1, 2. ¿Pitam Jesusqa kunan tiempopi servichikun iñiyninchikpi yanapawananchikpaq, hinaspa imanasqam ancha allin chay sirviente pi kasqanmanta yachayninchikqa?

“TURIYKUNA, achkallaña kutipim yanapaqniy yachachikuykuna kamas necesitasqay tiempopi makiyman chayaramuwarqa”. Chayna anchata agradecekuspanmi huk iñiqmasinchik Betel wasiman qellqamuwarqaku. ¿Yaqachu qamtapas chay iñiqmasinchikta hina pasasurqanki? Arí, yaqa llapanchiktam chayqa pasawarqanchik. ¿Admirakunanchikchu chaymanta? Manamá.

² Iñiyninchikpi allin kananchikpaq tiempollanpi mikuy chaskisqanchikmi, qawachiwanchik lliw cristianokunapa Uman Jesucristo mikuy qowananchikpaq prometesqanta cumplisqanmanta. ¿Pitam Jesusqa servichikuchkan chay mikuyta qowananchikpaq? Jesus hamunanmanta rimaspanmi willakurqa ‘allin yuyayniyoq confianza sirvienteta’ servichikunanmanta, chaynapi “sirvientemasinkunata tiempollanpi mikuchinanpaq” (leey Mateo 24:45 *, 46, 47). * Kay sirvientetam Jesusqa servichikuchkan kay tukupay tiempokunapi cheqap qatiqninkunata mikuchichkaq hina iñiyninkupi yanapananpaq. Hinaptinqa, ancha allinmi chay sirviente pi kasqanmanta yachayninchikqa. Iñiyninchikpi hinaspa Dioswan amistadninchikpi allin kayninchikqa chay sirvientemantam penden (Mat. 4:4; Juan 17:3).

3. ¿Imatam pasaq watakunapi qellqanchikkunaqa nirqa confianza sirviente rikchanachiymanta?

³ Hinaptinqa, ¿imaynatam allin yuyayniyoq confianza sirvientemanta Jesuspa rikchanachisqanta entiendenanchik? Pasaq watakunapim qellqanchikkuna nirqa confianza sirvienteta Pentecostes 33 watapi sirvientemasinkunata mikuchinanpaq Jesus churasqanmanta. Qellqanchikkunaqa nirqataqmi chay sirvienteqa hanaq pachaman rinankupaq suyakuyniyoq lliw cristianokuna kasqanmanta. Nirqataqmi chay sapakama cristianokuna sirvientemasinkuna kasqanmanta hinaspa  1919 watapi chay confianza sirvienteta “tukuy kapuqninkunapiña” Jesus churarusqanmanta. Nirqataqmi chay ‘tukuy kapuqninkunaqa’ kay Pachapi Diosmanta willakuy apakunanpaq Diospa llaqtanpa tukuy servichikusqan kasqanmantapas. Ichaqa Bibliata alli-allinta estudiaspa, yuyaymanaspa hinaspa Diosta mañakuspam musyakururqaniku allin yuyayniyoq confianza sirvientemanta ñawpaqpi entiendesqaykuta cambianayku kasqanmanta (Prov. 4:18). Chaynaqa, ¿imaynatamá allin yuyayniyoq confianza sirvientemanta Jesuspa rikchanachisqanta lliw cristianokuna entiendenanchik? Qatiqninpiyá qawasunchik.

4-6. ¿Imanasqam nichwan confianza sirvientemanta Jesuspa willakusqan rikchanachiyqa, 1914 kaq watapa qepanman cumplikuyta qallaykusqanmanta?

⁴ Mateo 24 capitulopa wakin versiculonkunam qawachiwanchik allin yuyayniyoq confianza sirvientemanta Jesuspa rikchanachisqanqa, Pentecostes 33 watapi mana cumplikusqanta, aswanqa tukupay tiempokunapim cumplikunan karqa. Qawasun chaynata ninanchikpaq Biblia imayna yanapawasqanchikmanta.

⁵ Jesusqa ‘rikurimunanmanta hinaspa tukupay tiempokunamanta’ willakusqanpim, allin yuyayniyoq confianza sirviente rikchanachiymantapas rimarqa (Mat. 24:3, NM). Mateo 24:4-22 willakusqanqa iskay kutipim cumplikunan karqa. Punta kaqqa, 33 kaq watamanta 70 kaq watakuna ukupim cumplikurqa. Iskay kaqñataqmi kunan tiemponchikpi cumplikuchkan. ¿Chayraykuchu nichwan confianza sirvientemanta Jesuspa willakusqanpas iskay kutipi cumplikunanmanta? Manamá.

⁶ Mateo 24:29 versiculonmanta qallaykuspanmi Jesusqa astawan willakurqa kunan tiemponchikpi imakuna pasakunanmanta (leey Mateo 24:30, 42, 44). Llumpa-llumpay ñakariymanta rimaspanmi, Jesusqa willakurqa ‘puyupi tukuy atiyninwan hinaspa kanchariyninwan hamuchkaqta’ kay Pachapi llapa runakuna rikunankumanta. Hinaspanmi tukupay punchawkunapi kawsaqkuna rikchan-rikchanlla kananchikpaq kaynata nirqa: “Manam yachankichikchu ima punchawmi Señornikichik kutimunaytaqa [. . .], Diosmanta Hamuq Runaqa kutiramusaq mana piensasqaykichik horam”, nispa. * Qawasqanchikman hinaqa, tukupay tiempokunapi imakuna pasakunanmanta willakusqanpim Jesusqa rimarqa confianza sirvientemanta. Chaymi nichwan confianza sirvientemanta Jesuspa willakusqan rikchanachiyqa, 1914 kaq watapa qepanman cumplikuyta qallaykusqanmanta, chay watapimá tukupay tiempokuna qallaykurqa. ¿Imanasqam chayna kasqanmanta ninchik?

7. ¿Ima ancha allin tapukuymi karqa cosecha tiempo qallaykuptin, hinaspa imanasqa?

⁷ Piensariy Jesuspa kay tapusqanpi: “¿Pipunitaq allin yuyayniyoq confianza sirvienteqa?” Chay tapukuytaqa manamá punta tiempopi cristianokunaqa ruwanmankuchu karqa. Pasaq yachachikuypi qawamusqanchikman hinam, apostolkunaqa milagrokunata ruwaqku hinaspa hukkunapas paynintakama. Tukuy chaykunam sutillata qawachirqa paykunata Dios yanapasqanta (Hech. 5:12). Hinaptinqa manamá pi cristianopas tapukunmanchu karqa iñiqkunata pusananpaq pikunata Jesus servichikusqanmantaqa. Ichaqa 1914 watapiqa manamá chaynachu karqa. Chay watapiqa cosecha tiempom qallaykurqa. Chayraqmi chayaramurqa trigomanta cebadillata huñunapaq tiempo (Mat. 13:36-43). Ichaqa chay cosecha tiempo qallaykuptinqa, achkallaña pantay cristianokunam niqku cheqap cristianokuna kasqankuta. Hinaptinmi kay tapukuy karqa: ¿imaynatam runakunaqa reqsinmanku karqa pikuna trigo otaq akllasqa cristianokuna kasqankuta? Chaymanta yachanapaqmi Jesuspa rikchanachisqanpi willakusqan yanapawanchik. Hanaq pachaman rinankupaq suyakuyniyoq cristianokunam iñiyninkupi allin mikusqa hina kanmanku karqa.

8. ¿Imanasqam confianza sirvienteqa hanaq pachaman rinankupaq suyakuyniyoq cristianokuna kananku?

⁸ Confianza sirviente kanankupaqqa hanaq  pachaman rinankupaq suyakuyniyoq cristianokunam kananku. Paykunamantam Biblia nin reykuna hinaspa sacerdotekuna kasqankuta chaynataq Diospa sumaq ruwasqankunamanta willakunankupaq kamachisqa kasqankuta (1 Ped. 2:9, NM). Chayraykum nichwan chay reykuna hinaspa sacerdotekunaqa cheqap yachachikuyta iñiqmasinkunaman qonankumanta (Mal. 2:7; Apoc. 12:17).

9. ¿Hanaq pachaman rinankupaq suyakuyniyoq lliw cristianokunachu kanku allin yuyayniyoq confianza sirvienteqa?

⁹ ¿Allin yuyayniyoq confianza sirvienteqa hanaq pachaman rinankupaq suyakuyniyoq lliw cristianokunachu kanku? Manamá; manam lliw hanaq pachaman rinankupaq suyakuyniyoq cristianokunachu enteron Pachapi iñiqmasinkunamanqa qellqakunawan iñiyninkupi yanapanku. Arí, hanaq pachaman riq cristianokunamantam wakinkuqa kanku congregacionpi siervo ministerialkuna hinaspa ancianokuna. Paykunaqa congregacionpi hinaspa wasin-wasin rispankum yachachinku. Kasukunkutaqmi Diospa llaqtanpi punta apaqkunata, ichaqa manamá enteron Pachapi iñiqmasinkunaman qellqakunawan iñiyninkupi yanapaqkunachu kanku. Hanaq pachaman riq cristianokunamanta wakinkuqa kankutaqmi warmikunapas, paykunaqa manamá haykapipas qarikuna hinaqa congregacionpiqa yachachinmankuchu (1 Cor. 11:3; 14:34).

10. ¿Pitaq allin yuyayniyoq confianza sirvienteqa?

¹⁰ Hinaptinqa, ¿pitaq allin yuyayniyoq confianza sirvienteqa? Yuyarisun, ñawpaqpim Jesusqa aslla runakunawan achkallaña runakunaman mikuchirqa. Chaynaqa, chay confianza sirvienteqa kanku hanaq pachaman rinankupaq suyakuyniyoq cristianokunamanta wakillanmi, paykunam kay tiempokunapi enteron Pachapi lliw iñiqmasinkunaman mikuchichkaq hina iñiyninkupi yanapanku. Kay akllasqa cristianokunaqa tukupay tiempokuna qallaykusqanmantapacham, Brooklyn Betel wasipi huñulla Diospaq llamkarqaku. Chay allin yuyayniyoq confianza sirvientetam kunan tiempopi reqsinchik Jehova Diospa Llaqtanpi Punta Apaqkunawan. Chay confianza sirviente achka cristianokuna kaptinpas, Bibliaqa huk sirvientellamantam riman. Chayna kasqanmi qawakun Diospa Llaqtanpi Punta Apaqkuna huk runa hinalla imatapas chullallata tanteasqankupi.

11, 12. a) ¿Imakunapim confianza sirvienteqa 1914 watamanta qepaman churasqa kanan karqa? b) ¿Haykapim Jesusqa confianza sirvienteta churarqa sirvientemasinkunata mikuchinanpaq, hinaspa pikunatam akllarurqa?

¹¹ Rikchanachisqanpim Jesusqa qawachin confianza sirvienteta puntata sirvientemasinkunata tiempollanpi mikuchinanpaq patronnin churasqanmanta, chaymantañataqmi tukuy kapuqninkunapiña  nanachikunanpaq churarqa. Kay rikchanachiy tukupay tiempokunapi cumplikunanraykum nichwan 1914 wata qepaman cumplikunanmanta, chay watapim Rey hina Jesuspa rikurimuynin qallaykurqa.

¹² ¿Haykapitaq Jesusqa allin yuyayniyoq confianza sirvienteta churarqa sirvientemasinkunaman mikuchinanpaq? Chaymanta yachanapaqqa, puntata qawasun 1914 watapa qepanman imakuna pasakusqanmanta. Yachamusqanchikman hinaqa, chay watakunapim achkallaña pantay cristianokuna niqku cheqap cristianokuna kasqankuta. Paykunamanta, ¿pikunatam Jesusqa akllanan karqa allin yuyayniyoq confianza sirviente kanankupaq? Pita akllasqanqa sutillam qawakurqa Jesuswan Taytan templonta imayna tarikusqanta qawaq hamuptinku, chayqa karqa 1914 watamanta 1919 watapa qallariynin killakunakamam (Mal. 3:1). * ¡Maynatachá kusikurqaku Biblia estudiaqkunata tarimuspankuqa! Paykunamá qawachirqaku Jehova Diosta hinaspa Palabranta ancha kuyasqankuta. Chayna kaptinpas, wakinpiqa limpiasqa kaytam necesitarqaku. Chaymi paykunaqa saqekurqaku Jehova Dios astawan chuyanchananta (Mal. 3:2-4). Arí, chay Biblia Estudiaqkunam trigowan rikchanachisqa cheqap cristianokuna karqaku. 1919 watapim Jesusqa chay Biblia estudiaqkunamanta hanaq pachapaq wakin cristianokunata akllarurqa allin yuyayniyoq confianza sirviente kanankupaq, hinaspanmi sirvientemasinkunaman mikuchinanpaq churaykurqa.

13. ¿Pikunaraqtaq kanku sirvientemasinkunaqa, hinaspa imanasqa?

¹³ Chaynaqa, ¿pikunataq kanku sirvientemasinkunaqa? Paykunaqa kanku mikuyta chaskichkaq hina iñiyninkupi yanapasqa kaqkunam. Tukupay tiempokuna qallaykuptinqa, hanaq pachaman riq cristianokunallam karqaku sirvientemasinkunaqa. Tiempopa risqanman hinam ichaqa Jesuspa ovejan achkallaña runakunapas chay karqaku. Kunanqa llapallankum Jesucristota qatiq “chulla kanchallaña” kanku (Juan 10:16). Hanaq pachapaq cristianokunapas chaynataq kay Pachapi kawsanankupaq cristianokunapas, llapankum confianza sirvientepa “tiempollanpi” qosqan mikuyta chaskinku. ¿Imatam nichwan allin yuyayniyoq confianza sirviente kaq Diospa Llaqtanpi Punta Apaqkunamanta? Paykunapas iñiyninkupi allin kanankupaqmi sapakama yanapasqa kayta necesitanku. Chaymi sapakama reqsikunku wakin cristianokuna hina kaspanku sirvientemasinkuna kasqankuta.

14. a) ¿Ima hatun llamkaytam Jesusqa allin yuyayniyoq confianza sirvienteman qorqa, hinaspa imamantawanmi cuentallikun? b) ¿Imatam Jesus nirqa allin yuyayniyoq confianza sirvienteta? (Qaway “Sichu mana allin sirviente...” niqta.)

¹⁴ Jesusmi hatun llamkayta allin yuyayniyoq  confianza sirvienteman qorqa. Ñawpaq tiempokunapi sirvienteqa otaq mayordomoqa patronninpa lliw sirvientenkunamantam cuentallikuq (Luc. 12:42). Chaynallataqmi allin yuyayniyoq confianza sirvientepas Jehova Diospa lliw serviqninkunamanta cuentallikun. Cuentallikuntaqmi qollqeta imayna servichikunamanta, huñunakusqanchik wasikunamanta, predicaymanta, asamblea apakunanmanta hinaspa Diosmanta willakuypi otaq sapakama estudiasqanchikpi chaynataq huñunakuykunapi servichikusqanchik qellqakunamantapas. Arí, sirvientemasinkunaqa llapankum necesitanku confianza sirvientepa lliw qosqan yanapakuykunata.

15, 16. ¿Haykapitaq Jesusqa ‘tukuy kapuqninkunapiña nanachikunanpaq’ confianza sirvienteta churan?

¹⁵ ¿Haykapitaq Jesusqa ‘tukuy kapuqninkunapiña nanachikunanpaq’ confianza sirvienteta churan? Paymi nirqa: “Ancha kusisqam chay runaqa sichum patronnin kutimuspa chayna rurachkaqta tariykamuptinqa. Cheqaptapunim nikichik, patronninqa churaykunqa tukuy kapuqninkunapiña nanachikunanpaqmi”, nispa (Mat. 24:46, 47). Kaypi qawasqanchikman hinaqa, Jesusqa tukuy kapuqninkunapim churan kutiramuspanña hinaspa “chayna rurachkaqta” otaq mikuchichkaq hina lliw cristianokunata iñiyninkupi yanapachkaqta tariramuspan. Chaynaqa, manamá sirvientemasinkunata mikuchinanpaq churasqan watapichu kayqa karqa. Hinaptinqa, ¿imaynata hinaspa haykapim Jesusqa tukuy kapuqninkunapiña nanachikunanpaq confianza sirvienteta churan? Kay tapukuyta kutichinapaqqa, puntatam yachananchik haykapi kutimunanmanta hinaspa tukuy kapuqninkuna ima kasqanmanta.

¹⁶ ¿Haykapim Jesusqa kutimunqa? Confianza sirvientemanta rimasqanpa ñawpaqnin versiculokunapim riman Jesus ‘hamunanmanta’ otaq ‘kutimunanmanta’, chayqa kanqa tukupay tiempokunapi  mana allinkunata juzgananpaq tiempopim (Mat. 24:30, 42, 44). * Hinaptinqa, Jesuspa hamuyninqa otaq kutimuyninqa kanqa llumpa-llumpay ñakariy punchawkunapim.

17. ¿Imataq Jesuspa tukuy kapuqninkunaqa?

¹⁷ ¿Imataq Jesuspa ‘tukuy kapuqninkunaqa’? Jesusqa manamá kay Pachapi tukuy kapuqnillanmantachu rimachkarqa. Paymi nirqa: “Diosmi qowarqa tukuy atiyta hanaq pachapipas, kay pachapipas”, nispa (Mat. 28:18; Efes. 1:20-23). Hinaptinqa Diospa Gobiernonpas tukuy kapuqninmi, chaytam 1914 watapi Taytanmanta chaskirqa hinaspanmi hanaq pachaman riqkunawan kuska kamachimunqaku (Apoc. 11:15).

18. ¿Imanasqam Jesusqa kusikuywan tukuy kapuqninkunapiña confianza sirvienteta churaykunqa?

¹⁸ ¿Imatam nichwan kaypi yacharamusqanchikmanta? Llumpa-llumpay ñakariy punchawkunapi Juez hina Jesus hamuspanqa, confianza sirvientetam tarimunqa sirvientemasinkunaman tiempollanpi mikuy qochkaqta. Hinaptinmi Jesusqa kusikuywan tukuy kapuqninkunapiña nanachikunanpaq churaykunqa. Chayqa kanqa confianza sirviente kaqkuna hanaq pachapi tarikuspanku Jesuswan kuska rey kaptinkum.

19. ¿Hanaq pachaman riq wakin cristianokunamanta astawanchu confianza sirvienteqa premiota chaskin?

¹⁹ ¿Hanaq pachaman riq wakin cristianokunamanta astawanchu confianza sirvienteqa premiota chaskin? Manamá. Aslla runakuna huk premiota chaskinankupaq prometesqa kaptinkupas chay premiotaqa huk runakunapas chaskiytam atinmanku. Piensariy Jesus wañuchisqa kananpaq kachkaptin 11 apostolninkunaman nisqanpi (leey Lucas 22:28-30). Jesusmi chay aslla runakunaman prometerqa gobiernonpi paywan kuska reykuna kanankupaq. Ichaqa tiempopa risqanman hinam, Jesusqa nirqa hanaq pachaman lliw riqkuna otaq 144.000 cristianokuna paywan kuska kamachimunankumanta (Apoc. 1:1; 3:21). Chaynallataqmi Mateo 24:47 nisqanpipas Jesusqa tukuy kapuqninkunapi nanachikunanpaq as runakunallaman prometerqa. Ichaqa, lliw 144.000 cristianokunam Jesuswan kuska hanaq pachapiwan kay Pachapi kamachinqaku (Apoc. 20:4, 6).

20. ¿Imanasqam Jesusqa confianza sirvienteta churarurqa, hinaspa imatam ruwayta munanchik?

²⁰ Jesusqa ñawpaqpi achkallaña runakunaman aslla runakunawan mikuchisqanman hinam, kunan tiempopipas confianza sirvientewan ruwachkan. Chay confianza sirvientetam kay tukupay tiempokunapi churarqa lliw ovejankuna “tiempollanpi” mikuchisqa kanankupaq. ¡Anchatamá agradecekunchik! Chaynaqa, tukuy sonqonchikwanyá allin yuyayniyoq confianza sirvienteta yanapasun (Heb. 13:7, 17).