj. Pay willariwanchej imaynatachus chay runasmanta ujninta yanapasqanta. Chay runataj Peter sutikorqa. Dan hermanotaj nin: “Peterqa callepi tiyakoj, millay chʼichipunitaj karqa. Pay jina runataqa nipuni rikorqanichu. Millayta parlaj, tukuy imatataj ruwaj runas payman mana qayllaykunankupaj. Manapunitaj ni pí khuyarikunanta munajchu”, nispa. Jinapis 14 watastapuni Dan hermanoqa, Peterwan kʼacha kananpaj kallpachakorqa.

Uj pacha Peterqa Danta nerqa: “¿Imaraykú noqamanta llakikunkiri? Mana pipis noqamanta llakikunkuchu. ¿Imaraykupunitaj qan llakikushawankiri?”, nispa. Danqa kʼachamanta Peterta parlapayarqa, sonqonman chayananpajtaj kinsa textosta leeriporqa. Ñaupajtaqa tapurerqa Diospa sutinta yachasqantachus manachus, nerqataj Bibliapi Salmo 83:18 versiculota leerinanta. Chantá imaraykuchus Petermanta llakikusqanta sutʼinchananpaj, Romanos 10:13, 14 versiculosta leerinanta nerqa. Chaypi nin: “Pillapis Jehová Diospa sutinta oqharispa mañakojqa, salvasqa kanqa”, nispa. Chantataj Danqa Mateo 9:36 versiculota leeriporqa. Chaypi nin: “Ashkha runasta rikuspataj [Jesusqa] paykunata khuyakorqa, imaraykuchus mitharasqas, tʼaqa tʼaqallataj kasharqanku, mana michejniyoj ovejas jina”, nispa. Chaymantataj Peterta nerqa payñataj chay textota leerinanta. Peterqa chay textota leeytawan caldo ñawilla Danta taporqa: “¿Chay ovejasmanta ujninchu kani?”, nispa.

Peterqa kausayninta cambiarqa. Payqa bañakorqa, manañataj chʼapa barbasniyojchu karqa, Danpa regalasqan ropatataj churakorqa. Chaymantapachataj Peterqa llimphullapuni purerqa, allintataj vistikorqa.

Peterqa, sapa día imachus kausayninpi pasasqanmanta, uj cuadernitopi qhelqaj. Chay cuadernitoj qallariyninpi, llakisqa kasqallanmanta qhelqasqa. Jinapis Danwan parlarisqanmantapacha, imatachus yachakusqanmanta qhelqasqa. Ujninpi ajinata nisqa: “Kay diaqa  Diospa sutinta yachakorqani. Kunanqa Diosmanta mañakuspa, sutinta oqharini. Diospa sutin Jehová kasqanta yachaspa mayta kusikuni. Danqa niwarqa: ‘Jehová amigoyki kanman, mayllapipis ima ratollapis paymanta mañakuwaj, paytaj uyarisonqapuni’”, nispa.

Chay cuadernitoj tukukuyninpitaj Peterqa, hermanosninman qhelqarqa. Pay nerqa:

“Mana walejchu kashani. Ancha machituña kashani. Ichapis kay día wañupusaj, jinapis amigoy [Donwan] Paraisopi tinkusaj. Kayta leenakichejpajqa ichá wañupusajña. Jinapis pʼampakapushawajtiykichej mana rejsisqaykichej runata rikunkichej chayqa, paywan parlariychej. Chantapis kay azul libritota leeriychej. * Kay libritoqa watejmanta amigoywan Paraisopi tinkunayta nin. Ajinapunitaj kanqa. Mayta munakuykichej. Hermanoykichej Peter”.

Peter pʼampakusqanmanta pisi tiemponman, hermanan Ummi nerqa: “Iskay watas ñaupajta hermanoywan parlarqani. Chay kutipipunitaj kusisqa kasharqa, niñataj ñaupajta jinachu”, nispa. Chantá Danta nerqa: “Kay librito hermanoyta yanaparqa chayqa, may sumajpunichá. Kay librota leesajpuni”, nispa. Ummiqa ¿Imatapunitaq Biblia yachachin? librota, uj hermanawan estudiayta qallarerqa.

Chay hermano jina noqanchejpis, ama runaspa rijchʼaynillankuta qhawanachu. Astawanqa tukuyta munakuna, pacienciawantaj yanapana (1 Tim. 2:3, 4). Ajinata ruwasun chayqa, Peterta jina mana allin rijchʼayniyoj runasta yanapasunman, kausayninkuta cambianankupaj. Jehová Diosqa ‘sonqota qhawan’. Chayrayku pikunachus payman qayllaykuyta munajkunata yanapanman Palabranta sonqonkupi japʼikunankupaj (1 Sam. 16:7; Juan 6:44).