Diosqa munanmi ima llakinchiktapas payman willananchikta. Ñawpaq tiempopi Diosta yupaychaq Davidmi nirqa: “Mañakusqaykutam qamqa uyarinki, llapallan runakunam qanman asuykamusunki”, nispa (Salmo 65:2). Ichaqa, ¿imaynatam Diosta mañakuchwan uyariwananchikpaq hinaspa yanapaykuwananchikpaq?

Salmo 62:8 nin: ‘Paypa qayllanpi sunquykita kichariy’, nispa. Diosta mañakuspaqa sunqunchikpi tukuy ima llakichiwasqanchiktayá willakusun. Chayta ruwasqanchikwanmi Diosqa anchata kusikun.

Diostaqa ninkum “señorlláy”, “taytalláy”, nispanku. Chaynata niptinkupas Diosqa sutiyuqmi. Kikinmi nirqa: “Ñuqam kani Jehova Dios, chaymi sutiy”, nispa (Isaias 42:8, TNM). Arí, Diospa sutinqa Jehovam. Chay sutiqa yaqa qanchis waranqa kutikamam bibliapi rikurin. Ñawpaq tiempopi Diosta yupaychaqkunapas Diostam sutinmanta qayakuqku. Abrahanpas nirqam: “Jehova Dioslláy [...] yapatawanmi tapuyta munachkayki”, nispa (Genesis 18:30, TNM). Ñuqanchikpas Diosta mañakuspaqa sutinmantam qayakunanchik.

Diosqa ima rimaypiña mañakuptinchikpas uyariwanchikmi. Payqa sumaqtam yachan imayna tarikusqanchikta. Bibliam nin Diosqa mana pimanpas sayapakuq kasqanta, hinaspa lliw nacionkunapi respetaqnin chaynataq allin ruwaq runakunata chaskisqanmanta (Hechos 10:34, 35).

Diosqa yanapawasunmi payta mañakuptinchikqa, ichaqa astawan yanapawananchikta munaspaqa paypa nisqantam kasukunanchik. Chaymantayá qatiqninpi yachaykusunchik.