¿Jesusqa tukuy atiyniyoq Dioschu?
¿Jesusqa tukuy atiyniyoq Dioschu?
Runakunam ninku:
▪ “Arí, Jesusqa tukuy atiyniyoqmi.”
▪ “Jesucristoqa kikin Diosmi”, nispa.
Jesusmi nirqa:
▪ “Cheqapta kuyawaspaykichikqa kusisqam kawaqchik Taytaman risqaywanqa, payqa ñoqamantaqa aswan atiyniyoqmi”, nispa (Juan 14:28). Jesucristoqa reqsikurqam Taytan aswan atiyniyoq kasqanta.
▪ “Richkanim Taytaypata, qamkunapapas Taytaykichikpata, ñoqapa Diosniyman, qamkunapapas Diosnikichikman”, nispa (Juan 20:17). Jesusqa manam haykapipas Dios kasqantaqa nirqachu. Aswanmi nirqa Diosqa sapaq kasqanta.
▪ “Ñoqaqa manam kikillaymantachu rimani, kachamuwaqniy Taytaymi kamachiwarqa imam rimarinaytaqa chaynataq imam yachachinaytaqa”, nispa (Juan 12:49). Jesusqa Taytanpa nisqallantam yachachirqa, manam kikinpa piensasqantachu.
JESUSQA reqsikurqam Diospa churin kasqanta, manam tukuy atiyniyoq Dios kasqantachu. Dios kaspanqa, ¿pitataq Jesusqa kay Pachapi kachkaspan mañakunman karqa? (Mateo 14:23; 26:26-29.) Chaynaqa, ¿mañakuq tukuchkarqachu? Manamá.
¿Imatam Jesusqa nirqa iskay qatiqninkuna Munaychakuyninpi sapa lawninpi tiyaykunankupaq mañakuptinku? Paymi nirqa: “Alleq lawniypi otaq ichoq lawniypi tiyaykuyqa manam ñoqallamantachu, chayqa kachkan Taytaypa akllasqankunapaqmi”, nispa (Mateo 20:23). ¿Llullakuchkarqachu mañakusqankuta qonanpaq mana atiyniyoq kasqanta nispan? Manam. Aswanqa reqsikurqam Taytallan chaykunamanta tanteananpaq derechoyoq kasqanta. Chaymantapas nirqataqmi paypas nitaq angelkunapas Taytanpa yachasqantaqa mana llapanta yachasqanta (Marcos 13:32).
Hinaptinqa, ¿kay Allpapi kaspallanchu Diosta kasukunman karqa? Manam. Bibliaqa willawanchiktaqmi wañukusqanmanta kawsarimuspanpas Taytanman sujetakusqanta. Apostol Pablom nirqa: ‘Diosqa Cristopa umanmi’, nispa (1 Corintios 11:3). Bibliaqa nintaqmi hamuq tiempopi, ‘Cristo tukuy imata munaychakuruspan paypas Taytanpa munaychakusqan kananmanta [. . .]. Chaynapim Diosña tukuy imakunapipas [. . .] munaychakunqa’ (1 Corintios 15:28).
Chaynaqa, Jesusqa manam tukuy atiyniyoq Dioschu. Chaymi Taytanta achka kutipi nirqa ‘Diosniymi’ nispa (Apocalipsis 3:2, 12; 2 Corintios 1:3, 4). *
[Willakuy]
^ par. 12 Kay yachachikuykunamantam astawan yachanki, ¿Imatapunim Bibliaqa yachachin?, libropa 201-204 paginankunapi. Kay libroqa Jehová Diospa testigonkunapa rurasqanmi.
[9 kaq paginapi suti rikuylla kaq willakuy]
Jesusqa nirqam Taytanpa yachasqankunata paypas nitaq angelkunapas mana llapanta yachasqanta