Job 7:1-21
7 ”¿Manachu runaq vidanqa sinchi sasa llank’ana jina?
¿Manachu p’unchayninkunapas llank’apakuqpa p’unchayninkuna jina?+
2 Juj esclavo jinan payqa mayta samariyta munan,pagonta suyakuq llank’apakuq jinaraqmi chayta munan.+
3 Chhaynan noqapaqpas killan-killan llakikuylla,tutan-tutan ñak’ariylla.+
4 Sapa puñuspaymi tapukuni:
¿Imay horastataq illarimunqari?,+ nispay.
Tutaqa mana tukurikuqmi kapun,puñunallaypin illarimunankama qhospani.
5 Aychaypas kuruq tukusqanmi kashan, jallp’akamallañan kashan;+aycha qaraypas k’iri-k’irillañan, q’eyakamallañan kashan.+
6 Kausayniyqa awana q’aytu jinan ratulla pasan,+p’unchayniykunaqa mana suyakuyniyoqmi tukupun.+
7 Diosnilláy yuyariy, kausayniyqa wayra jinallan,+ñawiyqa manachá jayk’aqpas kusikuytaqa rikunqañachu.
8 Kunan rikuwaqkunaqa manañan jayk’aqpas rikuwanqakuñachu;qanpas maskhawaspaykiqa manañan tariwankiñachu.+
9 Kausayqa phuyu jinan qonqaylla chinkapun,Sepulturaman* uraykuspan manaña kutimunñachu.+
10 Pipas wañuspaqa manan wasinmanqa kutinmanñachu,manan pipas paytaqa yuyanmanñachu.+
11 Chhaynaqa manan ch’inllaqa kasaqchu.
¡Llapa llakikuyniytan willakusaq!
¡Sonqo nanasqa kaspan quejakusaq!+
12 ¿Imaraykun qhawaqkunata churawanki?
¿Lamar-qochachu noqari kashani?
¿Lamar-qochapi tiyaq manchay animalchu kashani?
13 Puñunayman rispan nini:
Puñunaypiqa thajmi samakusaq,puñunaypiqa qonqarisaqmi llakikuyniykunata, nispa.
14 Qantaq ichaqa mosqoykunawan mancharichiwanki,rijuriykunawan khatatatachiwanki.*
15 Allinchá kanman samaynillaytaña tapapuwankiman chayqa;allinchá kanman khayna kanaymantaqa wañupullaymanña chayqa.+
16 Imachá noqaq vidayqa,+wañukapuyman chayqa allinchá kanman.
Amaña yanapawaychu,noqaq p’unchayniykunaqa samay phukuriy jinallan.+
17 ¿Ima allinmi runakuna paykunamanta llakikunaykipaq?
¿Ima allinmi runakuna paykunata qhawarinaykipaq?+
18 ¿Imaraykun sapa tutamantan paykunata qhawashallanki?
¿Imaraykun paykunata sapa ratu pruebaman churanki?+
19 ¿Sapa p’unchaychu ñawillaykipi kasaq?
¿Manachu thoqayniyta millp’unallaypaqpas tiempoy kanqa?+
20 Juchallikuymanña chaypas imapin mana allinta ruwaykiman,imanaymanmi noqa kay pacha qhawaqta.+
¿Imaraykun noqallata qhawamushawanki?
Noqari, ¿llasa q’epichu qanpaq kani?
21 ¿Manachu juchayta perdonawankiman?
¿Manachu juchayta qonqapuwaq?
Noqaqa jallp’a sonqomanñan jaykupusaq,+maskhaspapas manan tariwankiñachu”, nispa.
Uraypi willakuykuna
^ Khatatataytaqa “kharkatiy” nillankutaqmi.
