1, 2. ¿Ñucanchijca maipitaj miticuna canchij?

YUYASHUN, shuj ñanta puricujpica jahua pacha amsayashpa, cˈulun nishpa, rayocuna achij nishpami achcata tamyai callarin. Chashna tucujpica maipi miticunata mashcashpami shuj miticuna huasita ricungui. Chaipica chaquishcami can. Ña chaipi cashpaca ¿manachu achcata cushicunguiman?

² Cunan punllacunapica amsayashpa caticuj shinami achca llaquicuna tiyan. Shinapish ¿Diosmanta ama caruyangapaj, huiñai causaitapish ama chingachingapajca maipitaj miticuna canchij? Bibliapica cashnami nin: ‘Mandaj Diostaca: “Quiquinca ñuca shuyana, ñuca miticunami cangui. Ñuca shunguta churana Dioslla”’ ninmi (Salmo 91:2).

3. ¿Jehová Diospi miticungapajca imatataj rurana canchij?

³ Tucuita Ruraj, Tucuita Mandaj Jehová Diosmi ñucanchij miticuna can. Paica tucuicunata yalli achca podertami charin.  Ñucanchijta llaquichijpipish paica ñucanchijta ayudai tucunmi. ¡Chaica sumaj bendicionmi can! Shinapish ¿Jehová Diospi miticungapajca imatataj rurana canchij? Ñucanchij shungutami paipi churana canchij. Shinallataj Bibliapica: “Diospaj cˈuyaipi catiraichij” ninmi (Judas 21). Shinashpaca Jehová Diostami cˈuyashpa catina canchij, paipaj cˈuchupimi saquirina canchij. Chaita rurajpica paica ñucanchij miticunami tucunga. Shinapish ¿ima shinataj paihuan alli apanacui tucunchij?

4, 5. ¿Jehová Diosca ima shinataj ñucanchijta cˈuyashcata ricuchishca?

⁴ Jehová Diosca achca bendicioncunata cushpami ñucanchijta cˈuyashcata ricuchishca. Cai libropi yachashcata yuyari. Huaquin bendicioncunata yuyarishpaca Diospaj cˈuyaipimi catirashun. Por ejemplo: Diosca cushilla causachun nishpami cai Allpataca sumajta rurashca. Yacutapish, micunatapish, yuracunatapish, animalcunatapish, sumaj sisacunatapishmi rurashca. Shinallataj Bibliatami quillcachishca. Bibliapica paipaj shutita, pai ima shina cashcata, ñucanchijta quishpichichun paipaj Churita cai Allpaman cachashcatami huillan (Juan 3:16). Chashnami Diosca sumaj regalota ñucanchijman cushca. Jesús huañushcamantami sumaj causaita shuyacunchij.

⁵ Shinallataj sumaj causaita cungapajca Jehová Diosca jahua pachamanta mandachunmi Jesusta agllashca. Jesusmi tucui llaquicunata tucuchishpa cai Allpa pachapica sumaj causaita cunga. ¡Chaipica huiñai huiñaitami cushilla causashun! (Salmo 37:29). Chai punlla chayangacamaca Diospaj consejocunami cunan punllacunapi alli causachun ayudan. Shinallataj Jehová Diosca paihuan parlanacuna bendiciontami cushca. Mañashpami paihuan parlanacunchij. Shinashpaca Jehová Diosca cai laya bendicioncunata  cushpami gentecunata cˈuyashcata ricuchishca.

6. ¿Jehová Dios cˈuyashcamantaca imatataj rurana cangui?

⁶ “¿Jehová ñucata cˈuyashcamantaca imatataj rurana cani?” nishpa tapuri. Ñucapish paita cˈuyanami cani ninguichari. Achca gentecunami chashna yuyan. Jesusca cashnami nirca: Tucuita yallica “Cambaj Mandaj Taita Diosta tucui shunguhuan, tucui almahuan, tucui yuyaihuan cˈuyangui” nircami (Mateo 22:37). Jehová Diosca achca allicunatami canman cushca. Chaimantami paita cˈuyana cangui. Shinapish Jesús mandashca shina cˈuyangapajca ¿cˈuyanimi nishpallachu saquirina cangui?

7. ¿Ima shinataj Diosta cuyashcata ricuchinchij?

⁷ Bibliapi nishca shinaca, Diosta alli cˈuyangapajca mana cˈuyanimi nishpallachu saquirina canchij. Cˈuyaita sintinaca callarillami can. Alli entendingapaj shuj chˈimbapuraita rurashun: Canca micusha nishpami shuj manzanata mañangui. Shinapish ¿muyullata cujpica cushicunguimanchu? Mana. Muyuca manzana tucungapajmi huiñashpa pˈucuna can. Shinallataj cˈuyaipish muyu shinami huiñashpa pˈucuna can. Bibliapica: “Diosta cˈuyacushcataca pai mandashcacunata cazushpami ricuchina. Pai mandashcacunata cazunaca mana sinchichu” ninmi (1 Juan 5:3). Shinashpaca Diosta cˈuyashcataca ruraicunahuanmi ricuchina canchij. Chashnami ñucanchij cˈuyaica pˈucushca grano shina ricuringa (Mateo 7:16-20-ta rezai).

8, 9. ¿Diosta cˈuyashcata, paita diosolopagui nishcataca ima shinataj ricuchinchij?

⁸ Dios mandashcacunata cazushpa, pai yachachishcata pajtachishpami paita cˈuyashcata ricuchinchij. Dios mandashcacunaca mana llashaj quipi shinachu can. Ashtahuanpish ñucanchijta ayudangapajmi can (Isaías 48:17, 18).  Ñucanchijta Dios ayudachun saquishpaca tucuita cushcamanta paita diosolopagui nishcatami ricuchinchij. Mana tucui gentecunachu chaita ruran. Shuj punllaca Jesusca lepra ungüita charij 10 runacunatami jambirca. Shinapish shujllami diosolopagui ninaman tigrarca (Lucas 17:12-17). ¿Diosolopagui ninata cungarij 9 runacuna shinachu casha ninguiman? Mana, ashtahuanpish diosolopagui ninaman tigraj runa shinami cana canchij.

⁹ Shinashpaca, ¿Jehová Diosca imatataj cazuchun mandashca? Cai libropica tauca mandashcacunatami yachashcanchij. Shinapish huaquin mandashcacunata yuyarishun. Chaita cazushpaca Diospaj cˈuyaipi catinaca jahuallami canga.

10. ¿Imamantataj Diosmanta yachashpa catina cangui?

¹⁰ Jehová Diospajman ashtahuan cˈuchuyangapajca paitami alli rijsina cangui.  Diosta rijsinaca mana nunca tucuringachu. Shuj chˈimbapuraita rurashun: Shuj tutaca chiri urcupi cashcanguiman. Cunujyangapajmi ninata japichingui. ¿Nina asha asha huañuchun saquinguimanchu? Mana, ashtahuanpish nina lunyashpa catichunmi yantata churashpa catinguiman. Chaita mana rurashpaca chirimanta huañui tucunguimi. Yantaca nina lunyashpa catichunmi ayudan. Chashnallatajmi ‘Taita Diosmanta alli yachanaca’ paita cˈuyashpa catingapaj ayudan (Proverbios 2:1-5).

11. ¿Jesús yachachijpica paita catijcunaca ima shinataj sintirirca?

¹¹ ¿Jesusca imatataj munarca? Diostapish, Diospaj Shimitapish paita catijcuna cˈuyashpa catichunmi munarca. Jesús causarishca qˈuipaca paipaj ishqui catijcunamanmi Ñaupa Testamentopi tiyaj huaquin shimicunata pai pajtachishcata entendichirca. ¿Paicunaca ima shinataj sintirirca? “Quillcachishcacunata yuyachishpa, ñanpi ñucanchijman huillacushpaca ¿manachu ñucanchij shungutaca rupachij shina yuyachishpa rimarca?” nircacunami (Lucas 24:32).

12, 13. a) ¿Imamantataj tauca gentecunaca Diostapish, Bibliatapish cˈuyanata saquishca? b) ¿Ñucanchij cˈuyai ama chiriyachunca imatataj rurana canchij?

¹² Biblia imata yachachishcata entendishpaca, ¿manachu Diosta cˈuyashcamanta, cushilla cashcamantapish cambaj shungu rupacuj shina sintirircangui? Ari. Achcacunami chashna sintirishca. Cunanca sinchi ricurijpipish chai cˈuyaita huiñachishpami catina cangui. Jesusca cashnami yachachirca: “achcacunapaj cˈuyaimi chiriyanga” nircami. Ñucanchijca mana paicuna shina tucusha ninchijchu (Mateo 24:12). ¿Diostapish, Biblia yachachishcatapish cˈuyashpa catingapajca imatataj rurana cangui?

¹³ Jehová Diosmantapish, Jesucristomantapish ashtahuan yachashpa cati (Juan 17:3). Bibliata rezacushpaca shungumanta cashna tapuri: “¿Cai yuyaica imatataj Jehová Diosmanta yachachin? ¿Tucui shunguhuan, tucui yuyaihuan,  tucui almahuan Diosta cˈuyangapajca ima shinataj ayudan?” (1 Timoteo 4:15-ta rezai). Chashna rurajpica cambaj cˈuyaica mana chiriyangachu.

14. ¿Diospaj cˈuyaipi catingapajca imamantataj cutin cutin mañana canchij?

¹⁴ Shinallataj Diosta cˈuyashpa catingapajca cutin cutinmi mañana canchij (1 Tesalonicenses 5:17). Capítulo 17-pi ricushca shinaca mañanaca Dios cushca sumaj regalomi can. Shuj amigohuan cutin cutin shungumanta parlanacushpaca alli amigocunami tucunchij. Shinallataj Jehová Diosta cutin cutin mañashpaca ashtahuanmi paipajman cˈuchuyashun. Paita mañashpaca mana chaillatataj chaillatataj nishpachu mañana canchij. Alli yuyashpami mañana canchij. Shuj churi paipaj yayahuan parlaj shinami Jehová Dioshuan parlanacuna canchij. Respetohuan, shungumanta, mana manchashpami paihuan parlana canchij (Salmo 62:8). Diosta adorangapajca ñucanchijllatajmi Bibliamanta yachana canchij. Shinallataj shungumantami mañana canchij. Chashna rurashpaca Diospaj cˈuyaipimi catirashun.

15, 16. ¿Diospaj Mandanamanta huillanaca imamantataj valishca can?

¹⁵ Bibliamanta ñucanchijlla yachashpa, ñucanchijlla mañashpapish Diostami adoranchij. Shinapish shujtaj gentecunahuan cashpaca ñucanchij crishcacunamantami parlana canchij. ¿Ñachu Bibliamanta shujtajcunaman parlashcangui? Ña parlashca cashpaca sumaj bendiciontami charishcangui (Lucas 1:74). Jehová Diosmanta imata yachashcatapish, Diospaj Mandanamanta alli huillaicunatapish shujtajcunaman parlashpaca Jesús mandashcatami cazunchij (Mateo 24:14; 28:19, 20-ta rezai).

¹⁶ Apóstol Pablopajca Diosmanta shujtajcunaman huillanaca valishca curi shinami carca (2 Corintios 4:7). Jehovamantapish, pai imata rurasha nishcatapish  shujtajcunaman parlanaca tucuita yalli alli ruraimi can. Puntapica, tucuicunata yalli jatun Mandajtami servicunchij. Qˈuipaca, alli causangapajmi ayudan. Diosmanta parlashpaca alli shungu gentecuna paipajman cˈuchuyachun,  causaiman apaj ñanman yaicuchunmi ayudanchij. ¿Cai laya shujtaj alli ruraicuna tiyanchu? Jehovamanta, Bibliamanta gentecunaman parlajpica ñucanchij crishcacunaca sinchiyanmi. Shinallataj Diostapish ashtahuanmi cˈuyanchij. Ñucanchij tucui shunguhuan huillajpica Diosca achcatami cushicun (Hebreos 6:10). Huillashpa catinaca Diospaj cˈuyaipi catingapajmi ayudan (1 Corintios 15:58-ta rezai).

17. ¿Imamantataj utca huillana canchij?

¹⁷ Diospaj Mandanamanta huillanaca minishtirishcami can. Bibliapica: “Diospaj Shimitaca huillana horaspipish mana huillana horaspipish huillacuilla” ninmi (2 Timoteo 4:2). ¿Cunan punllacunapica imamantataj utca huillana canchij? Bibliapica: “Mandaj Dios jatunta llaquichina punllaca ñallamari chayamucun. Chai punllaca ñallamari pajtamucun” ninmi (Sofonías 1:14). Mana alli ruraicunata Dios tucuchina punllaca ñami chayamucun. ¡Chaitaca gentecunaca yachanami can! Tucuita Mandaj Diostaca cunanllataj cazuna cashcatami gentecunaca entendina can. Diospaj punllaca “shamungami mana uniyangachu” (Habacuc 2:3).

18. ¿Imamantataj Jesusta alli catijcunahuan tandanacushpa Diosta adorana canchij?

¹⁸ Jesusta alli catijcunahuan tandalla paita servichunmi Jehová Diosca munan. Chaimantami Bibliapica: “Caishuj chaishuj llaquinacushpa, cˈuyanacunatapish, allita ruranatapish yuyachinacushunchij. Ñucanchij tandanacuiman maijancuna mana shamunayachijcuna shina ama tucushunchij. Chaipaj randica, [Diospaj punlla, NM] ñalla chayamucushcata ricushcamantacarin caishuj chaishuj yuyachinacunamari canchij” ninmi (Hebreos 10:24, 25, NVI). Ñucanchij huauqui panicunahuan tandanacushpaca cˈuyaj Diosta adorana, paita alabana bendiciontami charinchij. Shinallataj caishuj chaishuj yuyachinacushpami ashtahuan sinchiyanchij.

19. ¿Huauqui panicunahuan ashtahuan cˈuyanacungapajca imatataj rurana canchij?

 ¹⁹ Huauqui panicunahuan tandanacushpaca ashtahuan cˈuyanacushpami alli amigocuna tucunchij. Jehová Diosca cada uno ima allita rurashcatami ricun. Ñucanchijpish pandarishcacunata ricunapaj randica shujtajcunapaj alli ruraicunatami ricuna canchij. Tucuicunami pandarinchij. Shinallataj huaquincunaca asha ashami sinchiyashpa catin (Colosenses 3:13-ta rezai). Shinashpaca tucui shunguhuan Diosta cˈuyajcunahuan apanacui. Chashnami Diospaj alli amigo tucungui. Huauqui panicunahuan Diosta adorashpaca Diospaj cˈuyaipi catinaca mana sinchichu canga. Cunanca paita alli servijcunata, paita cˈuyashpa causajcunata Dios ima shina bendiciashcata ricushun.

20, 21. ¿Huiñai causaica imamantataj sumaj canga?

²⁰ Jehová Diosca paita servijcunamanca causaitami cun. ¿Ima laya causaitataj cun? Ñucanchijca ñami causaita charinchij ninchijchari. Causashcamantami samaita charinchij, micunchij, ubyanchij ninchijchari. Llaquicunata mana charishpacarin “¡cushillami causani!” ninchijchari. Shinapish Bibliapi yachachishca shinaca alli causaitaca ni pi mana charinchijchu.

²¹ Bibliapica ‘huiñai causaita’ mashcachunmi yachachin (1 Timoteo 6:19). “Huiñai causaitaca” shamuj punllapimi charishun. Chaipica callaripi Dios munashca shinami jucha illaj causashun. Cai Allpa shuj paraíso tucujpica nanaicuna illaj, llaquicuna illajmi causashun. Chaipimi ñucanchijca huiñai huiñaita cushilla causashun (1 Timoteo 6:12). ¿Chaipi causasha ninguimanchu?

22. ¿ Huiñai causaita charingapajca imatataj rurana canchij?

²² ¿Huiñai causaita charingapajca imatataj rurana canchij? Huiñai causaimanta manaraj parlashpaca apóstol Pabloca: ‘Allicunata rurashpa charijcuna caichij’ nircami (1 Timoteo 6:18). Huiñai causaita charingapajca Biblia  yachachishcatami pajtachina canchij. Shinapish ¿ñucanchij alli ruraicunamanta huiñai causaita japina cashcatachu Pabloca yachachirca? Mana, ashtahuanpish ‘Dios cusha’ nishcamantami huiñai causaitaca charishun (Romanos 5:15). Jehová Diosca paita alli servijcunataca cushicushpami bendicianga. Paica “huiñai causaita” charichun, cushilla alli causachunmi munan. Diospaj cˈuyaipi catirashpaca chai sumaj causaitami charishun.

23. ¿Imamantataj Diospaj cˈuyaipi catirana canchij?

²³ “¿Biblia yachachishca shinachu Diosta adoracuni?” nishpami cada uno tapurina canchij. Cai tapuita cada punlla ari nishpaca allitami ruracunchij. Chaita rurajpica Jehová Diosca ñucanchij miticunami tucunga. Tucuri punllacunapi paita alli servijcunataca Jehová Diosca cuidangami. Shinallataj ñalla chayamucuj paraíso Allpapi causachunmi ayudanga. Chaipi causacushpaca tucuri punllacunapi alli agllashcamantami cushilla sintirishun. Canpish cunan punllacunapi alli agllashpaca, callaripi Dios munashca shinami huiñai causaita charingui.