Janetmi nin: “Taytay wañukusqan qipallatam qusayqa huk warmiyuq kasqanta niykuwarqa. Huk punchawmi, upallalla ripukurqa llapa pachanta apakuspan, iskay warmaytawan ñuqatam saqiruwarqaku”, nispa. Llamkayta Janet tariruspanpas qullqi chaskisqanwanqa manam haypachikurqachu. Manamá qullqimanta llakikuyllawanchu karqa, kikinmi nin: “Llumpay hukmanyasqam tarikurqani sapallayña tukuy imata ruwanay kasqanrayku. Ñuqam huchayuqpaq hapikuq kani warmaykunaman ima munasqanta mana qusqayrayku. Hukmanyanitaqmi runakuna imayna qawawasqankuta piensaspay. Ichapas piensanku mana kallpanchakusqayrayku qusaywan rakinakusqaykuta”, nispa.

Janetqa Diosta mañakuspanmi llakinkunataqa atipan, chaymi sapallanqa mana tarikunchu. Ninmi: “Tutakunam astawan llumpay hukmanyasqa tarikuni. Mana allin pensamientokunallañam umayman hamun. Ichaqa Diosta mañakuyniywan bibliata leeyniymi puñunaypaq yanapawan. Filipenses 4:6 hinaspa 7 nisqanmi anchata kallpanchawan, ninmi: ‘Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta quychik. Hinaptinqa Diosninchikmi hawkayachisunkichik runakunapa mana entiendey atinan hawkayaywan. Chaynapim imamantapas mana preocupakunkichikchu nitaq llakikunkichikchu’, nispa. Sapa tuta Jehova Diosta mañakusqayraykum hawkayayta tariruni”, nispa.

Ancha riqsisqa yachachikuyninpi Jesuspa nisqanmi yanapawachwan, imapas llumpayta hukmanyachiwaptinchik atipanapaq. Nirqam: ‘Manaraqpas mañakuchkaptikichikmi Dios taytaykichikqa yachanña imam necesitasqaykichikta’, nispa (Mateo 6:8). Chayna kaptinpas, Diosqa munanmi mañakunanchikta. Arí, Diosman asuykunapaqqa payta mañakuymi imamantapas aswan allinqa. ¿Chaywanqa  imatataq haypasun? Bibliam nin: “Paypas asuykusunkichikmi”, nispa (Santiago 4:8).

Diosqa manam llakinchiktaqa uyariyllachu-uyarin, aswanqa ‘pipapas mañakusqanta uyariq’ kaspanmi llapallan paypi hapipakuqkunataqa waqaychan (Salmo 65:2). Chayraykum Jesusqa qatiqninkunata yachachirqa ‘mana pisipaspa tukuy tiempopi Diosta mañakunankupaq’ (Lucas 18:1). Chaynaqa, amayá saqisunchu Diospa yanapakuyninta mañakuytaqa, payqa yanapawasunpunim. Amataqyá haykapipas iskayrayasunchu chaymantaqa. Sapa kuti mañakuspanchikqa, tukuy sunqunchikwan paypi iñisqanchiktam qawachisunchik (1 Tesalonicenses 5:17).

Diospi iñiyniyuq kanapaqqa paytam allinta riqsinanchik (Juan 17:3). Bibliata estudiaspanchikmi yachasunchik imayna kasqanta hinaspa ima piensasqantapas. Yachasuntaqmi sapakamata kuyawasqanchiktapas. Ichaqa manam sutin riqsiyllachu. Aswanqa amistadninchikta hinam sumaqta riqsinanchik. Piwanpas allin amistadqa kasunchik unay tiempo riqsinakuspanchikmi, manam chay riqsinakusqanchik punchawllachu. Chaynallataqmi Diospi iñiyninchik hinaspa paypi hapipakuyninchikqa wiñanqa astawan riqsiptinchik, munasqaman hina kawsaptinchik hinaspa yanapawasqanchikta musyakuptinchik (2 Corintios 10:15; Juan 8:29). Kayna iñiyniyuq kaspanmi Janetqa llumpay hukmanyasqa kayninta atipachkan.

Janetmi nin: “Jehova Dios tukuy tiempo waqaychawasqankuraykum astawan paypi iñini. Mana atipanapaq hina sasachakuykunawanmi tarikurqaniku. Achka kutitam Diosta mañakuq kani, hinaptinmi payqa mana haykapipas piensasqayman hina yanapaykuwarqa. Diosta agradecekunaypaq mañakuspaymi tukuy ima yanapawasqanpi yuyaymanani. Yanapakuyninqa qunqayllatam chayamun, wakinpiqa imapas pisipuwaqniyraqmi chayaramuq. Chaymantapas, Diospi iñiq allin amistadkunatam tariruni. Paykunaqa chayllam sasachakuyniypi yanapawanankupaq kachkanku, hinaspapas warmaykunamanmi allin kaqkunata yachachinku”, nispa. *

Nintaqmi: “Kunanmi ichaqa yachani Malaquias 2:16 nisqanpi Jehova Dios imanasqa rakinakuyta chiqnisqanta. Mana huchayuq kaqmi llumpaytaqa ñakarin pierdekuqmantaqa. Achka wataña pasaruptinpas sapallaymi wakinpiqa tarikuni. Chayna tarikuspaymi hukkunata yanapani, chay ruwasqaymi yanapawan qunqanaypaq”, nispa. Kaynata ruwaspanmi Janetqa bibliapa nisqanman hina mana karunchakunchu runamasinmanta (Proverbios 18:1). *

Janetqa hinallam nin: “Kusikunim mana piyniyuqkunapa taytan Dios kasqanmanta hinaspa juiciopipas viudakunata defiendeq kasqanmanta yachaspay. Payqa manamá haykapipas qusay hinaqa saqiwanqachu”, nispa (Salmo 68:5). Janetqa yachanmi Diosqa mana allinkunawan mana llakichiwananchikmanta. Aswanqa, payqa yachaytawan hatun atiynintam quwanchik llumpay hukmanyayta atipanapaq (Santiago 1:5, 13; 2 Corintios 4:7).

Ichaqa ¿imatam ruwachwan wañuy patanpi tarikusqanchikrayku llumpay hukmanyasqa kaspanchikqa?