YARPAKURKÏ, respetanqëki amïguïki mana entiendinqëkita rurarinman. Wakinkunaqa pëpaq mana allita parlarmi, ruranqanta juzgar qallëkuyan. ¿Pëkuna parlayanqanmantsuraq qaqärinkiman o amïguïki imanir ruranqanta shumaq willarishunëkitatsuraq shuyärinkiman? Peru amïguïki tsëchö mana këkaptinqa, ¿pacienciawantsuraq shuyärinkiman willarishunëkita o rastsuraq mana allita pensar qallëkunkiman?

Puntataqa, këtachi tapukurinkiman: “¿Alleqku amïguta reqi? ¿Imanirtaq admirä?”. Tsënö pensëqa alläpa allim kanman. ¿Manatsuraq tsënölla tapukushwan Diosqa rumi shonqum nir parlayanqampaq?

Itsa käyinkillatsu o mayankillatsu Dios imanir ruranqanta o imanöpa permitinqanta. Atskaqmi Diosqa rumi shonqun nir juzgarnin qamtapis pëkunanö pensanëkipaq niyäshunkiman. ¿Tsërëkurllatsuraq Diospaq mana allita pensar qallëkunkiman imatapis alleq mana musyëkar? Tsëqa kanqa Diosta alleq reqinqëkipitam o mana reqinqëkipitam. Tsëmi: “¿Imanö Diostaq noqapaq kashqa?” nir tapukunëki.

Itsa kawënikichö imëka mana allikunapa pasashqa karninqa Diosqa manam amïgötsu ninkiman. Peru yarpakurkï: ¿Diostsuraq imëka mana allikunapa pasanqëkipa culpayoq o imëkanöpapis bendisishurqunkitsuraq? Rikanqantsiknöpis, ‘mandacoq diablum’ kë Patsataqa gobernëkan (Juan 12:31). Tsëmi entëru Patsachö imëka mana allikuna pasanqampita pë culpayoq. Y ¿manaku höraqa jutsasapa kanqantsikrëkur o kë patsachö imëkapis pasakunqampita problëmakunapa pasantsik?

Peru ¿Diosqa imataraq rurashqa? Bibliaqa rikätsikun ciëluta y Patsata Kamaq kanqantam; jina cuerpuntsik shumaq rurashqa kanqampis rurëninchöqa këkanmi, y hasta kawënintsik, shütënintsikpis pëpa makinchömi këkan (Salmu 124:8; 139:14; Daniel 5:23). ¿Këqa imatataq rikätsimantsik?

Rikätsimantsik Dios kawë qomaqnintsik kanqantam (Hëchus 17:28). Diospa qarëninmi kë Patsachö imëka shumaq kaqkuna, kuyakï, amïgu kanqantsik, imëka gustamanqantsik, yatanqantsik, wiyanqantsik, muskinqantsik..., y maskuna (Santiägu 1:17). ¿Manaku këkunata musyanqantsikqa Diosta llapan shonquntsikwan kuyanapaq yanapamantsik?

Tsënö kaptimpis; itsa sasaraq o ajaraq kanman Diosman markäkunëki o yärakunayki. Itsa mana alleq reqinqëkita pensankiman, tsëqa comprendipaqmi. Diosqa rumi shonqum niyanqampaqqa manam kë yachatsikïkunallachöqa llapanta rikätsikïta puëdiyätsu. Peru ¿manatsuraq maslla Diosta reqinapaq sinchikushwan? * Tsënö rurarninqa Diospita rasumpa kaqta masllam musyarinki. Diosqa manam rumi shonqutsu. Tsëpa rantinqa: “Allapa cuyacoqmi” (1 Juan 4:8).