Juk kutish, Canadä nacionpa Alberta niyanqan markanchö Bob jutiyoq nuna cärrunwan wayinman kutikänaq. Tsë junaqqa vienturshi allipa rashtanaq y rapinaq, tsëshi wayinman ras o sas chänampaq cärrunwan allipa ras ëwanaq, y manash cuentata qokunaqtsu qepa kaq llantan pashtashqa kanqanta.

Tsënö këkaptin pitsqaq testïgu jövinkuna imanö yanapayanqanta willakur y agradecikurshi markanchö Jehoväpa testïgunkunaman cartakunaq. Tsë cartachöshi ninaq cärrumpa qepan kaq llantan pashtaskiptin, pitsqaq jövinkuna cärrunkunawan taripärir tsëta willayanqanta. Y carretëra kuchunchö pärëkurshi tsë jövinkunaqa, pasëpa alalëchö pashtashqa llantanta imëkanöpa cambiapuyänaq. Tsënash tsë nunaqa kënö ninaq: “Noqaqa manam purita puëdïtsu. Tsëmi sïlla de ruëdallachö jamaräkunqäyaq, tsë shumaq vistishqa jövinkunaqa tsëläya alalar rashtëkaptimpis yanapayämarqan. Pëkuna mana yanapayämaptinqa, ¡imanöraq kalläman karqan!”.

Tsëpitanash tsë nunaqa cartanchö ninaq, tsë alli vistishqa jövin Testïgukuna alli hörachö yanapayanqampita, ¡allipa agradecikunqanta! Y pëkunapaqshi kënö ninaq: “Tsë jövinkunaqa yachatsikurmi purikäyänaq, ¡pëkunaqa rasumpam yachatsikuyanqannö rurayan!”. Tsë nunaqa manash ni ichikllapis yarpashqatsu kanaq pillapis tsënö yanapëkuyänampaq kaqta.