Desgraciakunaqa chipyëpam ushakärinqa

¿IMA ninkimanraq ichikllachöna llapan desgraciakuna ushakärinampaq kaqta pipis nirishuptiki? “Tsëqa manachi rasumpaqa këkunmantsu, kawë vïdachöqa desgraciakuna imëpis kashqam” ninkimanchi. O upatanöpis ulipëkäyäshunqëkita o llullapaykäyäshungaykitachi pensankiman.

Desgraciakuna ushakänan mana creipaqnö kaptimpis, puëdentsikmi tsënö kanampaq kaqman markäkïta o yärakuyta. Pero musyëmi, tsëtaqa manam nunakunatsu ushakätsimunqa. Nunakunaqa manam shumaqllaqa entiendeyantsu imanöpa tukï desgraciakuna kanqanta, y päratsita o atajëtanäqa manam ni imanöpa puëdeyantsu. Alli yachaq kanqampita y tukï rikanqankunata estudianqampita reqishqa unë tiempo Israelpa reynin Salomonmi kënö qellqarqan: “Nunakunaqa manam puëdeyantsu kë patsachö imëka rurashqakunata alli reqitaqa, tsërëkur alli y sinchi trabajarpis manam musyayantsu. Alli musyaq kayanqanta nirpis manam musyëta puëdeyantsu” (Eclesiastés 8:17).

Imëka desgraciakunata nunakuna ushakätsita mana puëdekäyaptinqa, ¿pitaq ushakätsinqa? Kamakoq Yayantsik ushakätsinampaq kaqtam Bibliaqa nin. Pëmi Patsachö llapan këkaqkunata patsätsishqa, tsënöpam yakupis pukutëman tikrarir tamyan (Eclesiastés 1:7). Y nunakunapitaqa, Diospa kallpanqa alläpa puëdeq y mana ushakaqmi. Tsëmi profeta Jeremïaspis kënö nirqan: “[¡]Ciëlochö y Patsachö Autoridadyoq Teyta Jehová! Rikë, qammi alläpa hatun kallpëkiwan y makyarëkaq rikrëkiwan ciëlokunata y patsata rurarqunki. Tsë llapan ruranqëkiqa manam ichikllapis mantsakëpaqtsu qampaqqa” (Jeremías 32:17). Patsata y tsëchö llapan këkaqkunata Dios kamashqa këkarqa musyanchi nunakuna yamë y alli kawakuyänanrëkur imata ruranampaqpis (Salmo 37:11; 115:16).

Tsëqa, ¿imanöraq Diosnintsik tsë llapanta altsaramunqa? Ishkë kaq yachatsikïchö rikanqantsiknöpis, kanan witsan tukï mana allikuna pasëkanqanqa “hinantinchö imëkapis imanö këkanqampa ushënin witsan[chöna]” kawëkanqantsikta rikätsikoq ‘señalmi’. Jesusmi kënö nirqan: “Canan willayanqaqcuna susedicuptin, musyayanqui Diospa mandaquinin chämunanpaq ichicllana pishicanqanta” (Mateo 24:3, NM; Lucas 21:31). Diospa Mandakïninqa pë patsätsinqan Gobiernom, y tsë Gobiernom kë Patsachö tukï allikunata ruramunqa, y tukï desgraciakunatapis ushakäratsimunqa. Kikin Jehová Dios këkunata rurëta puëderpis, Tsurintam tsëkunata ruranampaq cargota qoshqa, tsëmi profeta Daniel kënö nirqan: “Y pëtam qorqan mandakïta, respetashqa këta y gobiernota, tsënöpa llapan markakuna, llapan nacionkuna  y tukï idioma parlaqkuna pëta serviyänampaq” (Daniel 7:14).

Diospa Tsurin Jesucristum cargota chaskishqa Patsapita tukï mana allikunata ushakäratsinampaq y tsënöpa yamë kawakï kanampaq. Patsachö kanqan witsannam Jesusqa rikätsikurqan tukï desgraciakunata dominëta puëdenqanta. Huk kutim Galilea nishqan lamarchö qateqninkunawan këkäyaptin “llutepa bientur qallaquicorqan, lamarta laqcheqsätsirnin. Lanchaman yacu winacaptinnam, undir qallaquicorqan”. Qateqninkunaqa alläpam mantsakäyarqan y wanïta mantsarmi yanapayänampaq Jesusta niyarqan. Y, ¿imatataq Jesusqa rurarqan? “[¡]Amana bientïnatsu; ni yacu laqcheqsënatsu[¡]” nirirqanllam. “Tsenam bientupis pararerqan, y llapanmi shumaq tranquilu ticrarerqan”. Tsëta rikëkurmi qateqninkunaqa mantsakarnin kënö niyarqan: “¿Queqa imano nunataq, tselaya bientupis y yacupis mandadunta cäsuyänanpaq!” (Marcos 4:37-41).

Tiempo pasariptinnam, espïrituman tikrarir Teytan këkanqanmanna Jesusqa kutikurqan y tsëchömi más poderta y autoridadta chaskirqan. Kanan witsanqa Diospa Gobiernonchö mandakoqnam tikrashqa, tsëmi nunakuna yamë y mana mantsakur kawakuyänampaq Patsata altsëqa makinchö këkan.

Tsënö kaptimpis rikarquntsiknam tukï hipakïkuna y desgraciakuna kanampaqqa, kikinkunallapaq imëkata munaq y mallaqäkoq nunakunapa culpampis kanqanta. ¿Imatataq Diospa Gobiernon ruranqa tsënölla kakoq nunakunawan? Bibliam nimantsik “Jesucristu puedeq anjelnincunawan sielupita que patsaman imeca nina rupecaqchono cutimu[nampaq]” kaqta. Hina nimantsikmi “Teyta Diosta mana respetaqcunata, y Teyta Jesucristupa alli willaquininta mana cäsucoqcunata [castigananpaq]” kaqtapis. Awmi, pëqa “que patsacho llutan ruraqcunatam ushacätsinq[a]” (2 Tesalonicenses 1:7, 8; Apocalipsis 11:18).

Tsëpitanam “reycunapa Reynin” Jesucristuqa kë Patsapita tukï desgraciakunata chipyëpa ushakäratsimunqa (Apocalipsis 19:16). Manam haqinqanatsu Gobiernonchö këkaqkuna imëka llakikïkunapa pasayänanta. Kallpanwanmi tukï desgraciakuna kanampaq causaqkunata controlanqa. Tsënömi cumplikärinqa Jehová unëna markanta kënö nir awninqan: “Tiemponchömi tamyatsimushaq y patsachöqa imëkam wayunqa, y chakrakunachö lluta winakoq plantakunapis wayunqam” (Levítico 26:4). Nunakunaqa shumaq wayikunatam shäritsiyanqa y manam mantsayanqanatsu ima desgraciapis ushakäratsinanta. Kënö nirmi Biblia awnimantsik: “Wayikunatam rurayanqa, y tsëchömi yachayanqa, atska chakrakunatam muruyanqa, y wayunqantam mikuyanqa” (Isaías 65:21).

¿Imatataq ruranëki yamë kawakïta tarinëkipaq?

Mëraq qamqa wakin nunakunanöpis munanki tukï desgraciakuna manana kanan Patsachö kawëta. ¿Imatataq ruranëki tsënö kawakïman chänëkipaqqa? ‘Diosta mana respetaqcuna’ y ‘alli willaquininta mana cäsucoqcunaqa’ manam chäyanqatsu tukï desgraciakuna manana kanan Patsachö kawëman. Awmi, Diosqa “que patsacho llutan ruraqcunatam ushacätsinq[a]”. Tsëmi alläpa precisan Diospa munëninta nunakuna ras yachakuyänan y hinantin Patsata mandakamunampaq churanqan Gobiernota yanapayänan. Jehoväqa munan alli reqinata y Tsurin Jesucristupa yanapakïninwan patsätsinqan Gobiernopita alli willakïta wiyakunatam.

Y tsëtaqa rurantsik Bibliata shumaq estudiarmi, tsëchömi willakïkan Diospa Gobiernon llapanta altsamuptin shumaq Patsachö kawakunarëkur imata ruranapaqpis. ¿Imanirtaq Jehoväpa testïgonkunata nirinkitsu Bibliapita shumaq yacharatsiyäshunëkipaq? Pëkunaqa kushishqam yanapariyäshunki. Këta ama qonqëtsu: Diosta alli reqinëkipaq y pëta wiyakunëkipaq kallpachakurqa, Proverbios 1:33 textochö kënö ninqan cumplikaqtam rikanki: “Wiyamaq kaqqa yamëmi kawakunqa, y manam ima desgracia pasanantapis mantsanqatsu”.