1, 2. 1) ¿Imamantataj may agradecesqa kasunman? 2) ¿Imaynataj kay tiempopi kausay? (Patapi kaj dibujota qhawariy).

TUKUYPIS allinta kausakuyta munanchej, ni imamanta llakikuspa. Jehová Diosmantaj may agradecesqa kashanchej, ‘sonqo tiyasqa’ kanapaj yanapawasqanchejmanta. Arí, sonqo tiyasqa kaspaqa, ima problemapi rikukuspapis mana anchata llakikunchejchu (Fili. 4:6, 7). ‘Dioswanpis allinpi’ kanchej, paypa munayninman jina kausakusqanchejrayku (Rom. 5:1).

² Jinapis qhepa pʼunchaykunapi tiyakusqanchejrayku, kausay may llakiy. Runasqa mayta sajrayashanku, chʼajwaspis mayta yapakushan (2 Tim. 3:1-4). Noqanchejtajrí Diabloman churanakunanchej tiyan, llulla yachachiykunasninman ima (2 Cor. 10:4, 5). Mana chayllachu, familianchej ukhupipis chʼajwas kallantaj, wakin familiaresninchej mana Jehová Diosta yupaychasqankurayku. Paykunaqa, Jehová Diosta yupaychasqanchejrayku ichá asikuwasunman manachayri familiata tʼaqanachishasqanchejta niwasunman. Chantapis nillawasunmantaj: “Manaña familiamantachu kanki”, nispa. Ajina llakiykunapi rikukuspa imastachus ruwananchejta yachanapaj, qhepan parrafospi qhawarisunchej.

3, 4. 1) Jesuspa qhepanta rejkuna, ¿imaspitaj rikukunanku kasqa? 2) Pikuna churanakuwajtinchejtaj, ¿Jesuspa qhepanta riyta mana atillasunmanchu?

³ Jesusqa qhepanta rejkunaman runas mayta churanakunankuta yacharqa, tʼaqanakuypis kananta. Jinallataj familia ukhupipis. Chayrayku Jesús yachachisqasninta kallpachananpaj nerqa: “Ama yuyaychejchu kay jallpʼaman allin kausayta apamoj jamusqayta. Mana allin kausaytachu apamoj jamuni, manachayqa tʼaqanachej jamuni. Noqaqa runasta tʼaqanachej jamuni, qharita tatanmanta, warmita mamanmanta, qhachunitataj suegranmanta. Cheqamanta runaj enemigosnenqa kikin wasillanmantataj kanqanku”, nispa (Mat. 10:34-36).

⁴ Chantá, ¿imaraykutaj Jesús nerqa, “ama yuyaychejchu kay jallpʼaman allin kausayta apamoj jamusqayta”, nispa? Imaraykuchus Jesús munarqa runas reparanankuta, qhepanta rejtinku imaspichus rikukunankuta. Jinapis Jesusqa “cheqa kajmanta” willananpaj kay jallpʼaman jamorqa, nitaj familiasta tʼaqanachejchu (Juan 18:37). Jinapis familia ukhupi tʼaqanakuy kanman. Chayrayku Jesusqa yachachisqasninta reparacherqa, wakin kuti qhepanta riy mana atinapaj jinallachu kasqanta. Astawanraj amigosninchej chayri familianchejmanta pillapis churanakuwajtinchej.

5. Jesuspa yachachisqasnin, ¿imaspitaj rikukusqanku?

⁵ Jesús nerqa yachachisqasnin ashkha llakiykunapi rikukunankuta, familiankupis churanakunankuta (Mat. 10:38). Ajinapunitaj karqa, Jesuspa yachachisqasninta runasqa asipayarqanku, familiankumanta kajkunapis churanakorqanku. Jinapis paykunaqa Diospa llajtanpi ashkha tatasta, mamasta, wawasta, hermanosta ima tarerqanku (Marcos 10:29, 30 leey).

6. Familiaresninchej churanakuwajtinchej, ¿pikunatataj astawan munakunanchej kanman?

⁶ Familiaresninchejta munakunallapuni Jehová Diosta sirvisqanchejrayku churanakuwajtinchejpis. Jinapis Jehová Diosta, Jesusta ima astawan munakunanchej tiyan (Mat. 10:37). Diablotajrí familianchejta astawan munakunapaj tanqawasun, ajinamanta Jehová Diosta wasanchananchejpaj. Kunantaj qhawarina imastachus ruwayta atisqanchejta, familiaresninchej churanakuwajtinchej.

7. ¿Imatataj Jehová Dios manapuni ruwananchejta munanchu?

⁷ Bibliaqa nin: “Casarakojkunaqa kausayninkupi astawan llakiyniyoj kanqanku”, nispa (1 Cor. 7:28). Jinapis aswan jatun llakiypi rikukusunman, qosanchej chayri warminchej mana Jehová Diosta yupaychajtin. Ajinapi rikukojtinchejqa, qosanchejmanta chayri warminchejmanta ama separakunachu nitaj divorciakunachu. Imaraykuchus Jehová Diosqa manapuni chayta ruwananchejta munanchu (1 Cor. 7:12-16). Jehová Diosta yupaychaj casarasqa warmisqa, qosankuta respetananku tiyan, qosanku Diosta mana yupaychajtinpis, imaraykuchus “qosaqa warminpa uman”. Ajinallatataj qosaspis warminkuta munakunanku tiyan cuerponkuta jina, warmin Jehová Diosta mana yupaychajtinpis (Efe. 5:22, 23, 28, 29).

8. Qosanchej chayri warminchej wakin imasta mana ruwananchejta niwajtinchej, ¿imasta tapurikusunman?

⁸ Jehová Diosta yupaychaypi warminchej chayri qosanchej ichá mana saqewasunmanchu, wakin imasta ruwajta. Uj hermanamanta parlarina. Qosanqa, Jehová Diosta mana yupaychanchu. Ichá qosanqa hermanata ninman wakin diaslla predicamunanta. Ajinapi noqanchej rikukojtinchejqa, allin kanman kayta tapurikunanchej: “¿Jehová Diosta manaña yupaychanaytachu munashan? ¿Allillanchu kanman niwasqanta ruwanay?”, nispa. Imatapis ruwanapaj allintaraj yuyaycharikusun chayqa, ashkha problemasmanta librakusun (Fili. 4:5).

9. ¿Imaynatataj wawasninchejman yachachisunman qosanchejta chayri warminchejta respetayta?

 ⁹ Qosanchej chayrí warminchej Jehová Diosta mana yupaychajtenqa, wawasman Bibliamanta yachachiy mana atikullanchu. Noqanchejqa wawasninchejman yachachinanchej tiyan, tatamamata kasukunankuta, respetanankutataj (Efe. 6:1-3). Wawasninchejmanqa ruwasqasninchejwan yachachisunman. Jehová Diosta mana yupaychaj qosanchejta chayrí warminchejta respetajtinchej, wawasqa mayta yachakunkuman tatasta repetayta. Chantapis qosanchejman chayri warminchejman allin imasta ruwasqanmanta, sumajta ruwasqanta nina. Nitaj qosanchejta chayri warminchejta wawasninchejpa ñaupaqenpi kʼumuykachachinachu. Astawanqa wawasninchejman sutʼincharina sapa uj ajllanan kasqanta, Diosta yupaychanantachus manachus. Wawasninchej sumajta kausakojtinkoqa, ichapis qosanchej chayri warminchej Jehová Diosmanta yachakuyta munanqa.

10. Uj hermanaj qosan wawasninman Bibliamanta ama yachachinanta nejtin, ¿imata chay hermana ruwanman?

¹⁰ Ichapis mana testigo tata chayri mamaqa, munanman wawasnin fiestasman rinankuta chayri waj iglesiaman rinankuta. Wakin qosastajrí ichapis mana munankumanchu, señoran wawasninman Bibliamanta yachachinanta. Ajinapi rikukuspapis hermanaqa tukuy atisqanta ruwanan tiyan, wawasninman Bibliamanta yachachinanpaj (Hech. 16:1; 2 Tim. 3:14, 15). Ichapis hermanaj qosanqa, mana munanmanchu wawasta tantakuykunaman pusananta. Hermana chayta kasukunan kajtinpis, atisqanman jina wawasninman Jehová Diosmanta, kamachiykunasninmanta ima willarinan tiyan (Hech. 4:19, 20). Jinapis tiemponmanqa, wawaspuni ajllananku  kanqa, Jehová Diosta sirviytachus manachus (Deu. 30:19, 20). *

11. ¿Imaraykutaj wakin familiaresninchej churanakuwasunman?

¹¹ Jehovaj testigosninwan estudiashaspaqa, ichapis familiaresninchejman mana willarerqanchejchu Bibliamanta yachakushasqanchejta. Jinapis Bibliamanta astawan yachakuspa, ichapis repararqanchej paykunaman Bibliamanta willarina kasqanta (Mar. 8:38). Wakin familiaresninchejtaj ichapis mayta phiñakuspa churanakuwasunman, Jehová Diosta sirvisqanchejrayku. Kunantaj yachakusunchej, imaynatachus Diosta kasukuspallapuni, familiaresninchejwan allinta kausakunata.

12. 1) Jehovaj testigon kasqanchejmanta, ¿imatataj wakin familiaresninchej yuyankuman? 2) ¿Imatataj ruwasunman familiaresninchejta entiendenapaj?

¹² Mana testigo familiaresninchejta entiendena. Bibliamanta yachakusqanchejrayku, may kusisqa kanchej. Jinapis wakin familiaresninchejqa yuyankuman Jehovaj testigosnin engañaykuwasqanchejta chayri llulla iglesiaman yaykupusqanchejta. Fiestasninkuman mana risqanchejraykutaj, ichapis yuyankuman paykunata manaña munakusqanchejta. Piensallankumantaj ashkha llakiykuna qhatirinawanchejta. Familiaresninchejta sumajta entiendenapajqa, yachananchej tiyan imaschus llakichisqanta, ajinallamanta yanapariyta atisunchej (Pro. 20:5). Apóstol Pablo jina ruwasunman. Pay nerqa: “Tukuy runaspaj imaynachus kasqankuman jina tukuni, runasta yanapanaypaj”, nispa. Noqanchejpis pay jina ruwasun chayqa, familiaresninchejman Diosmanta willariyta atisunchej (1 Cor. 9:19-23).

13. ¿Imaynatá familiaresninchejwan parlarisunman?

¹³ Kʼacha simiwan parlarina. Bibliaqa nin: “Kʼacha simiwanpuni parlaychej”, nispa (Col. 4:6). Jehová Diospa yanapayninta mañakusunman familiaresninchejwan kʼachamanta, allillanwantaj parlarinapaj. Chantapis familiaresninchejwan ama discutinachu, tukuy imapi creesqan llulla kasqanta nispa. Familiaresninchej ichá imata nispapis sonqonchejta nanachiwasunman chayri contranchejpi imatapis ruwanman. Ajinapi rikukuspaqa apóstoles jina ruwasunman. Apostolesmanta parlaspa, Pablo nerqa: “Runas noqaykupaj sajrata parlajtinkupis, kʼachamanta kutichiyku. Qhatiykachawajtiykutaj pacienciawan aguantakuyku. Runas qhasimanta tumpawajtiyku, allillanwan kutichiyku”, nispa (1 Cor. 4:12, 13).

14. ¿Familianchejta yanapasunmanchu Bibliaj nisqanman jina kausakuspa?

¹⁴ Bibliaj nisqanman jina kausakuna. Kʼachamanta familiaresninchejwan parlarispaqa, familia ukhupi mana chʼajwas kanqachu. Jinapis Bibliaj nisqanman jina kausakusun chayqa, familiaresninchejta yanapasunman Jehovaj testigosninman tukunankupaj (1 Pedro 3:1, 2, 16 leey). Bibliaj nisqanman jina kausakojtinchejqa, familiaresninchej reparanqanku matrimonio ukhupi allinta kausakusqanchejta, wawastapis sumajta uywasqanchejta. Familiaresninchej mana Jehovaj testigosninman tukojtinkupis, Jehová Diosta kusichisunchej.

15. Familiaresninchejwan mana chʼajwanapaj, ¿imastataj ruwasunman?

¹⁵ Ñaupajmantaña yuyaycharikuna. Familiaresninchej imasmantachus chʼajwayta munasqankuta ñaupajmantaña tantearina. Sumajtataj yuyaycharikuna, imaynatachus paykunawan parlarinanchejta (Pro. 12:16, 23). Uj hermanamanta parlarina. Payqa Australia suyumanta, nintaj: “Suegroyqa mana Jehovaj testigosninmanta yachayta munajchu. Qosaywan payta niraj waturikushajtiyku, Jehová Diospa yanapayninta mañakoj kayku, mana jaya simiwan kutichinaykupaj. Chantapis yuyaycharikoj  kayku imasmantachus parlarinaykuta. Pisillatataj parlarej kayku. Ajinamanta mana Bibliaj nisqasninmanta chʼajwanaykupaj”, nispa.

16. Familiaresninchejwan chʼajwaspi rikukojtinchej, ¿imamantataj yuyarikunanchej kanman?

¹⁶ Jehová Diosta mana yupaychaj familiareswanqa, chʼajwas kanqapuni. Chʼajwas kajtenqa ichapis sonqonchej juchachawasunman, noqanchej juchayoj kasqanchejta yuyasqanchejrayku. Sonqonchej juchachawajtinchejqa, yuyarikuna Jehová Diosta kusichina aswan allin kasqanta, familiaresninchejta kusichinamantaqa. Bibliaj nisqanman jina kausakusunchej chayqa, familiaresninchej reparanqanku Bibliaj nisqasninta kasukoyqa, mana pujllakuy jinallachu kasqanta. Chantapis familiaresninchejta ama obliganachu Jehová Diosta yupaychanankupaj. Jinapis paykunaman willarisunman imaynatachus Bibliaj nisqasnin yanapawasqanchejta. Jehová Diosqa munakuwasqanchejrayku munan tukuypis ajllanankuta payta yupaychanankutachus manachus (Isa. 48:17, 18).

17, 18. Familianchejmanta pillapis qharqosqa kajtin, ¿imastataj ruwasunman?

¹⁷ Sonqo pʼakisqa kasunman familianchejmanta pillapis qharqochikojtin, chayri Diospa llajtanmanta llojsipojtin. Ajinapi rikukuspa imatachus ruwananchejta qhawarina.

¹⁸ Diosman astawan qayllaykunapaj kallpachakuna. Diospi atienekunallapajpuni, Bibliata sapa día leena, tantakuypajtaj wakichikuna, amataj tantakuykunamanta faltakunachu. Chantapis Diospa yanapayninta mañakuna, predicamunallapunitaj (Jud. 20, 21). Chaykunata tukuy sonqo ruwanapajtaj kallpachakunallapuni. Ajinamanta llakiyninchej pisiyanqa. Kunantaj qhawarina, 73 Salmota qhelqaj imapichus rikukusqanta. Payqa sajra runaspa ruwasqanta qhawaspa, astawan llakisqa karqa. Chaywanpis Jehová Diosta watejmanta yupaychasqanrayku, llakiyninta atiparqa (Sal. 73:16, 17). Noqanchejpis Jehová Diosta tukuy sonqo yupaychasunchej chayqa, llakiyninchejta atipasunchej.

19. Familianchejmanta pillapis qharqosqa kajtin, ¿imastataj mana ruwanachu kanman?

¹⁹ Jehová Diospa kamachisqanta kasukuna. “Mana mayqen jasutʼiypis chay ratoqa kusikunapaj jinachu, manaqa llakikunapaj jina”. Jinapis chay jasutʼeyqa congregacionpaj allinninpaj, jinallataj juchallikojpajpis (Hebreos 12:11 leey). Jehová Diosqa kamachiwanchej, congregacionmanta qharqosqa kajkunawan mana parlanata (1 Cor. 5:11-13). Familianchejmanta pillapis qharqosqa kajtenqa, mayta sonqonchej nanawasunman. Jinapis Jehová Diosta kasukunapaj, paykunawan amapuni parlanachu telefononejta, celularnejta, cartanejta, mensajenejta chayri Internetnejta.

20. ¿Imatataj mayta suyakushanchej?

²⁰ Qharqosqa kajkuna kutinpunankuta suyakunallapuni. Munakuyniyoj runaqa tukuy imata suyan. Chayrayku noqanchejqa qharqosqa familiaresninchej kutinpunankuta mayta suyakushanchej (1 Cor. 13:7). Qharqosqa familiarninchej pesachikusqanta reparajtinchejqa, Jehová Diosmanta mañakuna llajtanman kutinpunanpaj yanapananta (Isa. 44:22).

21. Jesusta kasukusqanchejrayku familianchejpi tʼaqanakuy kajtin, ¿imatataj ruwasunman?

²¹ Jesús nerqa, familianta astawan munakojqa mana paypata kananpaj jinachu kasqanta. Chantapis Jesusqa yacharqa yachachisqasnin payta kasukunankuta, familiaresninku churanakojtinkupis. Jesusta kasukusqanchejrayku familianchejpi tʼaqanakuy kan chayqa, Jehová Diospa yanapayninta mañakuna, chay llakiykunata atipanapaj (Isa. 41:10, 13). Maytataj kusikunchej Jehová Diosta, Jesustapis kusichisqanchejmanta. Jehová Diostaj payta kasukusqanchejmanta, mayta bendeciwasunchej.