2 Crónicas 6:1-42
6 Jinan Salomonqa nirqan: “Jehová Diosníy, qanqa nirqankipunin yana phuyu ukhupi tiyasqaykita.+
2 Kunanmi kay admiranapaq wasita ruwapurqayki chaypi wiñaypaq tiyanaykipaq”,+ nispa.
3 Chaymantataq rey Salomonqa kutirimurqan maypichus Israel runakuna sayasharqanku chay ladoman, jinaspa paykunata bendecirqan.+
4 Nirqantaq: “Jatunchasqa kachun Israelpa Diosnin Jehová Diosqa, paymi papay Davidman prometesqanta* llapanta junt’arqan.* Paymi nirqan:
5 Egipto jallp’amanta Israel llaqtayta orqomusqaymantapachaqa manan mayqen ayllumantapas juj llaqtataqa ajllakurqanichu chaypi juj wasita ruwapuwanankupaqqa, chhaynapi sutiy chaypi jatunchasqa kananpaqqa.+ Israel llaqtayta umallinanpaqpas manan juj runataqa ajllakurqanichu.
6 Kunanmi ichaqa Jerusalén llaqtata ajllakuni+ chaypi sutiy jatunchasqa kananpaq, Davidtataq ajllakuni Israel llaqtayta kamachinanpaq,+ nispa.
7 Papay Davidqa sonqomantapunin munarqan Israelpa Diosnin Jehová Diospa sutinta jatunchananpaq juj wasi ruwayta.+
8 Jehová Diosmi ichaqa papay Davidta nirqan: Qanqa sonqomantapunin munashanki sutiyta jatunchananpaq juj wasita ruwayta, chay yuyaykusqaykiqa allinmi.
9 Ichaqa manan qanchu sutiyta jatunchanapaq wasitaqa ruwapuwanki, aswanpas qanpa wawaykin chay wasitaqa ruwapuwanqa,+ nispa.
10 Jehová Diosqa papay Davidman prometesqantan junt’arqan, chaymi kunanqa Jehová Diospa prometesqanman jina papaypa rantinpi Israelpi kamachikushani.+ Chaymantapas noqan juj wasita ruwapurqani Israelpa Diosnin Jehová Diospa sutinta jatunchananpaq.
11 Chay wasimanmi Diospa rimanakuynin arcata churarqani. Chay rimanakuy arcapin kashan iskay p’alta rumikuna, chaypin qelqasqa kashan Israel runakunawan Jehová Diospa rimanakusqan”,+ nispa.
12 Chaymantataq Salomonqa Jehová Diospa altarninpa ñaupanpi sayaykurqan, jinaspataq llapa Israel runakunaq ñaupanpi janaq pachaman makinta jaywarirqan.+
13 (Salomonqa sayananpaqmi cobremanta cajata jina ruwachirqan, chaytataq churarqan chaupi patioman.+ Chay sayanapaq cajaqa largonmanpas anchonmanpas pisqa codon* karqan, altontaq karqan kinsa codo. Payqa chay caja patapin sayaykurqan). Jinan Salomonqa llapa Israel runakunaq ñaupanpi qonqorikuspa janaq pachaman makinta jaywarirqan,+
14 jinaspa nirqan: “Israelpa Diosnin Jehová Dios, manan qan jina Diosqa kanchu janaq pachapipas ni kay pachapipas. Qanqa junt’ankipunin rimanakusqaykitaqa. Ñanniykikunapi tukuy sonqowan puriq kamachiykikunamanpas mana tukukuq munakuyniykitan* rikuchinki.+
15 Papay Davidman prometesqaykitapas junt’arqankipunin.+ Qanqa simiykiwanmi papayman prometerqanki, kunantaq makiykiwan chayta junt’ashanki.+
16 Israelpa Diosnin Jehová Dios, papay Davidman prometesqaykitaqa junt’aypuni, qanmi nirqanki: Sichus wawaykikuna kamachikuyniykunata kasukuspa allinta kausanqaku,+ qan jinataq ñanniykunapi purinqaku chayqa, qanpa familiaykimanta jamuq runakunallapunin Israelpa trononpiqa tiyanqaku,+ nispa.
17 Chhaynaqa Israelpa Diosnin Jehová Diosníy, junt’aypuni kamachiyki Davidman prometesqaykita.
18 ”Ichaqa Diosníy, ¿tiyawaqchu kay jallp’a pachapi?+ Janaq pachapas may jatunña chaypas juch’uyllan qanpaqqa,+ ¿chaychu kay wasi ruwasqay qanpa tiyanaykipaq jina kanman?+
19 Chhaynaqa Diosníy, uyariykuway kay kamachiykiq mañakusqanta. Jehová Diosnilláy, ñaupaykimantan yanapayta mañakamushayki, anchatan rogakamushayki, uyariykuway.
20 Kay wasimantan qanqa nirqanki: Chaypin sutiyqa kanqa,+ nispa. Chayrayku tuta-p’unchay kay wasita qhawamushallay, chhaynapi kay wasita qhawarimuspa mañakamuqtiy uyariwanaykipaq.
21 Noqapas Israel runakunapas kay wasita qhawarimuspa mañakuqtiykuqa uyariykuwayku.+ Janaq pacha tiyanaykimanta+ uyariykamuwayku jinaspa perdonaykuwayku.+
22 ”Pipas runamasin contra juchallikunman, chay runamasintaq payta jurachinman,* jinaspa chay jurasqan* qhepaman kay wasipi kaq altarpa ñaupanman jamunman chayqa,+
23 janaq pacha tiyanaykimanta uyariykamuy, jinaspa paykunata ruwasqankuman jina juzgay. Mana allin runata juchachay, jinaspa ruwasqanman jina castigay,+ chanin runamantaq chaninta ruwasqanman jina kutichipuy.+
24 ”Israel llaqtaykitachus sapa kuti juchallikusqankurayku enemigonkuna atipanqaku,+ jinaspa qanman kutirikamuspa kay wasiykipi sutiykita jatunchanqaku,+ yanapayniykitapas rogakunqaku chayqa,+
25 janaq pacha tiyanaykimanta paykunata uyariykamuy,+ jinaspa Israel llaqtaykiq juchanta perdonaspa paykunata jujmanta kutichimpuy, kay jallp’atan paykunamanpas ñaupa taytankumanpas qorqanki.+
26 ”Israel runakuna qan contra sapa kutilla juchallikusqankuraykuchus+ mana para kanqachu,+ ichaqa wasiykita qhawarimuspachus mañakamusunkiku, sutiykitapas jatunchanqaku, k’umuykachisqaykiraykutaq juchankutapas saqepunqaku chayqa,+
27 janaq pacha tiyanaykimanta paykunata uyariykamuy, jinaspa chay kamachiykikunaq juchanta perdonaykuy, allin ñanninta purinankupaqtaq yachachiy.+ Paykunaman qosqayki jallp’amanpas paraykita parachimuy.+
28 ”Sichus Israel llaqtapi kanqa yarqay,+ mast’arikuq millay onqoykuna,+ ruphakuq wayra, plantakunapi onqoykuna,+ askha langostakuna,*+ enemigonkunapas llaqtankuta muyuykunqa,+ otaq imaymana onqoykunapas kanqa;+
29 jinaspa Israelmanta pi runapas sonqonpi ñak’arisqanrayku mañakamusunki+ (sapanka runan yachan ñak’arisqanta sasachakuyninkunatapas)+ otaq llaqtantinpas kay wasita qhawarimuspa mañakamusunki chayqa,+
30 janaq pacha tiyanaykimanta uyariykamuy,+ jinaspa paykunata perdonaykuy.+ Qanllan yachanki sapanka runaq sonqonpi imachus kashan chaytaqa,+ chayrayku imachus sonqonkupi kasqanman jina imatachus ruwasqankuman jina sapankaman kutichipuy.
31 Chhaynapin paykunaqa manchakuywan kasukusunkiku, ñanniykikunapipas purinqaku, ñaupa taytaykuman qosqayki jallp’api tukuy tiempo tiyanankukama.
32 ”Chaymantapas sichus waj llaqtayoq runa karu llaqtamanta jamunqa manchana sutiykita uyarispa,+ ancha atiyniyoq kasqaykita yachaspa, jinaspa kay wasita qhawarimuspa mañakamusunki chayqa,+
33 janaq pacha tiyanaykimanta uyariykamuy, chay waj llaqtayoq runaq tukuy mañakusqanta qoykuy, chhaynapin pachantinpi runakuna sutiykita reqsinqaku,+ Israel llaqtayki jinataq manchakuywan kasukusunkiku, yachanqakutaq kay ruwasqay wasi sutiykita jatunchasqanta.
34 ”Sichus Israel llaqtayki may ñannintachus rinankupaq kachasqaykiman jina enemigonku contra maqanakuq rinqaku,+ jinaspa ajllasqayki llaqta ladoman kutirimuspa, sutiykita jatunchananpaq ruwapusqay wasi ladoman kutirimuspa+ mañakamusunkiku chayqa,+
35 mañakusqankuta rogakusqankuta janaq pacha tiyanaykimanta uyariykamuy, justiciata paykunapaq ruwapuy.+
36 ”Manan pi runapas mana juchallikuqqa kanmanchu.+ Chhaynaqa sichus llaqtayki qan contra juchallikuqtin sinchita phiñakuspayki enemigonkuman entregaykuwaq, enemigonkutaq may llaqtamanpas presota apapunkuman, karumanpas qayllamanpas,+
37 chay llaqtapi preso kashaspankutaq yuyayninkuman kutispa valekamusunkikuman: Manan kasukurqaykikuchu, juchallikuykun, mana chanintan ruwayku,+ nispa;
38 jinaspa qanman tukuy sonqowan+ tukuy almawan* kutirikamunkuman, chay preso apasqa+ kasqanku llaqtamantataq ñaupa taytankuman qosqayki jallp’a ladoman kutirimuspa, kay ajllakusqayki llaqta ladoman kutirimuspa, kay ruwasqay wasi ladoman kutirimuspa ima mañakamusunkikuman chayqa,+
39 janaq pacha tiyanaykimanta mañakusqankuta rogakusqankuta uyariykamuy, justiciata paykunapaq ruwapuy,+ qan contra llapa juchallikusqankuta perdonaykuy.
40 ”Chhaynaqa Diosníy, qhawarimuwayku makillataq uyariwayku kay wasipi mañakusqaykuta.+
41 Kunantaq Jehová Diosníy, qanpas, atiyniykita rikuchiq rimanakuy arcapas kay ruwasqay wasipi samaychis.+ Jehová Diosníy, qanta serviq sacerdotekuna rikuchichunku salvaq kasqaykita, junt’aq sonqo kamachiykikunapas sumaq sonqo kasqaykirayku kusikuchunku.+
42 Jehová Diosníy, qanmi ajllakuwarqanki, chayrayku ama wijch’uwaychu.+ Yuyarillaypuni kamachiyki Davidman mana tukukuq munakuyniyki rikuchisqaykita”,+ nispa.
Uraypi willakuykuna
^ Hebreo rimaypiqa “siminwan prometesqanta” ninmi.
^ Hebreo rimaypiqa “makinwan junt’arqan” ninmi.
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
^ Qhaway Explicasqa simikuna nisqapi “Mana tukukuq munakuy” nisqata.
^ Juchayoq kashaspa manapas juchayoqchu kanman jinata juraq runataqa otaq jurasqanta mana junt’aq runataqa ñakasqa kanantan jurachiq chay runamasinqa.
^ Hebreo rimaypiqa “ñakasqa kasqan” ninmi.
^ Langostaqa jatun t’isku-t’isku otaq jatun ch’illiku jinan. Chay langostakunaqa sinchi q’aruqmi kanku.
