Jehová Diosqa, llampʼu sunqu kaqkunata mayta munakun
Diosman qayllaykuy
Jehová Diosqa, llampʼu sunqu kaqkunata mayta munakun
KAY pachapi may riqsisqa runasqa, jatunchakuq runas kanku. Paykunajina kay, ¿Jehovaman qayllaykunanchikpaq yanapawasunmanchu? Mana, imaraykuchus Diosqa, paypa kamachisnin llampʼu sunqu kanankuta, wakkunawan allinta kawsakunankuta ima munan. Chaytaq kay Números 12 tʼaqapi sutʼita rikukun. Chaypacha israelitasqa, Egiptomanta lluqsisqankumanta pisi tiempoman Sinaí chʼin pampata richkarqanku.
Biblia nisqanmanjina, juk kuti Mariawan Aaronwan sullkʼa hermanonkup contranta, nisunman “Moisespa contranta rimarqanku” (1 pʼiti). Paykunaqa, juk etiope warmiwan casarakusqanta mana allinpaqchu qhawasqankumanta Moiseswan parlanankumantaqa, israelitas chawpipi paypa contranta rimayta qallarirqanku. Biblia nisqanmanjina ichá María Moisespa contranta rimayta qallarirqa. ¿Moisespa warminmantachu María envidiakuchkarqa? ¿Moisespa warminta israelitas astawan jatunpaq qhawanankutachu manchachikuchkarqa?
Ichá; chaywanpis Mariawan Aaronwan nirqanku: “Tata Diosqa mana [Moisesllawanchu] parlan; noqaykuwampis parlallantaj”, nispa (2 pʼiti). Kay pʼiti nisqanmanjina ichá paykunaqa, astawan jatunpaq qhawasqa kayta, astawan atiyniyuq kayta ima munasqankurayku, Moisespa contranta rimarqanku.
Chaywanpis Moisesqa, ni imatá paykunaman nirqachu, pacienciawantaq Dios chayta allinchananta suyakurqa, chayrayku Bibliaqa Moisés chay tiempo runasmanta, “aswan llampʼu sonqoyoj ka[sqanta]” nin (3 pʼiti). * Moisesqa mana piwanpis churanakunanchu karqa, imaraykuchus Jehová chay chʼampayta qhawachkarqa, payllataq chayta allincharqa.
Jehovapaqqa, Moisespa contranta rimachkasqanku, Paypa contrantapis rimachkankumanjina karqa. Imaraykuchus Pay Moisesta akllarqa payniqta israelitasman parlananpaq. Chayrayku, Mariatawan, Aarontawan kʼamichkaspa nirqa: “[Moiseswanqa] uyapura parlani [...]. Sichus paywan uyapura parlayku chayqa, imaraykutaj paypa contranta rimankichejri?”, nispa (8 pʼiti). Ajinata ruwasqankumantataq Jehová paykunapaq maytapuni phiñakurqa.
Chayrayku Mariaqa lepra unquywan rikhurirqa, ichá pay Moisespa contranta rimayta qallarisqanrayku. Chaymanta Aaronqa, Moisesmanta mañakurqa, María sanoyakunanpaq Diosmanta mañapunanta. Arí, María sanoyakunanqa Moisesmanta kachkarqa, pitachus mayta llakichisqanku contranta rimaspa. ¿Imatataq Moisés ruwarqari? María sanoyakunanpaq Jehovamanta mañakurqa. Ajinamanta Moisesqa kʼacha kasqanta, llampʼu sunquyuq kasqanta, pacienciayuq kasqanta ima juktawan rikuchirqa. Ajinamanta Mariaqa sanoyakurqa chaywanpis pʼinqaypi rikukurqa, imaraykuchus Dios nisqanmanjina qanchis pʼunchayta campamentomanta jawaman wikchʼusqa karqa.
Ajinamanta Jehovaqa, llampʼu sunquyuqkunata munakusqanta, jatunchakuqkunatataq chiqnisqanta rikuchirqa. Chayrayku Payman qayllaykuyta munanchik chayqa, envidiakuyta, jatunchakuyta ima qhisachananchik tiyan. Jehová llampʼu sunquyuqkunata munakusqanta yuyarinallapuni, imaraykuchus pay nirqa: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku”, nispa (Salmo 37:11; Santiago 4:6).
[Sutʼinchaynin]
^ párr. 4 Llampʼu sunqu runaqa, mana wakkunawan mandachikuqllachu, manaqa saqra kaqta ruwaptinku mana pagachikuyta maskʼanchu, astawanqa pacienciawan Diospi suyakun.