¿IMAYNAM kawsakuy kanman, sichu huk nacionpi lliw runakuna hinaspa kamachiqninpas Diosta respetaspa kasukuptinkuqa? Salomonpa 40 wata kamachisqanmi chayta qawachin.

Manaraq wañukuchkaspanmi Davidqa churin Salomonta rey kananpaq churarqa. Huk kutim Diosqa Salomonman mosqoyninpi rikuriykuspan nirqa imapas munasqanta mañakunanpaq. Payqa kamachinanpaqmi yachaytawan entendimientota mañakurqa. Chay mañakusqan Jehová Diospa agradonpaq kaptinmi qoykurqa. Diosqa nirqataqmi kasukuptinqa qori-qollqeta, reqsisqa kayta hinaspa unay kawsakuytapas qonanmanta.

Yachayniyoq kasqanraykum Salomonqa ancha reqsisqa karqa. Huk kutipim payman iskay warmikuna rirqaku huk wawata qechunakuspanku. ¿Imatam Salomon rurarqa? ¡Kamachirqam chay wawata iskayman kuchunankupaq! Huknin warmim chayna kuchunankuta munarqa, hukninñataqmi ruegakurqa punta kaq warmiman qonanpaq. Chaynatam Salomon musyakururqa pim cheqap maman kasqanta. Runakuna chaymanta uyarispankum entienderqaku Diospa yachayninwan Salomon kasqanta.

Salomonpa allinpuni rurasqanqa karqa Jerusalenpi Jehová Diospaq templon rurasqanmi, chaypim israelitakuna Diosta yupaychananku karqa. Chay templo rurayta tukuruspankum Salomonqa Diosta mañakuspan nirqa: “Cielokunapipas nitaq cielokunapa hanayninpipas manam qamqa kamawaqchu, chaynaqa ¿imaynataq kay templo rurasqaypiqa yachawaq?”, nispa (1 Reyes 8:27).

Salomon ancha reqsisqa kaptinmi, Arabia lawpi Saba llaqtapipas paymanta uyarirqaku. Chay nacionmanta reinam Israelman hamurqa kikinpuni Salomonpa reqsisqa, kapuqniyoq hinaspa hayka yachayniyoq kasqanta qawananpaq. Anchallataña admirakuspanmi Jehová Diostapas alabarqa ancha yachayniyoq reyta akllarusqanmanta. Dios bendeciptinmi, Salomonpa kamachisqanqa ima tiempomantapas sumaqllaña karqa.

Ichaqa tiempopa risqanman hinam Salomonqa Diosta manaña kasukurqachu. Reykuna mana achka warmiyoq kanankupaq Dios kamachichkaptinpas, Salomonqa pachaknintin warmikunawanmi casarakururqa, achkataqmi taytacha-mamachakunata yupaycharqaku. ¿Imapim tukurqa?, chay warmikunam pisi-pisimanta Jehová Diosmanta karuncharachirqaku, hinaptinmi taytacha-mamachakunataña yupaychayta qallaykurqa. Chaymi Salomonta Jehová Dios nirqa mirayninkuna Israelpi llapallan llaqtakunata manaña kamachinanpaq. Davidman prometesqanraykullam mana llapantachu qechururqa. Arí, Salomon qepancharuptinpas Jehová Diosqa manam Davidwan contrato rurasqantaqa qepancharqachu.

(1 Reyes 1-11; 2 Cronicas 1-9; Deuteronomio 17:17.)