Ushakë junaq alläpa mantsakëpaq kanampaq kaqtam Bibliaqa kënö nin: “Jatun sufrimientum kanqa mana imëpis kashqannö; nuna kawar qallanqampita hasta kananyaq manam tsënöqa kashqaraqtsu, manam, y yapëqa manam tsënö kanqanatsu [...]. Tsë junaqkuna raslla mana pasaptinqa, manam ni pipis salvakunqatsu” (Mateu 24:21, 22, NM). Jina salvakoqkuna kayänampaqpis ninmi: ‘Mana alli nunakunaqa ushakäreqllam, peru Diospa munëninta ruraqkunaqa imëyaqpis kawayanqam’ (1 Juan 2:17, NM).

¿Imatataq ruranantsik salvakunapaq? ¿Kananllapitanaku vïviriskunata y imëkata churakushwan? Manam. Bibliaqa kënömi consejamantsik: “Tsënö imëkapis ushakänan këkaptinqa, ¡imanö nuna kayanqëkita rikätsikuyë, llapanchö limpiu kawakurnin y Diospa munëninta rurarllana, Diospa junaqninta yarparar y shuyararllana” (2 Pëdru 3:10-12, NM). Kë versïculukunapa qepan y puntan kaq textukunam yanapamantsik ‘imëkapis ushakänampaq kaq’ ninqanqa, kanan mana alli gobiernukuna y llapan yanapaqninkuna y Jehoväpa contran churakaqkuna kayanqanta entiendinapaq. Clärum këkan, imëka kapamanqantsikqa manam salvamäshuntsu tsë ushakë junaqpita.

Rasumpëpaqa, Jehovä munanqannö kawanqantsikpita y pëllapaq kanqantsikpitam salvacionnintsikqa kanqa (Sofonïas 2:3). Ushanan junaqkunachö kawëkanqantsik señalta mana cäsushpa nunakunata qatinantsikpa rantinqa, ‘Diospa junaqninta yarparar y shuyararllanam’ këkänantsik. Jehoväpa testïgunkunaqa Bibliawanmi yachatsishïnikita puëdiyan imata rurar salvakunëkipaq kaqta.