CAPÍTULO 8

¿Imaynan allin amigokuna kanku?

Brittany sipasmi nin: “Phiñasqa kashaspayqa munanin pillamanpas willakuyta. Llakisqa kashaspaytaq munanin pipas niwananta: “ama llakikuychu allichakullanqan imapas”, nispa. Chaymantapas kusisqa kashaspayqa, munanin pillamanpas willariyta. Noqapaqqa, amigokunayoq kayqa ancha allinpunin”, nispa.

WAWAKUNAQA compañerokunatan necesitanku pujllanankupaq, wayna-sipaskunataq necesitanku amigokunata. Ichaqa, ¿igualchu juj compañerowan juj amigowan?

Juj compañeroqa pujllayllapin compañasunki.

Juj amigowanmi ichaqa imaymanapi sonqota tupachinki.

Cheqaq amigomantan Bibliaqa kayta nin: “Tukuy tiempon amigoqa munakun, llaki-phutiy tiempopipas wayqe jinan khuyapayakun”, nispa (Proverbios 17:17). Chhaynaqa, amigokunaqa imaymanapin sonqota tupachinku manan wawakuna jinachu pujllayllapi juj ratu compañanakunku.

Kayqa cheqaqpunin wiñasqaykiman jinaqa khaynan amigoykikunaqa kananku, kay kinsa ruwaykunatan junt’ananku...

1) ... sumaq runan kananku.

2) ... Diospa kamachikuyninkunatan kasukunanku.

3) ... allinkunata ruwanaykipaqmi kallpachanasuykiku.

Chhaynaqa, tapukuy kayta: ¿Amigoykikuna junt’ankuchu chay kinsa ruwaykunata icha manachus? chayta. Yachasunchis chay kinsa ruwaykunamanta.

Ñaupaq kaq: Amigoykikunaqa sumaq runan kananku

Kaytan yachanayki. Manan llapan amigoykikunachu allin amigokunaqa kanqaku. Bibliapin niwanchis: “Kanmi waqllichiq amigokuna”, nispa (Proverbios 18:24, Diospa Simin Qelqa). Piensay kaypi: ¿jayk’aqllapas juj “amigoyki” qhepaykipi llullakuspa qanmanta mana allinkunata rimarqanchu? Chay ruwayqa t’aqanachinmanmi amigokunataqa ¿riki? * Chhaynaqa manan askha amigokunayoq kaychu aswan allinqa, aswanpas allin amigokunayoq kaymi.

Kaytan ruwawaq. Sumaq sonqoyoq amigokunata ajllakuy.

17 watayoq Yvette sipasmi nin: “Lliumi amigay Fionamanta allinta rimanku. Pay jina kaytan munayman sumaqta qhawariwanankutan munaymanpas”, nispa.

Kaykunata ruway:

1. Leey Gálatas 5:22, 23.

2. Tapukuy: “¿Kay textoq nisqanman jinachu amigoykuna kanku?”, nispa.

3. Munakusqayki amigoykikunaq sutinta qelqay, ladonpitaq qelqay imayna runa paykuna kasqankuta.

Sutin

․․․․․

Imayna runan

․․․․․

Juj yuyaychay: Sichus chay amigoykikunamanta mana allinkunalla yuyayniykiman jamun chayqa, yaqapaschá juj amigokunata maskhakunayki kanqa.

Iskay kaq: Amigoykikunaqa Diospa kamachikuyninkunatan kasukunanku

Kaytan yachanayki. Sichus usqhaylla piwanpas amigontin kayta munashanki chayqa, mana allin amigokunatan ajllakuwaq. Jinaspapas ama kay Bibliaq nisqanta qonqaychu: “Mana yuyayniyoqkunawan puriqmi ichaqa waqllipunqa”, nispa (Proverbios 13:20). Kay textopi “mana yuyayniyoqkuna” nisqa simiqa manan escuelapi mana allin notakunata orqokuqkunamantachu rimashan aswanpas mana allin yuyaywan imatapas ruwaq, mana kasukuq runakunamantan rimashan. Manapunichá qanqa chhayna clase amigokunayoqqa kayta munawaqchu, ¿riki?

Kaytan ruwawaq. Allinta amigoykikunata ajllakuy, ama comunta piwanpas amigontin kaychu (Salmos 26:4). Chaywanqa manan nishanchischu juj pisi t’aqalla amigoykikuna kanantachu. Aswanpas allin qhawariq kanaykimantan nishan chhaynapi allinta reparanaykipaq ‘allin runaq millay runaq imaynachus kasqanta, pichus Diosta serviq, pitaqchus Diosta mana serviq kasqantapas’ (Malaquías 3:18).

13 watayoq Christopher waynan nin: “Kusikunin tayta-mamay allin amigokunata tarinaypaq yanapawasqankumanta, chay amigoykunaqa wiñaqmasiykunan kanku, allintataq Diosta servishanku”, nispa.

Kay tapuykunata kutichiy:

¿Manchakunkichu amigoykikuna mana allin ruwaykunaman tanqanasuykita?

□ Arí

□ Manan

¿Manachu munanki tayta-mamaykiman amigoykikunata reqsichiyta, ichapaschá piensanki tayta-mamaykiman paykuna mana gustananta?

□ Arí

□ Manan

Juj yuyaychay: Sichus arí nispa kutichirqanki chayqa, allin amigokunatan maskhakunayki kanqa, Diospa nisqanta kasukuqkunata, paykunan kankuman allin cristianokuna.

Kinsa kaq: Amigoykikunaqa allinkunata ruwanaykipaqmi kallpachanasuykiku

Kaytan yachanayki. Diospa palabranmi nin: “Mana allin runakunawan juñukuspaqa allin ruwaykunatan qonqapunkichis”, nispa (1 Corintios 15:33). Lauren sipasmi chhaynapi tarikurqan, paymi nin: “Noqaqa munarqanin escuelaypi compañeraykunaq amigan kayta. Ichaqa chaypaqqa paykunaq niwasqankutan ruwanay karqan. Mana sapallay sientekunayraykutaq paykuna jina ruwayta qallarirqani”, nispa. Sichus Lauren sipas jina jujkunaq ruwasqallankuta ruwanki chayqa, paykunan pujllanawan jina imachus munasqankuta qanwan ruwanqaku, ¿chaytachu qan munawaq?

Kaytan ruwawaq. Pikunachus obligasunkikuman paykunaq kausasqankuman jina kausanaykipaq chayqa, paykunamanta karunchakuy. Yaqapaschá pisi amigokunayoq qhepakunki, ichaqa aswan allinmi qanpaq kanqa. Chaymantapas allin amigokunatan tariwaq paykunan yanapasunkikuman allinkunata ruwanaykipaq (Romanos 12:2).

21 watayoq Jason sutiyoq waynan nin: “Allin amigoykunamanta jujninmi Clint sutiyoq, payqa allin yuyaywanmi imatapas ruwan, khuyapayakuq iman, payqa sapa kutinmi kallpachawan”, nispa.

Kay tapuykunata kutichiy:

¿Amigoykikunata kusichinaykiraykullachu paykuna jina p’achakunki, rimanki, imatapas ruwanki?

□ Arí

□ Manan

¿Rinkichu mana rinayki sitiokunaman amigoykikunaq risqankuraykulla?

□ Arí

□ Manan

Juj yuyaychay: Iskaynin tapuykunaman arí nirqanki chayqa, tayta-mamaykiwan otaq juj kuraq runawan yanapachikuy allin amigokunata ajllakunaykipaq. Sichus Jehová Diospa testigon kanki chayqa iñiq t’aqaykipi umalliqkunawan yanapachikuy.

ASTAWANMI YACHANKI WAYNA-SIPASKUNAQ TAPUKUSQAN ISKAY KAQ LIBROPI 9 CAPITULOPI

QATIMUQ CAPITULOPI

¿Jayk’aqllapas mana allinkunata ruwanaykipaq pipas mat’ipayarqasunkikuchu otaq qan kikiyki mana allinkunata ruwayta munarqankichu?

[Willakuy]

KAYPI NISQANTA AMA QONQAYCHU

‘Kanmi wayqemantapas aswan munakuq amigo’ (Proverbios 18:24)

KAYTA RUWAY

Kallpachakuy Diospa kamachikuyninkunata kasukunaykipaq. Chhaynapin qan jina Diospa kamachikuyninkunata kasukuqkuna amigoykikuna kayta munanqaku. ¡Paykunan allin amigokunaqa kanqaku!

¿YACHARQANKICHU KAYTA?

Diosqa manan pi runatapas aswan allinpaqqa qhawarinchu may nacionmantaña kanku chaypas, ichaqa allintan ajllan pitapas amigon kananpaq (Salmos 15:1-5).

¡LLANK’AYTA QALLARIY!

¿Imatan ruwasaq allin amigokunata tarinaypaq? ․․․․․

Kay kuraq runakunatan astawan reqsiyta munani. ․․․․․

¿Imatan tapuyta munani tayta-mamayta allin amigokuna ajllakuymanta? ․․․․․

QANRI, ¿IMANINKITAQ?

● ¿Amigoykipa ima sumaq kaynintan astawan valoranki? ¿Imaraykun chayta ninki?

● Qanri, ¿imapin kallpachakunayki allin amigo kanaykipaq?

[Willakuy]

Carlosmi nin: “Tayta-mamaymi niwarqanku wakin amigoykunamanta karunchakapunaypaq. Qallariypiqa manan munarqanichu paykunamanta karunchakuyta, piensarqani paykunallawanpas allinta apanakunaypaq jinata. Ichaqa tayta-mamayqa allintan niwarqanku, tiempowanmi aswan allin amigokunata tarirqani”, nispa.

[Recuadro]

Kaykunatawanmi ruwawaq

Tayta-mamaykiwan parlariy. Paykunata tapuriy imaynan amigonkuna karqanku wayna-sipas kashaqtinku. ¿Jayk’aqllapas mana allin amigokunata ajllakurqankuchu? ¿Imaynapitaq chayri karqan? chaykunata. Chaymantapas tapuriy, imatan ruwanayki ama sasachakuykunaman urmanaykipaq chayta.

Tayta-mamaykiman amigoykikunata reqsichiy. Sichus tayta-mamaykiman amigoykikunata mana reqsichiyta munashankichu chayqa, ichapaschá yachashanki amigoykikuna mana allinkunata ruwashasqankuta. Chhayna kaqtinqa allintan ajllakunayki amigoykikunataqa.

Makilla uyariy amigoykikunata. Chayta ruwaspan rikuchinki amigoykikunaq nisqanpi interesakusqaykita, allin kanankuta munasqaykitapas (Filipenses 2:4).

Khuyapayakuq perdonakuq ima kay. Amigoykikunaqa imallapipas pantanqakupunin. Santiago 3:2 nisqan jina “llapanchispas pantanchispunin imallapipas”.

Ama amigoykikunata qanllapaq kananta munaychu. Paykunapas juj amigokunayoq kaytan atinku. Sichus cheqaq amigokuna kanku chayqa necesitasqayki tiempopin qanwan kuskalla kashanqaku (Eclesiastés 4:9, 10).

[Dibujo]

Sichus jujkunaq ruwasqallankuta ruwanki chayqa, paykunan pujllanawan jina imachus munasqankuta qanwan ruwanqaku