Amistadnikiwan parlachkaptiki celularnikiman mensaje chayamusuptikiqa, ¿imatam ruwawaq?

1. Amistadnikiwan parlastinchu mensajeta leenki.

2. Amistadnikitachu ninki mensajeta leenaykikama suyasunaykipaq.

3. Icha mensajeta chaymantaña leenaykipaq saqespachu amistadnikiwan hinalla parlanki.

Kimsanmanta, ¿mayqentaq allin kanman?

Amistadnikiwan parlastin celularpi mensajeta qellqaspaqa mana respetoyoq kasqaykitam qawachiwaq. Ichapas piensawaq: “Iskayninkum amistadniy kanku”, nispa. Amistadnikikuna kasqankuraykum iskayninta respetanayki. Chaywanqa manam nichkaykikuchu santotukuq otaq imapipas mana pantaq kanaykipaqchu, aswanqa cuentatam qokunayki amistadnikikunata mana respetaptikiqa qanmantam karunchakurunmanku.

Lliwmi munanchik respetasqa kayta. Berta * sutiyoq sipasmi nin: “Hukmanmi sientekuni ñoqawan parlastin celularninta qawapayaq amigawanqa. Ladonpi yanqapaq kasqaytam piensani”. Chayna amigataqa, ¿unaytachu Bertaqa aguantanqa?

Kaqmanta qawariy: “Imataq sasachasunkiman” nisqanta. Amistadwan parlastin mensajeta leeyqa mana respetoyoq kasqanpaqchá piensanki. Chaynaqa, ¿imatataq ruwawaq? ¿Amistadnikitachu ninki mensajeta leenaykikama suyasunaykipaq, icha amistadnikiwan hinalla parlanaykipaqchu mensajeta chaymantaña leenki?

Qawasqanchikman hinam mayqenta ruwanapaq tanteayqa sasam. Chaymi allinta tanteanaykipaq Bibliapi yachachikuykuna yanapasunkiman, huknin yachachikuymi nin: ‘Runamasiki qampaq allin kaqkunata ruwananta munaspaqa qampas paykunapaqyá allin kaqkunata ruway’, nispa (Lucas 6:31). Chayna nisqanqa, ¿imaynatam yanapasunkiman mensajeta apachiptiki?

Ama pitapas churmichaychu. Richarmi piñakuspan nin: “Wakinpiqa llumpay tutataña mensajeta apachimuwaspankum puñukuqta yanqapuni rikchachiwanku”. Sonqoykipi tapukuy: “¿Costumbrarunichu llumpay tutataña mensajekuna apachiyman?”, nispa. (Bibliam consejan: Eclesiastes 3:1.)

Respetasqaykita qawachiy imayna qellqasqaykiwan. Piwanpas parlaspaqa imayna rimasqanchiktam uyanchikwan otaq makinchikwan qawachinchik, qellqaptinchikmi ichaqa mana chaynachu. ¿Imaynatam respetasqaykita qellqaspayki qawachiwaq? Jaelmi nin: “Respetowan tapuy imaynallam kachkanki nispa, otaq niwaqmi ama hina kaspa gracias”, nispa. (Bibliam consejan: Colosenses 4:6.)

Tanteoyoq kay. Kaqmanta qawariy “Imataq sasachasunkiman” nisqanta. Imapas pasasqanrayku mensajeta contestanayki kaptinqa ichapas amistadnikita niwaq qellqanaykikama suyaykusunaykipaq. Ichaqa yaqa llapanpim mensajekunaqa mana chaylla contestanapaq. 17 watanpi kaq Anam nin: “Amistadnikiwan parlayta tukunaykikamam celularnikiqa hinallapi kanqa, paywan parlayta manaraq tukuchkaspa mensajeta qellqayta qallaykuptikiqa amistadnikiqa manapaschá suyasunkichu”. Achka amistadnikikunawan kaspapas chaynatam ruwanayki. 18 watanpi kaq Janam nin: “Ama sapa ratoqa mensajeta qellqaychu, chaynata ruwaspaqa amistadnikikunatam nichkawaq qamkunawan kanaymantaqa maypipas sapallay kayniymi aswan allinqa”, nispa.

Manaraq apachichkaspa imayna qellqasqaykipi reparay. ¿Entiendewanqachu ima niy munasqayta, icha huktachu piensarunqa imayna qellqasqaywanqa? Iman niy munasqaykita entiendenanpaq, ¿yanapanmanchu celularpi rikuriq dibujochakunata apachisqayki? 21 watanpi kaq Albertom nin: “Apachisqay asikunallapaq kaptinqa kusisqa uyachayoq kaq dibujochatawan apachiy. Manachayqa piñarachiwaqmi otaq kaminakuytam qallaykuwaqchik”, nispa. (Bibliam consejan: Proverbios 12:18.)

Qawasqanchikman hina pimanpas mensajeta apachispaqa respetowanmi qellqana.

Kaypi piensariy: Kuyakuq runaqa respetakuqmi. ¿Imaynatam kuyakuq kasqaykita qawachiwaq? Bibliam nin: “Pipas kuyakuyniyoqqa pacienciakuqmi, imapas qokuykuqmi, manam envidiosochu, manam alto tukuqchu, manam alabakuqchu, manam penqaypaq ruraqchu, manam kikillanpaq munaqchu, manam piñakuqchu”, nispa (1 Corintios 13:4, 5). ¿Yaqachu chayna nisqankunapi reparaspa qellqanaykipaq kallpanchakuwaq?