Francia nacionpi Mulhouse llaqtapim nacerqani. Wiñasqay lawpiqa runakunam llumpayta maqanakuqku. Chaymi warma kaspayqa qawaq kani ayllupuralla maqanakusqankuta. Aylluypiñataqmi warmikunataqa llumpayta usuchiqku. Aylluykunam niwaq warmikunaqa wasipi yanukunallankupaq hinaspa qusantawan wawankunata uywanallanpaq kasqanta.

Chunka wataypi kachkaptiymi tragoman qukurusqanrayku taytay wañukurqa. 5 wata pasaytañataqmi huknin wawqiy wañurachikurqa, rikurqanitaqmi aylluykuna maqanakuspanku huk kaqninta wañurachisqankuta, chaywanmi mancharisqa qiparurqani. Wakin aylluykunam yachachiwarqa cuchillotawan pistola hapiyta chaynataq imapas kaptinqa runamasiyta maqanaypaq. Piwanpas maqanakuytam munaq kani. Enteron cuerpoypim mana chinkaq marcakunata ruwarachikurqani hinaspam trago tomayllamanña wischukuykurqani.

Sapa punchawmi 16 wataypi kachkaspay 10 utaq 15 botella cervezata tomaspay droga malliyta qallaykurqani. Chaykunata rantinaypaqmi suwakuq kani hinaspa runakunapa wischusqanta rantikuq kani. 17 wataymantapacham suwakusqaymanta hinaspa runata maqasqaymanta 18 kutikama presochawarqaku.

Sapa punchawmi 20 wataypiqa marihuana quramanta ruwasqa 20 cigarrota pitaq kani hinaspa drogakuq kani. Chaymi achka kutipi yaqalla wañururqani. Drogata rantikusqayraykum pistolayuq puriq kani, chaymi huk kutipi huk runata valearuptiy wiqaw watakunpa fierrollanpi hapirurqa. 24 wataypi kachkaptiy mamay wañukuptinmi sunquyqa astawan rumiyarurqa. Runakunaqa rikuruwaspallankum piña toromantapas hina ñuqamanta ayqikuqku. Yaqa sapa semana tukuytam runakunawan maqanakusqayrayku guardiakuna hapiruwaq, wakinpiñataqmi hospitalman apawaqku heridaykunata siranankupaq.

Casarakururqanim 28 wataypi, ichaqa warmichaytam qaqchakachaspay maqaq kani. Manam paypaq tiempochakuqchu kani aswanmi suwasqay alhajakunallata quq kani kusisqa kananta piensaspay. Hinaptinmi warmichayqa qunqayllamanta testigokunawan biblia estudiayta qallaykurqa, manañam cigarrota pitarqañachu, nitaq chaskiwaqñachu suwasqa qullqitapas hinaspam alhajakuna qusqaytapas kutiykachiwarqa. Manamá munarqanichu biblia estudianantaqa chaymi piñasqa tarikuspay cigarrowan pukuykuq kani hinaspam runakunapa qayllanpi pinqaypi churaq kani.

 Huk tutam llumpay machasqa kaspay yachasqayku wasita kañaykurqani hinaptinmi warmichayqa 4 watachayuq warmachaytawan salvaykuwarqa. Mallaqyaruspaymi chay ruwasqaymanta llumpayta llakikurqani. Piensarqanim Diosqa mana pampachawananta. Yuyarirurqanim mana allin runakunaqa wiñaypaq kañasqa kanankumanta sacerdotepa niwasqanta. Doctorpas niwarqam: “Yanqañam qamqa kanki, hina chaynam wañunkipas”, nispa.

Wasi kañasqay qipallamanmi suegroykunapa wasinman astakurqaniku. Chaypim testigokunaqa warmichayta watukamurqaku hinaptinmi paykunata tapurqani: “¿Diosqa pampachaykuwanmanchu?”, nispay. Chaymi 1 Corintios 6:9-11 nisqanta leeykapuwarqaku. Chaypim nin ima ruwaykunata Dios chiqnisqanmanta hinaspa huchasapa runakunatapas Dios pampachasqanmanta. Chay leesqaymi kallpanchawarqa mana allin vidayta saqinaypaq. Chaymantapas Dios kuyawasqanta qawachiwanankupaqmi leepuwarqaku 1 Juan 4:8 nisqanta. Chayta uyarisqaymi kallpanchawarqa, hinaptinmi nirqani sapa semana iskay kutita bibliamanta yachachiwanankupaq hinaspam huñunakuyman riytapas qallaykurqani. Diostam mana amiyta mañakullaq kani.

Huk killallaraq bibliata estudiachkaspaymi tanteakururqani drogatawan trago tomayta saqinaypaq. Saqiyta qallaykuspaymi unqururqani, manam puñuytapas atiqchu kani, umaypas llumpaytam nanawaq, wiksaywanpas ñakariqmi kani, calambrepas hapiwaqmi. Ichaqa Diosmi apostol Pablota hina yanapaykuwarqa, Pablom nirqa: “Dios kallpata quwaptinmi tukuy imata ruwanaypaq kallpayuq kani”, nispa (Filipenses 4:13, NM). Cigarro pitaytapas saqirurqanim (2 Corintios 7:1).

Bibliamanta yachasqaymi mana allin ruwaykunata saqinaypaq chaynataq aylluywan sumaq kawsakunaypaq yanapawarqa. Warmichaytaqa kuyakuywanñam rimapayarqani “ama hina kaspa”, “gracias”, nispaña. Warmaypaqpas tiempochakuqñam kani. Bibliata wata estudiaruspaymi warmichay hina Jehova Diospa testigon kanaypaq bautizakurqani.

Bibliamanta yachasqayraykum kawsakuchkaniraq. Mana testigo kaq aylluykunam niwanku: “Bibliapa nisqanta mana kasukuspaykiqa ñam drogakusqaykipi utaq maqanakusqaykipi wañuruwaqña karqa”, nispanku.

Qusakuna hinaspa taytakuna imayna kananmanta bibliapa nisqanta kasukusqaymantapacham sumaqtaña kawsakuniku (Efesios 5:25; 6:4). Kuskañam imatapas ruwaniku. Manañam piensanichu warmichayqa wasipi yanukunallanpaq kasqantaqa, aswanmi yanapani Diosmanta willakunanpaq. Paypas yanapawanmi tukuy ima ruwayniykunapi chaynapi iñiqmasiykunata yanapanaypaq.

Diosqa kuyakuqllaña kasqanmanta yachasqaymi yanapawarqa allintaña kawsakunaypaq. Manam iskayrayanichu bibliapa yachachisqankuna pi runatapas yanapananmantaqa, ñuqaqa munanim ñuqa hina mana allin kawsakuqkunaman Jehova Diosmanta willayta. Ñuqatapas yanapawarqam runamasiykunata kuyakuywan qawanaypaq. Yanapawarqataqmi allinta kawsakunaypaqpas.