¿Imasnara Jesús huañushcamanda “ashcaunara randingaj” valin?
Biblia cutipashca
Jehová paihua Churi causaira cusha runaunara uchamanda, huañuimandas quishpichinmi. Biblia ninmi uchamanda runaunara quishpichingaj Jesús paihua yahuarhua pagaca (Efesios 1:7; 1 Pedro 1:18, 19). Chimanda pai nica cai Allpama shamuca “causaira cungaj ashcaunara randingaj” nisha (Mateo 20:28, Mushuj Pactachina Shimi).
¿Imarasha quishpinara ministinchi?
Ñaupa punda Dios rurashca runa Adán, ucha illaj aca. Astaumbas, huiñai causaira charina ushaca, shinajpi Yaya Diosta mana casushcamanda huañuca (Génesis 3:17-19). Pai uchayuj tucushcamanda tucui pai huahuaunas shinallara uchayuj pagarinchi (Romanos 5:12). Chimanda, Biblia nin Adán paillara caturica shinallara paimanda miraigunaras uchamanda, huañuimandas esclavo cuinta tucungaj (Romanos 7:14). Mana pihuas charina ushan Adán pirdishcara, tucuiguna uchayuj ashcamanda (Salmo 49:7, 8).
Yaya Dios Adanmanda miraigunara yanapangaj munaca paigunara llaquishcamanda (Juan 3:16). Shinajpi, pai Dirichura Ruraj an, chiraigu ucha rashcaunara mana yangamanda quishpichina ushaca (Salmo 89:14; Romanos 3:23-26). Pai runaunara llaquishcamanda, paihua ley mañashcara cuca uchaunara quishpichingaj, astaun uchara tucuchingajpas (Romanos 5:6-8). Paihua ley mañashca, Jesuspa causai an.
Quishpichinaga ¿imara an?
Bibliai quishpichina shimi cai quimsa iyaigunara intindichin:
Valishcamanda pagana an (Números 3:46, 47).
Pagashalla maicandas, imaras lugaryachina ushan (Éxodo 21:30).
Maicandas quishpichingaj chi valishca tupura pagana an. a
Ricushun imasna cai quinsa iyaiguna Jesús causaira cushcahua pariju an.
Valishcamanda pagana. Biblia Jesusta catijcunara nin “randishca acanguichi” nisha (1 Corintios 6:20; 7:23). Jesús paihua yahuarhua ashca runaunara quishpichica chimanda Biblia nin paihua yahuarhua runaunara randishcami “Diospajta, tucui ailluunamanda, tucui shimimandas, tucui llactamandas, tucui partimandas” (Apocalipsis 5:8, 9).
Lugaryachina. Jesús ñucanchimanda huañushcara uchamanda quishpichin (1 Corintios 1:30; Colosenses 1:14; Hebreos 9:15).
Valishca tupura pagana. Jesús ucha illaj ñucanchimanda cushca causai, Adán pirdishca ucha illaj causai cuinta valin, chimanda pagana ushaca (1 Corintios 15:21, 22, 45, 46). Biblia nin: “Imasna shu runa mana caźushcamandalla ashcauna uchayuj tucunauca, shinallara shu Runa caźushcamandalla ashcauna Dioshua ali dirichu tucunaungami” (Romanos 5:19). Cai intindichin shu runa huañushcamandalla ashca uchayujcunara quishpichingaj valin (1 Timoteo 2:5, 6).
a Biblia quillcashca shimiunai, “quishpichina” shimi intindichina munan maican cosasmanda ima valishcara pagana tupu ashcara. Por ejemplo, kafár nishca hebreo shimii ricsichina munan “quillpana” (Génesis 6:14). Cai shimi valin intindichingaj uchaunara quillpangaj rimashcai (Salmo 65:3). Shinallara kófer shimi intindichingaj valin imaras llushpichingaj, quishpichingaj cushcara (Éxodo 21:30). Shinallara griego shimii lýtron nishca, maicambi “quishpichina” shinallara “quishpichingaj valishca” cuinta pasachishca an (Mateo 20:28, The New Testament in Modern Speech, de R. F. Weymouth). Griego quillcaj runauna cai shimira utilizaj anuca, tapariajta, esclavo runaras llushpichingaj valishcara paganamanda intindichingahua.