Mana. Ñucanchijca Bibliapi nishca shinami Jesús huañushcata yuyaringapaj tandanacunchij. Huaquincunaca cai tandanacuitaca Jesús huañushcata yuyarishpa micuna tandanacui nishpami rijsincuna (1 Corintios 11:20). Shinapish shujtaj religioncunaca Jesús mandashca shinaca paipaj huañuitaca mana rurancunachu.

 Ñucanchijmanta Jesús ima rurashcata agradicingapajmi tandanacunchij (Mateo 20:28; 1 Corintios 11:24). Yaya Dios ñucanchij adoracionta chasquichun o ñucanchij juchacunata perdonachun nishpaca mana tandanacunchijchu. Bibliapica Yaya Dios ñucanchij juchacunata perdonachunca Jesuspi crina cashcatami yachachin. Shujtaj religioncunapaj costumbrecunata catinataca mana minishtinchijchu (Romanos 3:​25; 1 Juan 2:​1, 2).

 Jesusca paita catijcunamanca pai huañushcata yuyarishpa catichunmi mandarca. Shinapish mashna cutincunata rurana cashcataca mana nircachu (Lucas 22:19). Huaquin gentecunaca cada quilla, cada semana, cada punlla o mashna munashcatami yuyarina canchij nincunami. Shinapish cai tandanacuita rurangapajca chai tuta Jesús ima rurashcatami yachana canchij.

 Judiocunaca Pascua fiestatami rurajcuna carca. Jesusca chai punllami pai huañushcata yuyarichun mandarca. Chaita callarichishca qꞌuipallami paica huañurca (Mateo 26:​1, 2). ¿Imamantataj chaita yachanchij? Bibliapica Jesuspaj huañuitaca Pascua fiestapi sacrificashca malta ovejahuanmi chꞌimbapuran (1 Corintios 5:​7, 8). Judiocunaca Pascua fiestataca huatapi shuj cutinllami rurajcuna carca (Éxodo 12:​1-6; Levítico 23:5). Jesusta punta catijcunapish pai huañushcata yuyaringapajca huatapica shuj cutinllatajmi tandanacujcuna carca. Testigo de Jehovacunapish paicuna rurashca shinami ruranchij. a

 14 de nisán huata 33-pi inti yaicushca qꞌuipami Jesusca cai tandanacuita callarichirca (Mateo 26:18-​20, 26). Testigo de Jehovacunaca cada huatami Jesús huañushcata yuyarina tandanacuita rurangapaj ñaupa tiempopi causaj judiocuna shina ricunchij. Chashna rurashpami Jesusta punta catijcunapaj ejemplotapish catinchij. b

 Huata 33-pi 14 de nisanca viernes punllapimi urmarca. Shinapish cai fechaca cada huataca chꞌican chꞌican punllacunapimi urman. Testigo de Jehovacunaca 14 de nisán ima punllapi urmashcata yachangapajca cunan punllapi judiocunapaj calendariopi ricunapaj randica Jesusta punta catijcuna utilizashca calendariotami ricunchij. c

 Jesusca Pascua fiestapi tiyashca levadura illaj tandahuan, vinohuanpishmi cai tandanacuitaca callarichirca (Mateo 26:26-​28). Ñucanchijpish Jesús huañushcata yuyaringapaj tandata rurangapajca imatapish mana churanchijchu. Vinopipish mana imata churanchijchu.

 Huaquin religioncunapica Jesús huañushcata yuyaringapajca tandataca levadurahuanmi rurancuna. Shinapish Bibliapica levadurataca juchata ricuchingapajmi churan (Lucas 12:1; 1 Corintios 5:​6-8; Gálatas 5:​7-9). Cutin levadura illaj tandaca Jesuspaj jucha illaj cuerpotami ricuchin (1 Pedro 2:​22). Bibliapi mana yachachijpipish huaquin religioncunaca vinotaca mana ubyanachu canchij nincunami (1 Timoteo 5:​23). Chaimantami paicunaca vinota utilizanapaj randica uva jugota utilizan.

 Huaquincunaca Jesús huañushcata yuyarina tandanacuipica tandaca Jesuspaj cuerpo, vinoca Jesuspaj yahuarmi tucun nincunami. Shinapish caica mana shinachu can. Chai tandanacuipica tandaca Jesuspaj cuerpohuan, vinopish Jesuspaj yahuarhuanca mana chagrurinchu. Levadura illaj tandaca Jesuspaj cuerpota ricuchingapaj, vinopish Jesuspaj yahuarta ricuchingapajllami can. Caimanta Biblia ima yachachishcata ricushun.

•   Jesús paita catijcunata paipaj yahuarta ubyachun nishca cajpica, Yaya Dios yahuarta ama micuchun nishca mandashcataca mana cazucushcatami ricuchinman carca (Génesis 9:4; Hechos 15:28, 29). Jesusca Dios mandashcatami siempre cazuj carca (Juan 8:​28, 29).

•   Apostolcunaca Jesuspaj yahuartaca mana ubyarcacunachu. Chai tutaca Jesusca ‘cancunamantami ñuca yahuartaca jichagrini’ nircami (Mateo 26:28). Chashna nishpaca Jesusca ñucanchijmanta manaraj huañushcatami ricuchicurca.

•   Jesusca ‘shuj cutinlla huiñaipaj paillataj curishpami huañurca’ (Hebreos 9:​25, 26). Jesús huañushcata yuyarijpi tandapish vinopish Jesuspaj cuerpo, Jesuspaj yahuar tucujpica cada huata Jesús huañucushca shinami canman.

•   Jesusca: “Ñucata yuyarishpa caitaca ruracunguichijlla” nircami. Paica mana nircachu: “Cancunamanta cutin huañungapaj caita rurashpa catinguichijlla” (1 Corintios 11:24).

 Bibliamanta huaquin versocunata mana alli intindishcamantami tandaca Jesuspaj cuerpo, vinopish Jesuspaj yahuar tucushcata crincuna. Por ejemplo, huaquin Bibliacunapica vinomanta parlashpaca: ‘Jesusca, “caica ñuca yahuarmi can”’ nishpami traducishcacuna (Mateo 26:28). Pero Jesusca: “Caica ñuca yahuartami ricuchin” nircami. d Caipica Jesusca shuj chꞌimbapuraihuanmi parlacurca (Mateo 13:34, 35).

 Testigo de Jehovacuna Jesús huañushcata yuyaringapajca huaquincunallami tandata micun, vinotapish ubyan. ¿Imamanta?

 Jehová Diosca ñaupa israelitacunahuanmi shuj ari nishcata rurarca. Pero Jesusca paipaj yahuarhuanmi shuj mushuj ari nishcata callarichirca (Hebreos 8:​10-​13). Jesús huañushcata yuyarina tandanacuipi tandata micuj, vinota ubyajcunami cai mushuj ari nishcataca Jesushuan rurashcacuna. Dios cayashcacuna o Dios agllashcacunallami tandata micun, vinotapish ubyan (Hebreos 9:​15; Lucas 22:20). Dios agllashcacunaca Jesucristohuanmi jahua pachapi mandangacuna. Bibliapica 144 mil gentecunallami jahua pachaman rina esperanzata charijcuna cashcata yachachin (Lucas 22:28-​30; Apocalipsis 5:​9, 10; 14:​1, 3).

 Jesucristohuan ashacunalla mandajpipish cai Allpallapitaj huiñai huiñaita causana esperanzata charijcunaca achcacunami can (Lucas 12:32; Apocalipsis 7:​9, 10). Paicunaca tandataca mana micunchu, vinotapish mana ubyancunachu. Shinapish Jesús ñucanchijmanta huañushcata agradicingapajmi chai tandanacuiman rinchij (1 Juan 2:2).