¿Inti mana tiyajpica causaica ima shinashi canman? Inti tiyashcamantami yuracunapish pꞌangayuj tucushpa, sisashpa, granocunata pꞌucuchin. Shinallataj yura sapicunapish yacuta aisashpami pꞌangacunacama chayachin. Chaiman chayachijpimi yacu samaica llujshin.

Tamiaca Yaya Dios cushca bendicionmi can. Yaya Dios tamiata cujpimi granocuna pꞌucun, cosecha tiyan, suficiente micuna tiyan. Chaimi ñucanchij shungupish cushilla can.

Achca yayacunaca paicunapaj familiaman churachingapaj, carangapajmi tucui pudishcata rurancuna. Bibliapica: “Jahuata purij pajarocunata ricuichigari. Paicunaca mana tarpunchu, mana tandanchu, huaquichinacunapipish mana huaquichinchu. Shina cajpipish jahua pachapi caj cancunapaj Yayaca paicunamanca caranllami. ¿Manachu cancunaca paicunatapish yalli canguichij?” ninmi (Mateo 6:25, 26).

‘Chagrapi tiyaj lirio sisacuna ima shina huiñajta alli ricuichigari. Achcata charij rey Salomonpish chai sisa shinatajca manataj churarircachu. Qꞌuihuacunataca Taita Diosca chashna sumajtami churachin. ¿Manachu cancunamancarin chaicunaman churachishcata yalli churachinga?’ (Mateo 6:28-30).

Yaya Diosca ñucanchijman micunata, churanata cushpaca ¿nachu shujtaj minishtishcacunatapish cunga? Diospaj munaita rurajpica paica ñucanchijcuna micunata charichunmi ayudanga. Shinallataj ima minishtirishcata randingapaj shuj trabajitota charichunmi ayudanga (Mateo 6:32, 33).

Intipi, tamiapi, pajarocunapi, sisacunapi yuyashpaca ¿manachu Yaya Diostaca ashtahuan cꞌuyanchij? Catij yachaipica Tucuita ruraj Dios gentecunahuan ima shina parlanacuj cashcatami yachashun.