1. ¿Imanotaj ricashwan Jehová paywan parlanapaj camacächishganpita?

 JEHOVATA mañacuptinchega cay Pachata y cielutapis Camacojninchiwanmi parlaycanchi, ¡chayga alapa alimi! Cayga ninanmi imay hora captinpis, ima idiumata parlarpis, shongunchicho ima caycashganta Jehovata wilapayta puedinchi. Aumi, hospitalcho jitarashga caycarpis o carcelcho wichgarashga caycarpis, Jehovata mañacuptinchega payga wiyamanchimi. Chaymi Jehovata agradecicuyculanchi paywan parlanapaj camacächishganpita.

2. ¿Imata rurartaj rey Davidga musyachicurgan Jehovata mañacushganga ali cashganta?

² Rey Davidga imaypis cushicoj cada cadala Jehovata mañacushganpita. Chaymi juc canciuncho Payta nergan: “Mañacamushäga gam cajman chayamuchun insinsuno” (Sal. 141:1, 2). David cawashgan wichanga sacerdoticuna shumaj rurapäcoj sagrado inciensuta Jehovata adurapäcunanpaj (Éx. 30:34, 35). Chaymi inciensupita David parlaptenga, payga niycargan shumaj yarpachacunanpaj imacunapita Jehovata mañacunanpaj. Noganchipis chayta munanchi, chaynopa ima mañacushganchicunawan Jehovata cushichinapaj.

3. ¿Imanotaj Jehovata mañacushwan, y imanir?

³ Jehovata mañacuptinchega alapa respetuwanmi rurashwan, manami pitapis parlapashganchino canmanchu. Yarparcushun Isaías, Ezequiel, Daniel y Juan ricashgan visiuncunaman. Paycunaga Jehovapita parlapäcuptenga nin alapa Munayniyoj y fiyupa respetashga Rey cashganta. Isaiasga visiuncho  ricargan Jehová “fiyupa cuyayllapaj jamacunacho syëlucho jamaraycajta” (Is. 6:1-3). Ezequielnami ricashga carruniraj janancho Jehová jamaraycämojta y “intëru lädunpana [...] turmanya shanshaypa shanshar achicyacurcushannöraj” achicyaycargan (Ezeq. 1:26-28). Danielpis ricargan “imaypis kawaq Awkin” yuraj ropawan vistishga cashganta, y jamarashgan tronupita nina yargaycämojta (Dan. 7:9, 10). Y Juannami ricashga Jehová jamarashgan tronupa laduncunacho “esmeralda ruminöraj achic-achicyaycaj turmanya” cashganta (Apoc. 4:2-4). Jehová imano cashganga yarpächimanchi paywan parlaptinchega imawanpis mana tincushganta, chaymi imaypis alapa respetuwan rurashwan. Pero, ¿imacunapitataj Jehovata mañacushwan?

4. ¿Imatataj yachacunchi Jesús imano mañacunapaj nishganpita? (Mateo 6:9, 10).

⁴ (Leiriy Mateo 6:9, 10). Sermón del Monte nishgancho, Jesús discipuluncunata yachachicurgan Dios munashganno imano mañacunapaj. “Cayno mañacunqui” niptinna, Jesusga nergan Jehovapa voluntänin ruracänanpaj puntata mañacunapaj. Chayga caycan: jutin respetashga cananpaj; Gobiernun shamunanpaj, chaynopa Diospa chiquejnincunata ushacächinanpaj; y cay Pachapaj y runacunapaj bendiciuncunatapis apamunanpaj cajta. Noganchipis chaycunata mañacuptinchega, Jehovapa voluntänin noganchipaj alapa ali cashganta musyachicuycanchi.

5. ¿Imanirtaj ninchi quiquinchipaj mañacuptinchipis ali cashganta?

⁵ Nircur Jesusga nergan quiquinchipäpis mañacuptinchega ali cashganta. Chayga caycan Jehová micuyninchita gomänanchipaj, juchanchicunata perdunamänanchipaj, tentaciuncunapita y Satanaspitapis chapamänanchipaj (Mat. 6:11-13). Caycunata Jehovata mañacuptinchega, musyachicuycanchi Jehovaman yäracuycashganchita y paypa ricaynincho ali canapaj munashganchitapis.

6. ¿Jesús yachachishganta umachicurlachuraj imaypis cutin cutin mañacushwan?

⁶ Jesusga discipuluncunata manami nirganchu imano mañacunanpaj yachachishganta, umachicur chaylata cutin cutin rimananpaj. Sinoga quiquin Jesuspis öraga ima  yarpachacächishgancunapita Jehovata mañacurgan (Mat. 26:39, 42; Juan 17:1-26). Noganchipis imata yarpachacächimanchi chaypita mañacushwan. Öraga imalatapis ali cajta acranapaj Jehovata mañacushun yachayta gomänanchipaj shumaj tantiarcunapaj (Sal. 119:33, 34). Jina ima cargutapis chasquiptinchi cumplinapaj sasa captenga Jehovata mañacushun tantiacoj y yarpaysapa canapaj (Prov. 2:6). Tayta cajcunaga wamrancunapaj mañacunmanmi, y wamracunana taytancunapaj. Y mana chaylachu, lapanchimi estudiantinchicunapaj y marca masinchicunapäpis mañacushwanmi Bibliapita parlapänapaj. Ichanga shumajraj yarpachacunanchi yanapamänanchilapaj mana mañacunapaj.

7. ¿Imanirtaj mañacuyninchicho Jehovata alabashwan?

⁷ Jina mañacuptinchega ama gongashunchu Jehovata alabanapaj. Payga merecinmi pipitapis más alabashga cananpaj. Salmuta escribej runaga Jehovata nergan: “Canqui allimi, imapitapis perdunajmi”. Caytapis nergan: “Canqui alli shongumi, cuyapäcojmi, pasinsacojmi, cuyacojmi, rasun cajta rurajmi” (Sal. 86:5, 15). Aumi, imaycacuna caycan Jehová imano cashganpita y rurashganpitapis alabanapaj.

8. ¿Imacunapitataj mañacuyninchicho Jehovata ‘gracias’ nishwan? (Salmo 104:12-15, 24).

⁸ Jehovataga manami alabashwanlachu, sinoga cutin cutin ‘gracias’ nishwan lapan gomashganchicunapita. Payga camashga tucuy coloryoj waytacunata, tucuy frutacunata, micuycunatapis; jina ali amigucunatapis gomanchi. Cuyacoj Taytalanchi Jehovaga cushishga cawanapaj munan, chaymi chay lapancunata gomashcanchi (leiriy Salmo 104:12-15, 24). Chaypitapis masga Jehovata alapa agradecicunchi imayca yachachicuycuna caycashganta yäracuyninchi ali cananpaj, y shamoj tiempucho imaycamapis cawanapaj camacächishganpita.

9. ¿Imatataj rurashwan Jehovata agradecicunapaj mana gongaycunapaj? (1 Tesalonicenses 5:17, 18).

⁹ Öraga facilmi canman gongaycunapaj Jehová noganchiraycur rurashgancunapita agradecicunapaj. Chauraga chayno mana cananpäga, alichi canman escribinapaj imacunatataj Jehovata mañacushcanchi, y altanto  caycashwan imano Jehová chaycunata contestamashcanchi. Chaypita oraciunninchicho Jehovata ‘gracias’ nishwan yanapämashganchipita (leiriy 1 Tesalonicenses 5:17, 18). ¿Manachu pipis ‘gracias’ nimaptinchega cushicunchi? Chaynolami Jehovapis cushicun mañacushganchicunapita contestamushganta ‘gracias’ niptinchi (Col. 3:15). Cay lapancunapita Jehovata agradecicurpis caycanrämi imapita más payta ‘gracias’ ninapaj. Mä ricärishun.

10. ¿Imanirtaj Jehovata agradecicushwan Jesusta cay Pachaman cachamushganpita? (1 Pedro 2:21).

¹⁰ (Leiriy 1 Pedro 2:21). Jehovata agradecicushwan cuyashga Wamranta cachamushganpita yachachimänanchipaj. Jesús imano cashganpita y rurashgancunapita yachacurmi, yanapämäshun Jehovata reguinapaj y pay munashganno cawanapaj. Jesuspa wanuyninman yäracuptinchega Jehovapa ricaynincho ali caycäshun y amigunmanpis ticrashun (Rom. 5:1).

11. ¿Imanirtaj Jesuspa jutincho mañacunchi?

¹¹ Jina Jehovata agradecicunchi Wamranpa jutincho mañacunapaj camacächishganpita. Payga Jesuswanmi mañacamushganchicunata contestamanchi. Chaymi Jesuspa jutincho mañacuptinchi Jehová wiyamanchi y contestamanchimi. Jesús cayno nergan: “Nogapa jutëcho Taytäta mañacushayquitaga nogami camacächishaj. Chaynöpami noga-raycu Tayta Dios rispitasha canga” (Juan 14:13, 14).

12. ¿Imanir mastaj Jehovata agradecicushwan Wamranta cachamushganpita?

¹² Jehovaga juchanchicunata perdunamanchi Wamran yawarninta jichashganraycur, chaymi Bibliaga nin Jesusga mandaj sacerdotinchi cashganta, y “Tayta Diospa derëchu caj-lädunman” jamaraycashganta (Heb. 8:1). Chaypitapis nin “juchaynaj abogädunchi caycan Tayta Diospa ñaupancho faburninchi ichinanpaj. Payga Jesucristumi” (1 Juan 2:1). Jehovatami alapa agradecicuyculanchi Sumo Sacerdotinchi cuyapämaptinchi, alpapita cashganchita musyaptin y noganchipaj ruwacuycar caycaptin (Rom. 8:34; Heb. 4:15). Jehovata mañacunapaj mana camacanmanchu cargan Jesús noganchiraycur mana wanuptenga. May cuti Jehovata mañacuptinchipis palabranchicunaga manami aypanchu cuyashga Wamranta cachamushganpita agradecicunapaj.

13. ¿Imataj Jesús rurashga discipuluncunata cuyashpan?

¹³ Jesús wanunanpaj chacaycho, payga may hora mañacurgan discipuluncunapaj, y Jehovata ruwacurgan Satanaspita chapananpaj (Juan 17:15). ¡Jesús discipuluncunataga cuyajmi! Chaymi ichiclacho wanunanpaj cashganta musyarpis quiquilanman yarpachacunanpaj trucan discipuluncunapa yarpachacurgan.

14. ¿Imata rurartaj hermanunchicunata cuyashganchita musyachicunchi?

¹⁴ Jesús rurashganno noganchipis manami quiquilanchilapaj mañacunchichu, chaypa trucanga cada cadalami hermanunchicunapäpis mañacunchi. Chayta rurar jucninchi jucninchi cuyanacunapaj Jesús mandacushganchita cäsucuycanchi, jina Jehovata musyachicunchi hermanunchicunata alapa cuyashganchita (Juan 13:34). Musyanchimi yäracoj masinchicunapaj mañacuptinchega yangalapaj mana cashganta. Bibliaga nin “Tayta Dios munashanno goyaj runa mañacushantaga Tayta Dios wiyanmi” (Sant. 5:16).

15. ¿Imanirtaj hermanunchicunapaj mañacushwan?

 ¹⁵ Hermanunchicunaga imayca sasacunapa pasan, chaymi paycunapaj mañacunanchi. Oraciunninchicho Jehovata ruwacushwan calpalanwan paycunata yanaparcunanpaj, tucuy gueshyacunata, ima desgraciacunata, guerracunata o chiquishga cashgantapis aguantananpaj. Jina labores de socorro nishgancho yanapacoj hermanunchicunapäpis mañacushwanmi. Y mayganlatapis reguirga alimi canga paypaj jutinpa mañacuptinchi. Hermanunchicunata Jehová yanaparcunanpaj mañacuptinchega musyachicunchi shongupita paycunata cuyashganchita.

16. ¿Imanirtaj congregaciuncunata ricaj hermanucunapaj mañacushwan?

¹⁶ Congregaciuncunata ricaj hermanunchicunaga agradecicärinmi paycunapaj mañacuptinchi, oraciunninchicunaga paycunata yanapanmi. Y chaynomi apóstol Pablo ricacushga. Cayno nergan: “Nogapäpis Tayta Diosta mañacuy willacuyninta willacur mana manchacuypa pitapis willapänäpaj. Nogaga pï-maytapis willapaycä Tayta Diosninchi salbashantami” (Efes. 6:19). Canan wichanpis hermanunchicunaga calpachacärinmi ali pushamänanchipaj. Chauraga paycunapaj Jehovata mañacuptinchega cuyashganchita musyachicuycanchi.

17, 18. ¿Öraga imacuna captintaj waquincunapa naupancho mañacunapaj pipis nimashwan, y imataj cuentaman churashwan?

¹⁷ Capazchi öraga waquincunapa naupancho mañacunapaj pipis nimäshunmi. Tantiarinapaj, capazchi estudiuta gocoj panilanchega yanagaj panita ninman mañacunanpaj. Chauraga estudiantita shumaj mana reguishpan yanagaj paninchega capaz ninman estudio ushariptin mañacunanpaj. Chaynopa musyangapaj mañacuynincho imataj chay estudiantipaj mañacunanpaj.

¹⁸ Y juc wauguita niptin predicanapaj reuniuncho o congregaciuncho mañacunanpäga chay waugui shumaj yarpachacunman imata ninanpaj mañacushgancho. Waquincunapa naupancho mañacojcunaga congregaciuncho caycajcunata manami concejanmanchu ni ima wilacuytapis wilacärinmanchu. Reuniuncunacho canciunta cantanapaj y oraciunta  rurananpäga pichga minutucunala cananpaj caycan. Chauraga oraciunta ruraj wauguiga yaparir yaparir mayraj mañacunmanchu, masraj reunión galaycunanpaj caycaptin (Mat. 6:7).

19. ¿Imataj yanapämäshun camaricushgala caycänapaj Jehovapa juicio junaj chayamuptin?

¹⁹ Cay mundupa ushacaynin jananchichona caycaptenga masraj Jehovata cutin cutin mañacushwan. Caypita parlarmi Jesusga nergan: “Mayaj-mayaj camaricushalla carcaycay. Imay örapis Tayta Diosta mañacuycay ‘Gueshpinäpaj yanapaycallämay’ nir” (Luc. 21:36). Chauraga mana yamacaypa mañacuptinchega espiritual cajcho riccha ricchala caycäshun, y Jehovapa juicio junaj chayamuptenga camaricushgala caycäshun.

20. ¿Imatataj rurashwan oraciunninchicuna ali mushcoj inciensuno cananpaj?

²⁰ ¿Imatataj cay yachachicuycho yachacushcanchi? Cananga ricashcanchi Jehovata mañacunapaj alapa cushicuypaj cashganta. Chaymi mañacuyninchicho imaypis puntata Jehovapa voluntänin ruracänanpaj mañacushun. Nircur Wamranta cachamushganpita y Gobienunpitapis agradecicunchi, y hermanunchicunapäpis mañacunchimi. Chaypitapis yäracuyninchi ali cananpaj, y necesitashganchicunatapis tarichimänanchipaj mañacushwanmi. Pero cay lapanchoga puntataga shumaj yarpachacunanchi oraciunninchicho imata ninapaj. Chaynopa valuraycäshun Jehová paywan parlanapaj camacächishganpita. Chayno rurarga oraciunninchicuna ali mushcoj inciensuno Jehovapaj canga y cushishga chasquenga (Prov. 15:8).