• Dios akranampaq kaqta. Bibliachömi nin: “Äkrashqä nunatam churarqü rey kananpaq [...], llapan nacionkunatapis herenciëki kanampaqmi qoykushqëki. Kë patsatapis qampaq kananpaqmi juk kuchupita juk kaq kuchunyaq qoykushqëki” (Salmus 2:6, 8).

• Rey Davidpa trönunta chaskinampaq kaqta. Bibliachömi nin: “Teyta Dios tsënö salvamäshun juk wamra yuriptinmi [...]. Rey David tärashqan trönuman tëkurmi imëyaqpis mandamäshun munëninchö karmi imëpis alli kawashun” (Isaïas 9:6, 7).

• Belenchö yurinampaq kaqta. Bibliachömi nin: “Belën Efrata marka [...], qamchömi israel nunakunapa reynin yurikunqa [...], mëtsëchöpis nunakuna pëta adorayaptinmi israel nunakuna pitapis mana mantsakushpa yamëna kawakuyanqa” (Miquëas 5:2, 4).

• Chikirnin wanutsiyänampaq kaqta. Bibliachömi kënö nin:“Pëtaqa nunakuna mana kaqpaq churarmi chaskiyarqantsu [...], noqantsik mana cäsukoq kashqantsikpitam tuksishqa karqan. Noqantsik jutsata rurashqantsikpitam wanutsishqa karqan” (Isaïas 53:3, 5).

• Kawariramurnin ciëluta kutinampaq kaqta. Bibliachömi nin: “Manam sepultürachöqa jaqiramankitsu, ni manam permitinkitsu shonqupita patsë sirwishoqniki ismur ushakänantaqa [...]. Y rikënikichöqa y lädïkichöqa alläpa kushishqam sientikü” (Salmus 16:10, 11, TNM).

Jesucristullachömi, kë llapan willakïkuna cumplikan. Jesuspaq parlarmi Marïata juk angel kënö nirqan: “Jehovä Diosmi, teytan Davidpa gobernar täkunanta pëta qonqa [...]. Gobiernunqa manam ni imëpis ushakanqatsu” (Lücas 1:31-33).

Jesus Patsachö kanqan witsanqa, manaran gobernarqanraqtsu. Peru kananqa ciëlupitam llapan nunakunata gobernamunqa. Patsachö kawanqan witsan llapan ruranqankunam rikätsikun alli gobernaq kanqanta. ¿Imakunatataq rurarqan?

•   Nunakunapaqmi yarpachakoq. Jesusqa llapan nunakunatam yanapaq, waktsatapis kapoqyoqtapis y më markapita kayaptimpis llapantam igualpa rikaq (Mateu 9:36; Marcus 10:16). Lepra qeshyawan këkaq nuna, “Qam munarninqa kachakäratsimankimanmi” niptinmi llakiparnin Jesusqa jampirqan (Marcus 1:40-42).

• Dios munanqannö kawanapaqmi yachatsikurqan. Tsëmi nirqan: “Manam pipis ishkë patronpa sirweqnin këtaqa puëdintsu”. Y nirqanmi, “imanömi nunakuna tratayäshunëkita munayanki, tsënölla qamkunapis pëkunata tratayë”. Y yachatsimarquntsikmi, Diosta sirwinapaqqa ruranqantsiklla mana yanapakunqanta, tsëpa rantinqa imata pensanqantsik y ima rëkur ruranqantsikkunapis. Tsëmi Diosnintsik munanqannö sirwinapaqqa, shonquntsikchö mana allikunata pensanantsiktsu (Mateu 5:28; 6:24; 7:12). Y këtapis nirqanmi: “¡Kushishqaqa kayan Diospa palabranta wiyaqkuna y cäsukoqkunam!” (Lücas 11:28).

• Kuyakoq këtam yachatsikurqan. Parlanqankunawan y ruranqankunawanmi Jesusqa nunakunata yanaparqan, tsëmi Bibliachö kënö nin: “Imanö yachatsikunqampita tsëchö këkaq mëtsika nunakuna alläpa espantakuyarqan” (Mateu 7:28, 29). Tsëmi nunakunata nirqan: “Chikiyäshoqnikikunata kuyarnin sïguiyë”. Y wanutseqnin nunakunapaqmi kënö mañakurqan: “Perdonëki Teyta, [...] manam musyayantsu imata rurëkäyanqanta” (Mateu 5:44; Lücas 23:34).

Jesucristullam alli gobernaqqa. Pëqa kuyakoqmi y yanapamënintsiktam munan, y musyanmi nunakunata imanö gobernanampaq kaqtapis. Peru Patsataqa, ¿imëraq gobernamunqa?