¿Imaynataq kananku kunan tiempopi cristianokunaqa?

‘MANAM kay pachallapaqchu kani’ nisqanwanmi Jesusqa sutillata qawachirqa gobiernokunaman mana chaqrukusqanta. Discipulonkunatapas nirqam ‘mana kay pachallapaq’ kasqankuta (Juan 15:19; 17:14). Chaynam cheqap cristianokunapas, paypa rurasqanta qatipakuspankum gobiernokunamanqa mana chaqrukunkuchu. Hinaptinqa, ¿imanasqataq cheqap cristianokunaqa mana chaqrukunankuchu gobiernokunawan?

1. Runaqa manam kamachiyta atinchu. Bibliam sutillata kayta qawachiwanchik: runaqa manam unanchasqachu karqa kikillanku kamachikunankupaqchu. Profeta Jeremiaspas ninmi: “Yachanim runaqa mana kikillanmanta purisqanta”, nispa (Jeremias 10:23).

Imaynam runa mana pawaq kananchikpaqchu unanchasqa karqanchik chaynataqmi mana unanchasqachu karqanchik kikillanchik kamachikunapaqpas. Yachayniyoq David Fromkin runam gobiernaqkuna mana kamachiy atisqankumanta kaynata nin: “Gobiernopi kaqkuna pantaq kasqankuraykum allin ruray munasqanku mana allinpi tukunman. Paykunaqa pisi atiyniyoqmi kanku”, nispa (The Question of Government). Chayraykuchá Bibliaqa consejawanchik kamachiqkunapiqa mana confiananchikpaq (Salmo 146:3).

2. Mana allin angelkunaqa atiyniyoqmi kanku. Jesusman Satanas kay pachapi nacionkunata munachiptinqa, Jesusqa manam nirqachu gobiernokuna Diablopa makinpi mana kasqantaqa. Aswanqa huk kutipim nirqa Satanas ‘kay pachapi kamachikuq’ kasqanmanta. Apostol Juanpas nirqataqmi ‘kay pachapi mana allin kaqkunaqa Diablopa makinpiña kasqanmanta’ (Juan 14:30; 1 Juan 5: 19). Pablopa qellqasqanman hinaqa “tutayaypi kamachikuqkunapa” otaq “altokunapi mana allin espiritukunapa contranpim” peleachkanchik (Efesios 6:12). Hinaptinqa, kay pachapa kamachiqninkunaqa mana allin angelkunam kanku, paykunam tukuy mana allinkunata rurachkanku. ¿Imaynatam kayqa cristianokunata yanapan gobiernokunaman mana chaqrukunanpaq?

Kaywan rikchanachisun: taksa botekunam kallpasapa mayuwan kayman-wakman apachikunku, chaynallataqmi runakunapa gobiernonkunapas mana allin angelkunapa munaychakusqan kachkanku. Imaynam chay botechakunata  manejaqkuna kayman-wakman mana apachikunankupaq kallpanchakuspankupas hinalla apachikunku chaynam gobiernaq runakunapas mana allin espiritukunapa nisqantam kasukunku mana cuentata qokuchkaspankupas. Kay demoniokunaqa kallpanchakunku runakunata llumpayta ñakarichinankupaqmi (Apocalipsis 12:12). Chayraykum Satanasmanta otaq demonionkunamantapas aswan atiyniyoq Jehová Dioslla kay mana allinkunataqa chinkachiyta atinman (Salmo 83:18; Jeremias 10:7, 10).

3. Cheqap cristianokunaqa Diospa Gobiernollantam yanapanku. Jesuswan qatiqninkunaqa yacharqakum Diosqa tanteasqan tiempopi hanaq pachamanta kay pachata kamachimunanpaq Gobiernota hatarichinanmantaqa. Jehová Diosmi nombrarun Jesucristota chay Gobiernopa reynin kananpaq (Apocalipsis 11:15). Chay Gobierno llapallan runakunapaq allinkuna apamunanmanta yachasqanraykum Jesusqa ‘Diospa munaychakusqanmanta allin noticiakunata willakurqa’ (Lucas 4:43). Yachachirqataqmi qatiqninkunatapas kaynata mañakunankupaq: “Munaychakusqayki hamuchun”, nispa. Chay Gobierno kamachiptinmi Diospa munaynin kay pachapi rurakunqa hanaq pachapi kunan rurakusqanman hina (Mateo 6:9, 10).

¿Imataq pasanqa runakunapa gobiernonkunawanqa? Bibliapa nisqanman hinam ‘kay pachapi llapallan reykunaqa’ ñutupasqa kanqaku (Apocalipsis 16:14; 19:19-21). Chayraykum, Diospa Gobiernollan mana allinkunata tukuchinanta creeqkunaqa mana confiakunankuchu runakunapa gobiernonpiqa. Sichu chay gobiernokunapi confiakuspaqa Diospa enemigonmi rikuriruchwan.

¿Cheqap cristianokuna gobiernokunaman mana chaqrukusqankuwanchu nichkanchik runamasinkupi mana interesakusqankuta? Kay tapukuymantam qatiqninpi yachasunchik.

[7 kaq paginapi suti rikuylla kaq willakuy]

Jehová Diospa testigonkunaqa Diospa Gobiernollanta yanapasqankuraykum kay pachapi gobiernokunamanqa mana chaqrukunkuchu