“Escuelapi warmamasiykunam mana reparawarqakuchu. Chaymi tanteakurqani imayna portakuyniypi chaynataq imayna allichakuyniypi cambianaypaq. Warmamasiykunapa amistadnin kay munasqayraykum paykunapa mana allinkuna ruwasqankuta ruwayta qallaykurqani.” (16 watayoq Jennifer.) *

¿Qamtapas sasachasuchkankichu? Chayna tarikuptikiqa kay yachachikuymi yanapasunki.

Allin ruwaqpas mana allintam ruwanman pipas hikutaptinqa.

“Mana allin amistadkunaqa urmachinmi allin kawsaqkunatapas.” (1 Corintios 15:33.)

“Yachankim imakuna mana allin kasqanmanta, ichaqa mana allinta ruwanaykipaq warmamasikikuna tanqasuptikiqa paykunapa munasqanman hinam ruwanki.” (Dana.)

Manam warmamasillaykichu sasachasunkiqa.

‘Allin rurayta munaptiypas mana allinllamá ñoqapiqa kachkan.’ (Romanos 7:21.)

“Wakin kutikunapiqa kikiymi mana allin ruwaykunapi piensani. Imapas ruwasqankumanta warmamasiykuna kusisqallaña rimaptinkum ñoqapas chay ruwayta munani.” (Diana.)

Sasachakuykunata aguantanaykipaq kallpanchakusqaykiqa mayna allinmi.

“Allin concienciayoqyá kawsakuychik.” (1 Pedro 3:16.)

“Warmallaraq kaspayqa manchakusqayraykum warmamasiykunapa niwasqanta wakinpiqa ruwaq kani, kunanqa manam ima niwasqankutapas kasunichu. Imamantapas aswan allinqa hawka concienciayoq kaspa miski puñuymi.” (Carla.)

Mana allinta ruwanaykipaq tanqasuptikiqa kayta ruway:

Ima pasasunaykimanta tapukuy. “¿Imataq pasanman mana allin ruwasqaymanta pipas yacharuptinqa? ¿Ima ninmantaq tayta-mamayqa? ¿Imaynataq tarikuyman chay ruwasqaywanqa?”. (Yuyaymanay Galatas 6:7 nisqanpi.)

“Tayta-mamaymi piensarinaypaq tapuwanku: ‘¿Imataq pasasunkiman warmamasikikunapa nisusqaykiman hina ruwaptikiqa?’. Chaywanmi cuentata qokuni mana allinta ruwaspayqa sasachakuypi tarikunaymanta.” (Olivia.)

Allin ruwanaykipaq kaqkunamanta seguropuni kay. Chaypaq tapukuy: “¿Imanasqam kay tanteasqayqa kikiytapas chaynataq hukkunatapas sasachanman?”. (Yuyaymanay Hebreos 5:14 nisqanpi.)

“Warmacha kaspayqa imamantapas manam nispallaymi contestaq kani. Kunanmi ichaqa imanasqa mana ruwasqaymanta allinta entiendechini. Yachanim imam allin otaq mana allin kasqanmanta. Chaymi imamantapas tapuwaptinkuqa mana manchakuspay explicani.” (Anita.)

Diosta serviq mayqen runa hina kaytataq munawaq. Hinaspa piensay imawan sasachakusqaykipi chaynataq chayna sasachakuypi tarikuspan chay runa imata ruwananpaq kasqanpipas. (Yuyaymanay 2 Corintios 13:5 nisqanpi.)

“Imayna kasqaywanmi conformi kani, hukkuna imata rimaptinkupas manam hukmanyanichu. Amistadniykunaqa yaqa lliwmi respetawanku.” (Alicia.)

Hamuq tiempokunapi piensay. Escuelapi kaspaykiqa watakunallamantam otaq killakunallamantam juntakuy munasqayki warmakunawanqa manaña kuskañachu kanki.

“Escuelapi kaqmasiykunapa fotonkuta qawaspaymi wakinpataqa sutinkutapas yuyaniñachu. Ichaqa hikutawasqankuman hina ruwasqayta yuyarispaymi ñakakuni.” (22 watayoq Fernanda.)

Imayna contestanaykipaq preparakuy. Bibliam nin: “Yachaychikyá sapakamaman imaynam allin contestaytapas” (Colosenses 4:6).

“Tayta-mamaykum ñoqatawan ñañayta yanapawanku sasachakuykunapi piensanaykupaq hinaspam chayman hina imaynata contestanaykupaq ensayaniku. Chaywanmi preparasqa kaniku pipas mana allinta ruwanaykupaq hikutawaptinkuqa imaynata defiendekunaykupaq.” (Cristina.)