PÏNIMPIS WANUKUPTIN LLAKIKOQKUNAPAQ CONSUËLU

Wanupakushqakunapaq alli consëjukuna

KICHË

WANUPAKUSHQAKUNA IMATA RURAYÄNAMPAQMI YACHAQ NUNAKUNAQA IMËKA CONSËJUKUNATA JIPIYÄMUSHQA. Peru pëkuna Bibliachö consëjukuna ninqantanöllam niyan. Tsëmi rikätsikun, Bibliapa consëjunkunawanqa imapis mana igualanqanta. Kanan witsampis, alläpam yanapakun y confiakuypaqmi. Y manam tsëllatsu, wanupakushqakunata imanö yanapanampaqmi mëtsika consëjukuna kan.

¿Imanötan musyantsik wanushqa familiantsik y amïguntsik mana sufrikäyanqanta?

Eclesiastes 9:5 textuchömi wanushqakunapaq kënö nin: “Manam ni imatapis musyayannatsu”. Tsë junaqmi llapan pensayanqankuna ushakärin (Salmus 146:4). Tsëmi Bibliachöqa wanuyta mana mäkushpa punuytawan igualatsin (Juan 11:11).
Dios kuyakoq kanqanman confiakunqantsikmi yanapamantsik.

Bibliachöqa kënömi nin: “Alli ruraqkunataqa Teyta Jehovämi a imëpis rikarëkan, rogakur mañakuyaptinqa yanapanampaqmi imëpis wiyan” (Salmus 34:15). Diosman mañakunqantsikqa, manam imata pensanqantsikta o sientinqantsikta willanallapaqtsu yanapamantsik, sinöqa Diosnintsikwan mas alli amïgu kanapaqmi yanapamantsik. Pëqa kamamaqnintsik karmi poderninwan yanapamënintsikta puëdin.
Shamoq tiempuchö mana wanurna kawanapaqmi Dios änimantsik.

Bibliachöqa mëtsika kutim wanushqakuna kawariyämunampaq kaqta willakun. Këllaman pensari: shamoq tiempuchö Shumaq Patsächö alli kawakunapaq kaqtam kënö nin: “Nawinkunapitam llapan weqita limpianqa, y nunakunaqa manam wanuyanqanatsu o wañuyanqanatsu, llakikuyanqanatsu, waqayanqanatsu ni nanatsikuyanqanatsu” (Apocalipsis 21:3, 4). ¡Imanö shumaqraq kanqa!

Wanushqakunata Jehovä kawaritsimunampaq kaqman confiakurmi, wanupakushqa këkarpis mëtsikaq nunakuna alläpaqa llakikuyannatsu. Tsëmi pasarqan Ann jutiyoq warmiwan, pëqa 65 watapa casäda këkäyaptinmi, qowan o runan wanurirqan, kënömi nin: “Bibliachöqa nin, kuyashqa familiantsik o amïguntsik mana sufrikäyanqantam y Jehoväpa yarpëninchö këkaqkuna yapë kawariyämunampaq kaqtam. Tsëman pensanqämi qowäta alläpa mana llakinäpaq yanapaman”.

Puntachö parlanqantsik Tïna jutiyoq warmim kënö nin: “Qowä wanunqampita, alläpa llakikunqä höram Jehovä poderninwan shoqamanqanta rikashqä kä. Y wanushqakuna yapë kawariyämunampaq kaqman següru kanqämi qowä Timuta shuyänäpaq y kallpachakur sïguinäpaq yanapaman”.

Kë warmikuna imanö sientikuyanqanqa mëtsika millon nunakunata Biblia yanapashqa kanqantam rikätsikun. Y qamqa, ¿Bibliachö ninqankunaman confiakunkiku? Mana tsënö kaptinqa, allichi kanman, Bibliachö consëjukunata y änikunqan pruëbakunata alli estudianqëki. Tsëta rurarninqa, imëka alli consëjukunatam tarinki y wanupakushqa karpis alläpaqa manam llakikunkinatsu.