¿QUIQUINCA CUSHILLACHU CAUSANGUI? ¿Cambaj familiamanta, trabajomanta o cambaj religionmantachu cushilla causangui? Mana cashpaca: “Ñucaca estudianata tucuchishpa, alli trabajota charishpa o shuj carrota randishpami cushilla causasha” ninguichari.

Achca gentecunaca paicuna rurasha nicushcata ña pajtashpaca cushillami sintirincuna. Cutin shujtajcunaca, paicuna munashcata charishpami cushilla sintirincuna. Pero ¿tucuita charishpapish siemprechu cushilla causai tucungacuna? Mana. Chai cosascunahuan mirga horasta cushilla cashpapish, asha punllacuna qꞌuipaca mana cushilla sintiringacunachu.

Huaquin librocunapi nishca shinaca gentecunaca mana ashalla tiempotachu cushilla causanata munanchij. Ashtahuanpish tucui ñucanchij causaipimi tranquilo, cushilla causanata munanchij.

“Ñuca munashcacunata charishpallami cushilla causai tucusha” nishpachari yuyanchij. Pero shina yuyaita charishpaca mana cushilla causashunchu. Ashtahuanpish cushilla causasha nishpaca shuj ñanta ricuj layami cushi causaitaca cada punlla mashcashpa catina canchij.

Por ejemplo, shuj alli saludta charingapajca punllantami alli alimentarina canchij, ejerciciota rurana canchij, tranquilo causaitapishmi charina canchij. Cushilla causangapajpish punllantami allicunata rurana canchij. Shinallataj alli consejocunatami mashcashpa catina canchij.

¿Cushilla causangapajca imatataj rurana canchij? Por ejemplo:

• CHARINALLAPI MANA YUYASHPAMI SHUJTAJCUNATA AYUDANA CANCHIJ.

• ÑUCANCHIJ SALUDTAPISH CUIDASHPAMI CATINA CANCHIJ.

• CꞌUYAITA RICUCHINAMI CANCHIJ.

• SHUJTAJCUNATAPISH PERDONAJMI CANA CANCHIJ.

• IMAMANTA CAUSACUSHCATAMI ALLI INTINDINA CANCHIJ.

• SHAMUJ PUNLLAPI CUSHI CAUSAI TIYANATAPISH MANA CUNGARINACHU CANCHIJ.

Bibliapica: “Alli ñanllapi purijcunaca cushichishcacunami. Mandaj Diospaj mandashcallapi purijcunaca cushichishcacunami” ninmi (Salmo 119:1). Cunanca chai ñanmantami ashtahuan yachagrinchij.