Diospa Palabranmanta yachay

¿Imatam angelkunawan demoniokuna ruranku?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Pikunataq angelkunaqa?

Angelkunaqa mana rikuy atinam, runakunamantaqa aswan atiyniyoqmi kanku hinaspapas hanaq pachapim yachanku. Diospas mana rikuy atinam, paymi angelkunata unancharqa manaraq kay Pachata unanchachkaspan (Job 38:4, 7; Mateo 18:10). Jehová Diospa muyuriqninpim kachkan millonnintin kasukuq angelkunaqa. (Leey Salmo 103:20, 21; Apocalipsis 5:11.)

2. ¿Yanapawanchikchu angelkunaqa?

Ñawpaq tiempopim, angelkunaqa Diosman sonqo Lotta yanaparqa. Diosqa Lotpa yachasqan llaqtata puchukachinanpaqmi tantearurqa, chaypi runakuna mana allin kasqankurayku. Iskay angelkunam Lotman hinaspa familianman willarqa ayqekunankupaq. Wakinkum chay nisqanmanta burlakuspanku mana kasukurqakuchu. Lot hinaspa warmi churinkunam ichaqa kasukurqaku, angelwan Diospa willachisqanta hinaspa salvakurqaku. (Leey Genesis 19:1, 13-17, 26.)

Bibliaqa willawanchikmi kunanpas angelkuna yanapawasqanchikmanta. Paykunaqa Diospa Gobiernonmanta willakuqkunatam yanapanku (Mateo 24:14). Kay willakuyqa manam allin noticiallamantachu aswanqa Diospa piñakuyninmantawanmi. Manam Lotpa tiemponpi hinachu qawananchik, paykunaqa yanqalla kasqantam piensarqaku, Diosqa angelninkunawanmi willawachkanchik. (Leey Apocalipsis 1:1; 14:6, 7.)

Chaymantapas Diosqa angelninkunatam servichikun sasachakuypi tarikuptinchik kallpanchawananchikpaq, Jesusta kallpanchasqanman hina. (Leey Lucas 22:41-43.)

Ñam Jehová Diosqa servichikunqaña angelninkunata mana allin ruraq runakunata chinkachinanpaq. ¡Mayna allinmi chayqa lliw runakunapaq! (Leey 2 Tesalonicenses 1:6-8.)

  3. ¿Pikunataq demoniokunaqa hinaspa imatam ruranku?

Diosta mana kasukuq runakuna hinam, hanaq pachapipas angelkunaqa Diospa contranpi rikurirurqaku (2 Pedro 2:4). Chay mana kasukuq angelkunaqa demoniokunam. Kamachiqninñataqmi Satanas Diablo, paywan demoniokunam runakunata pantachinku. (Leey Apocalipsis 12:9.)

Diabloqa mana allin negociokunata, kamachiqkunata hinaspa pantay religionkunatam servichikun runakunata Diosmanta karunchananpaq. Chaymi Satanaspa huchanrayku kunanqa maqanakuy, ñakariy hinaspa mana allin ruraykunapas kachkan. (Leey 1 Juan 5:19.)

4. ¿Imaynatam demoniokunaqa runakunata pantachin?

Satanasqa runakunatam engañan wañusqakuna kawsaq runakunawan parlay atisqanta piensachispan. Bibliam ichaqa nin wañusqakunaqa mana imapas ruray atisqankuta (Eclesiastes 9:5). Chaymi demoniokunaqa runakunata engañananpaq wañusqakunapa econta yachapayanku (Isaias 8:19). Servichikuntaqmi espiritistakunata, adivinaqkunata hinaspa chayman rikchakuq ruraykunatapas. Bibliaqa niwanchikmi chay ruraykunata qepanchanapaq hinaspa demoniokunapa rurasqankuwan chaqrusqa kaqkunata mana hatallinapaq. (Leey Deuteronomio 18:10, 11; Hechos 19:19.)

Diosta kuyaspanchikqa kay mana allin espiritukunataqa manam manchakunanchikchu. Bibliata estudiaspanchik hinaspa kasukuspanchikqa Diablomantam karunchakuchkanchik hinaspa Diosman asuykuchkanchik. Jehová Diosqa aswan atiyniyoqmi demoniokunamantaqa, hinaspapas sasachakuypi tarikuptinchikqa angelninkunawanmi kallpanchawasun. (Leey Salmo 34:7; Santiago 4:7, 8.)

Astawan yachayta munaspaqa ¿Imatapunim Bibliaqa yachachin? libropa 10 capitulonta qaway, Jehová Diospa testigonkunapa rurasqanmi.