¿Jayk’aqllapas sientekurankichu wañuqniyoqta mana imatapas niyta atispa? Manapaschá imatapas niyta atinkichu, ichaqa imallatapas ruwawaqmi allinta sientechinaykipaq.

Mayninpiqa yaqapaschá visitaspa llakipayasunman. Wakin llaqtakunapiqa abrazaykunku otaq makinmanta fuerteta jap’iykunku chhaynapi sientesqankuta rikuchinku. Wañuqniyoq willarikuyta munaqtinqa makilla uyariy. Otaq imallatapas ruwawaq familianpaq, kanmanmi: mijunata wayk’upuy, wawankunata cuiday otaq wañuqta entierranapaq imakuna ruwaypi yanapakuy. Chaykunapi yanapakuymi aswan allin kanman.

Tiempowanmi wañupuqninmanta rimayta munanman, yaqapaschá yuyarichiwaq sumaq runa kasqanta otaq experienciakuna pasasqaykichismanta. Chayta ruwaspaqa yanapankin yaqapaschá hasta asirikunmanraq. Chhaynan sientekun Pam sutiyoq warmi, qosanpa wañupusqanmi soqta wataña pasarun, paymi nin: “Qosaypa allin ruwasqankunatan willawanku, chaykunataqa manan yacharanichu chayta yachaymi kusichiwan”, nispa.

Especialistakunan ninku: “Wañuqniyoqkunataqa chay ratollan yanapanku, tiempowanqa amigonkupas  sapankan ruwanankuman kutipuspa qonqapunku wañuqniyoq yanapayta necesitashallasqanta”, nispa. Chayrayku mana qonqarparinachu aswanpas rimashanalla wañupuqniyoqkunawanqa. * Paykunaqa agradecekunkun imayna sientekusqankumanta willarikusqanta uyariqtinchisqa.

Yachasun Kaori sipasmanta payqa japonmantan, mamitan wañukapuqtinmi sinchi llakipi tarikuran 15 killakuna pasaqtintaq kuraq hermananñataq wañukapuran. Paytaqa amigonkunan mana saqerankuchu. Jujninmi karan Ritsuko, payqa askha watakuna kuraqninmi karan, Kaoritaqa ususinta jinan cuidayta munaran. Ichaqa Kaori nin: “Ritsuko cuidawanantaqa manan munaranichu, niranin: ‘Mamaytaqa manan piwanpas cambiaymanchu’, nispa. Manan munaqchu kani pipas mamaypa rantinpi kananta. Ichaqa Ritsuko sumaqta tratawasqanwanmi munakapurani mamayta jina. Sapa p’unchaymi paywan predicaq kayku juñunakuykunamanpas kuskallan riq kayku. Invitawaqmi mateta, mijunata apamuwaq, tarjetakunata cartakunatapas qelqamuwaq. Mamá Ritsuko sumaqta tratawasqanmi anchata yanapawaran”, nispa.

Kaoriq mamitanpa wañukapusqanqa 12 watakunañan pasarun. Kunanqa Kaoriqa qosanwanmi yaqa tukuy tiempo runakunaman predicanku. Paymi nin: “Mamá Ritsukoqa tapushallawanmi imayna kashasqayta. Wasiyta kutispayqa visitallanipunin, paywanqa sumaqtan pasayku”, nispa.

Poli sutiyoq warmiqa Chipre nacionmantan, payqa Testigon, paytapas jujkunan yanaparanku. Qosanqa munakuq runa allin umallitaq karan, invitallaqpunis iñiq t’aqamanta mana tayta-mamayoqkunata viudakunatapas paykunawan mijunankupaq (Santiago 1:27). 53 watanpi kashaspan wañukapuran cerebronpi tumorwan. Poli nin: “Fiel compañeroymi wañukapun, paywanqa 33 watakunan vidayta pasarani”, nispa.

Qosanta entierrapuspan Poliqa 15 watanpi kashaq Daniel sullk’a wawanwan Canadá nacionman tiyaq ripuranku. Chaypin Testigokunawan juñukuyta qallariranku. Paymi nin: “Chaypi kaq hermanokuna manaña yacharankuchu imaynapi tarikusqaykuta chaypas, sumaq simikunawanmi chaskiwaranku imaymanapitaq yanapawaranku. ¡Chayqa ancha allinmi karan wawaypaq taytan wañupusqanrayku! Iñiq t’aqapi umalliqkunaqa anchatan interesakuranku Danielpi. Juj umallin invitallaqpuni juj hermanokunawan kusirikunankupaq otaq pelota jayt’aq rinankupaq”, nispa. Kunanqa Poliwan Danielwanqa allinmi kusisqataq kashankupas.

Yachasqanchisman jina imaymanatan ruwasunman wañuqniyoqkunata animananchispaq yanapananchispaq ima. Qatimuq articulopin yachasun imaynata Biblia consolawanchis suyakuytapas qowanchis jamuq tiempopaq chaymanta.