Diospa espíritu santunpa parlarga, Diospa poderninpita o calpanpita parlaycanchi (Miqueas 3:8; Lucas 1:35). Diosga espíritu santunta utilizan munayninta rurananpaj, y poderninwanmi imatapis camacächin cumplicänanpaj (Salmo 104:30; 139:7).

Hebreo rimaycho “espiritupita” Biblia parlaptinga nin rúaj y griego rimaychona nin pnéuma. Caycunaga parlaycan imano Dios calpanta utilizan imatapis rurananpaj (Génesis 1:2). Nircur caycunawanpis igualachin:

• Jämay o caway (Salmo 104:29; Apocalipsis 13:15).

• Wayra (Génesis 8:1; Juan 3:8).

• Lapan cawaycajcuna (Job 34:14, 15).

• Runacuna imano cashgan (Números 14:24).

• Dios y angelcunapis (1 Reyes 22:21; Juan 4:24).

Wayrata, jämayta o runacunata cawachicoj calpata mana ricaycarpis, musyanchi chaycuna rasunpa caycangantami. Tantiarinapaj, wayrata mana ricarpis, cuentata gocunchi imatapis cuyuchinganta, shucucunganta y maspis. Diospa espiritunga chaynomi (Diccionario expositivo de palabras del Antiguo y del Nuevo Testamento exhaustivo, de William E. Vine).

Bibliachoga Diospa poderninta igualachin maquinwan o dedunwan (Salmo 8:3; 19:1; Lucas 11:20; y Mateo 12:28 textutapis ricäriy). Imanomi juc runa calpanwan mancata ruran mitupita, chaynomi Diospis poderninta utilizargan caycunata rurananpaj:

• Pachata y Cielutapis (Salmo 33:6; Isaías 66:1, 2).

• Bibliata escribichinanpaj (2 Pedro 1:20, 21).

• Unay caj sirvejnincuna milagrucunata rurapäcunanpaj y yachachipäcunanpaj (Lucas 4:18; Hechos 1:8; 1 Corintios 12:4-11).

• Casucoj canapaj y pay munashganno cawanapaj (Gálatas 5:22, 23).

Diospa espíritu santunga manami juc runachu

Bibliaga nin espíritu santuga Diospa poderninmi, manami juc runachu (Éxodo 15:8, 10). Pipis mitupita mancata rurananpäga, calpanwan y waquinwan ruran, quiquilanga manami ruracanchu. Chaynolami Diospis espíritu santunta utilizaptinrämi imatapis camacächin (Lucas 11:13). Nircur Bibliaga nin espíritu santo yacu japuyno y Diospita yachacushganchiwan y yaracuyninchiwanpis tincuchin. Caycunapis claro tantiachimanchi espíritu santuga manami juc runachu (Isaías 44:3; Hechos 6:5; 2 Corintios 6:6).

Bibliacho wilamanchi Diospa jutin Jehová y wamranpa jutin Jesús cashganta, pero manami wilacunchu espíritu santupa jutinta (Isaías 42:8; Lucas 1:31). Juc cuticho Jesuspa gatejnin Esteban visiunta ricärishgancho, manami ricarganchu quimsa runacunata, sinoga ishcay runacunatami. Bibliaga nin: “Estebannami Espíritu Santupa munaynincho car janajpa ricärishancho ricaran Tayta Dios munayniyoj car achicyaypa achicyaycämojta, Jesuspis derëchu caj-läduncho caycämojta” (Hechos 7:55, Tayta Diosninchi Isquirbichishan). Diosga poderninwanmi Estebanta cay visiunta ricärachirgan.

¿Imataj nipäcun runacuna? Espíritu santuga juc runami, y quimsancuna Dios caycan.

Biblia yachachicun: Waquin Bibliacuna 1 Juan 5:7 textucho cayno nin: ‘Jana patsacho kaykan kimsa testïgukunami. Tsay testïgukuna kaykan Tayta Dios, Tsurin Jesucristo y Espíritu Santumi. Paykunaqa kimsaq karpis juklaylami kaykan’. Waquin yachaj runacuna nipäcun apóstol Juan chayta mana escribishgachu, chaymi cayga Bibliacho mana yurinmanchu. Tantiarinapaj, Bibliata estudiaj Bruce M. Metzger runa nirgan: “Chay palabracunaga luta yachachicuymi caycan, [...] y manami yurinmanchu Mushoj testamentucho” (Un comentario textual al nuevo testamento griego).

¿Imataj nipäcun runacuna? Biblia nin espíritu santo runa niraj canganta.

Biblia yachachicun: Bibliacho espíritu santupita parlaptinga, öraga juc runa nirajtawan tincuchin, pero cayga manami niycanchu rasunpa runano canganta. Juchapita, wanuypita y yachaj caypitapis chaynomi wilacun (Proverbios 1:20; Romanos 5:17, 21). Tantiarinapaj, Bibliaga nin: “Juchapa munaynincho car quiquëpa caycaptinpis mastaraj munashcä” (Romanos 7:8, 11; Mateo 11:19; Lucas 7:35).

Juan librucho Jesús nirgan espíritu santuta cachamunanpaj discipuluncunata yanapänanpaj. Pay nirgan “Espíritu Santu shamurnami runakunata tantiyatsinqa” Diospa ali wilacuynincunata Tayta Dios munashganno cawapäcunanpaj. Cayta leishpan waquincuna tantiarcun espíritu santo runa niraj canganta (Juan 16:7-15). ¿Chayga rasunpachuraj? Manami. Yanapacoj espíritu santuta cachamushaj Jesús niptinga, manami niycarganchu juc runata cachamunanpaj. Sinoga niycargan, cielupa aywacurmi chaypita poderninwan y calpanwan discipuluncunata yanapänanpaj Diospa ali wilacuynincunata tantiacärinanpaj (Juan 14:16, 17).

¿Imataj nipäcun runacuna? Pipis espíritu santupa jutincho bautizacuptinga, chaurasga juc runami caycan.

Biblia yachachicun: Bibliacho niptin jucpa jutincho rurashganta, niycanmi chasquishgan permisuwan o autoridäwan chayta rurashganta (Deuteronomio 18:5, 19-22; Ester 8:10). Tantiarinapaj, waquincuna öraga leypa jutincho awnicun carguncunata cumplinanpaj, chayga manami ninanchu leyga juc runa cashganta. Chaynolami, pipis espíritu santupa jutincho bautizacuptinga, tantiashgami Diospa podernin cashganta munayninta cumplicänanpaj (Mateo 28:19).

¿Imataj nipäcun runacuna? Jesuspa unay discipuluncunaga, creipäcushga espíritu santo juc runa cashganta.

Biblia yachachicun: Waquin librucuna ni Bibliapis chayta yachachinchu. Encyclopædia Britannica nishgan libro cayno wilacun: “Jesús wanushganpita 348 watacunano pasashganpitaraj runacuna creipäcurgan espíritu santo juc runa cashganta, chay creencia camacächirgan Concilio de Constantinopla rurashganchomi”. Cayga pasargan ishcay pachac watacuna pasarcuptinraj Jesuspa último apóstol wanushganpita.