Rimasqanku: Jehova Diospa testigonkunaqa manam munankuchu doctorkunawan hampichikuyta, yanqapaq kasqanta piensaspanku.

 Imam kaq: Testigokunaqa imawanpas unquspaykuqa kallpanchakunikum allin kaq doctorkunawan hampichikunaykupaq. Kikiyku utaq aylluyku operacionman yaykunan kaptinqa maskanikum yawarta mana churaspalla operay yachaq doctorkunata. Anchatam kusikuniku yawarta mana churaspa operanankupaq aparatokunata ruwasqankumanta. Manam testigokunallachu chaynataqa operachikunku, hukkunapas yawarta mana churachikuspallam operachikunku. Chaynataqa operachikunku yawarpi kaq unquykunawan mana hapirachikunankupaqmi.

 Rimasqanku: Jehova Diospa testigonkunaqa Diosta mañakuspallam sanoyayta munanku.

 Imam kaq: Ñuqaykuqa manam haykapipas yachachinikuchu Diosta mañakuspalla sanoyaymantaqa.

 Rimasqanku: Achka qullqipaqmi yawarta mana churachikuspa operachikuyqa.

 Imam kaq: Achka qullqipa chanin kaptinpas yawarta mana churachikuspalla operachikuyqa allinpaqmi, yawarta churarachikuspa ñakariymantaqa a.

 Rimasqanku: Sapa watam achka testigokuna chaynataq warmachankupas yawarta mana churachikusqankurayku wañunku.

 Imam kaq: Chayna rimasqankuqa llullam. Kay tiempopi doctorkunaqa sasa operana kaqkunatapas yawarta mana churaspallam operayta atinku. b Yawarta mana churachikuspalla operachikuqkunaqa allintam sanoyanku yuyayniyuqpas chaynataq warmachakunapas. c Ichaqa yawarta churachikuspa utaq mana churachikuspa operachikuqkunapas wakinpiqa wañunkum.

 Jehova Diosta kasukusqaykuraykum. Bibliapim kamachin yawarta mana mikunapaq chaymi yawartaqa mana churachikunikuchu (Genesis 9:4; Levitico 17:10; Deuteronomio 12:23; Hechos 15:28, 29). Chaymantapas, Diospaqqa yawarninchikpim kawsayninchik kachkan (Levitico 17:14). Kawsakuy quwaqninchik Jehova Diosta kasukusqaykuraykum yawartaqa mana servichikunikuchu.

 Ñawpaq watakunapiqa doctorkunam piensarqaku yawarta mana churaspa operayqa sasallaña kasqanta. Chaymi niqku yawarta mana churachikuspalla operachikuy munaqqa wañuy maskasqanmanta. Kay watakunapiqa manaña chayna piensasqankumantam 2004 watapi doctorkunapaq qillqapi nirqa: “Yawarta mana churaspalla testigonkunata operasqanchikman hinam hamuq watakunapiqa runakunata operasunchik”, nispa d. 2010 watapipas doctorkunapaq huk qillqapim nirqa: “Yawarta mana churaspalla testigokunata imaynata operasqanchikqa yanapawasunmi hukkunatapas allinta operanapaq”, nispa (Medicina transfusional).

 Wara-waranqantin doctorkunam enteron pachapi sasa operanapaq kaqkunata operachkanku yawarta mana churaspalla. Mana testigo kaqkunapas munankum yawarta mana churachikuspalla operachikuyta, chaynatam operachikuchkanku mana ancha qullqiyuq kaqkunapas.