1. ¿Imaynatan David rikuchiran Jehová Dios munakusqanta? ¿Imata ruwananpaqmi kallpacharan?

REY DAVIDMI qelqaran: “Jatunmi Señor Diosqa, payqa ancha jatunmi, yupaychanapaq jinapunin”, nispa (Sal. 145:3). Davidqa munakuranmi Jehová Diosta, chaymi ‘juñunakuykunapi’ Diosta jatuncharan (Sal. 22:22; 40:5). Noqanchispas munakunchismi Jehová Diosta, chaymi Davidpa nisqanwan kusikunchis, paymi niran: “Israel ñaupa taytaykuq Diosnin Señor, wiñay-wiñaykama yupaychasqan kanki”, nispa (1 Crón. 29:10-13).

2. a) ¿Imata ruwaspan Jehová Diosta jatunchallanchistaq? b) ¿Iman wakin hermanokunawan pasan? ¿Imatan ñaupaqta yachasun?

² Juñunakuykunapi comentaspaqa Jehová Diostan jatunchashanchis. Askha hermanokunapaqmi ichaqa sasa chayta ruway. Comentaytan munanku ichaqa manchakunkun. ¿Imaynatan manchakuyninkuta atipankuman? ¿Ima consejokunan llapanchistapas yanapawasun kallpachanapaq jina comentanapaq? Manaraq chay tapuykunata kutichishaspa yachasun imaraykus juñunakuykunapi comentay importante kasqanmanta tawa razonkunata.

3-5. a) Hebreos 13:15 textopi nisqanman jina, ¿imaraykun juñunakuykunapi comentananchis? b) Jehová Diosqa atisqanchisman jina comentananchistan munan, ¿imaynapin chayta yachanchis?

³ Jehová Diosqa munanmi llapanchis jatunchananchista (Sal. 119:108). Juñunakuykunapi comentaspaqa ‘jatunchay sacrificiotan’ Diosman qoshanchis. Chaytaqa manan pipas rantinchispiqa ruwanmanchu (leey Hebreos  13:15). Jehová Diosqa atisqanchisman jina comentananchistan munan.

⁴ Diosqa yachanmi sapankanchispas jujniray kasqanchista, maykama ima ruway atisqanchistapas. Chaymi anchata valoran atisqanchisman jina sacrificiota qoqtinchis. Ñaupaq Israel runakunapas atisqankuman jinan sacrificiota jaywaranku. Qhapaqkunaqa juj corderota otaq juj cabratan jaywaranku, wajchakunataq “iskay kullkuta” otaq “iskay urpi malqota” jaywaranku. Mana iskay kullkuman aypaqtinkutaq ‘iskay kilo jina jak’uta’ jaywaranku (Lev. 5:7, 11). Chay jak’uqa allin jak’un kanan karan pisitaña valeran chaypas Diosqa aceptaranmi.

⁵ Kay tiempopipas Jehová Diosqa manan Apolos jina allin rimaq, otaq Apóstol Pablo jina convecechinapaq jina rimaq kananchistaraqchu munan (Hech. 18:24; 26:28). Aswanpas atisqanchisman jinalla comentananchistan munan. Wajcha viudaq churasqan iskay qolqechata yuyarisun. Jehová Diosqa aceptaranmi churasqanta, ¿imarayku? Tukuy atisqanta qosqanrayku (Luc. 21:1-4). 

6. a) Hebreos 10:24, 25 textopi nisqanman jina, ¿imaynatan yanapawanchis juñunakuykunapi comentaqkunata uyarisqanchis? b) ¿Imaynatan rikuchisunman comentasqankuta valorasqanchista?

⁶ Comentaspaqa kallpachanakunchismi (leey Hebreos 10:24, 25). Llapanchispas kusikunchismi juñunakuykunapi comentasqankuta uyarispa. Kusisqan uyarinchis wawakunaq comentasqankuta, hermanonchiskuna investigaspa comentasqankuta, manchali hermanokunaq comentasqankuta otaq rimasqanchis simita chayllaraq yachaqkuna comentasqankutapas (1 Tes. 2:2). ¿Imaynatan rikuchisunman kallpachakusqankuta valorasqanchista? Juñunakuy tukuytan “gracias” ninanchis kallpachawasqanchismanta. Agradecido kasqanchistan rikuchillasunmantaq noqanchispas comentaspa. Chhaynapin paykunapas kallpachasqa sientekunqaku (Rom. 1:11, 12).

7. ¿Imaynatan comentasqanchis yanapawasunman?

⁷ Comentasqanchisqa yanapawanchismi (Is. 48:17). ¿Imakunapi yanapawanchis? Sichus juñunakuypi comentayta decidikusun chayqa kallpachakusunmi allinta  preparakunanchispaq, chhaynapin aswan allinta Diospa palabranta entiendesun, aswan allintataq Diospa munasqanman jina kausasun. Kusisqataqmi kasunchis juñunakuykunapi, ¿imarayku? Comentaspa yanapakusqanchisrayku. Juñunakuy tukuytataq aswan facilta yuyarisun imachus yachasqanchista.

8, 9. a) Malaquías 3:16 textopi nisqanman jina, ¿imaynatan Jehová Dios qhawarin comentanapaq kallpachakusqanchista? b) Chaywanpas, ¿imaynan jujkuna sientekunkumanraq?

⁸ Jehová Diosqa kusikunmi paymanta rimaqtinchisqa. Diosqa uyarinmi comentasqanchista, anchatataqmi valoran comentananchispaq kallpachakusqanchista (leey Malaquías 3:16). Chaytan rikuchin bendeciwaspanchis (Mal. 3:10).

⁹ Yachasqanchis jina may allinmi comentayqa. Chaywanpas jujkunaqa manchakunkuraqmi. Chay jinapi tarikuspaqa ama desanimakuychu. Astawan comentayta yachanapaq qhawarisun Bibliapi wakin yachachikuykunata, ejemplokunata, consejokunatapas.

10. a) ¿Imaynan yaqa llapallanchis sientekunchis comentaspa? b) ¿Imaraykun comentanapaq manchakusqanchis allin kanman?

¹⁰ ¿Jayk’aqllapas jump’iraq oqarirasunkichu comentanaykipaq? Yaqa llapallanchismi chhayna sientekunchis. Manchakuyninchista atipananchispaqqa yachananchismi imaraykus nervioso churakunchis chayta. ¿Comentanayki rato qonqanaykipaqchu piensanki icha pantanaykipaqchu? Icha, ¿manan jujkuna jinaqa allinta comentaymanchu nispachu ninki? Chay jina piensasqaykiqa allinmi, ¿imarayku? Chaywanmi aswan allinpaq jujkunata qhawarishanki. Jehová Diosqa munanmi chay jina humilde kananchista (Sal. 138:6; Filip. 2:3). Chaywanpas Diosqa munanmi payta jatunchananchista, hermanonchiskunata kallpachananchistapas  (1 Tes. 5:11). Diosqa munakusunkin yanapasunkitaqmi comentanaykipaq.

11. ¿Ima allin yachachikuykunatan yuyarinanchis?

¹¹ Yachasunchis Bibliapi wakin yachachikuykunamanta. Bibliaqa yuyarichiwanchismi llapanchispas rimaspa pantasqanchista (Sant. 3:2). Chaytaqa Jehová Diospas hermanonchiskunapas yachankun (Sal. 103:12-14). Jinaspapas hermanonchiskunaqa familianchismi kanku, anchatataqmi munakuwanchispas (Mar. 10:29, 30; Juan 13:35). Paykunaqa yachankun mayninpi comentaspa mana allintachu entiendechikusqanchista.

12, 13. ¿Imatan yachanchis Nehemiasmanta Jonasmantapas?

¹² Bibliapi iskay ejemplokunamanta yachasun, chaykunan yanapawasun manchakuyninchista atipanapaq. Nehemiasmanta yachasun, payqa palaciopin reyta serviran. Paymi uyarisqa Jerusalén llaqtaq perqankuna punkunkunapas thunisqalla kashasqanta, chaymi llakisqa kasharan (Neh. 1:1-4). Chayta reparaspan reyqa Nehemiasta tapuran imarayku llakisqa kashasqanta willananpaq, Nehemiastaqa jump’iraqchá oqariran chayta tapuqtin. Reyman manaraq kutichishaspan sonqollanpi Diosmanta mañakuran. Chaymi reyqa Diospa llaqtanta yanaparan (Neh. 2:1-8). ¿Imatan Nehemiasmanta yachanchis? Manaraq cometashaspan Diosmanta mañakunanchis. Jonasmantañataq yachasun, Diosmi Jonasta kamachiran Nínive runakunata predicananpaq, paymi ichaqa mancharikuspa waj llaqtaman ayqekuran (Jon. 1:1-3). Diospa yanapayninwanmi ichaqa llank’ayninta junt’aran, jinan Nínive runakunata predicasqanwan yanaparan (Jon. 3:5-10). ¿Imatan Jonasmanta yachanchis? Diosqa yanapawasunmi payta servinapaq manchasqaña kaqtinchispas. Jinaspapas hermanonchiskunaqa manachá Nínive runakuna jinaqa manchachiwasunmanchu ¿riki?

¹³ ¿Ima consejokunan yanapawasunman kallpachanapaq jina comentananchispaq? Qatimuqpi wakinmanta yachasun.

14. a) ¿Imaraykun allinta preparakunanchis juñunakuykunapaq? b) ¿Imay ratopin preparakusunman?

¹⁴ Juñunakuykunapaq preparakusun. Sichus tiemponchista t’aqasun allinta preparakunapaq chayqa, mana manchakuspan comentasun (Efes. 5:16). Ichaqa manan kaq situacionpichu llapanchispas tarikunchis. 80 watanpi Eloise hermananchismi Qhawaq revistata preparakuyta qallarin semana qallariyta. Paymi nin: “Ñaupaqmanta preparakuqtiymi astawan entiendeni juñunakuypi”, nispa. Joy sutiyoq hermananchisqa ch’isiyaqmi llank’an, payqa juñunakuypaq juj p’unchay faltashaqtinmi preparakun,  chhaynapi aswan facilta yuyarin estudiasqanta. Ike hermanonchisqa umalliqmi precursortaqmi kanpas, imaymana ruwanayoq kasqanrayku payqa nin: “Juj p’unchayllapi preparakunaymantaqa semanantinmi pisi-pisimanta preparakuni”, nispa.

15. ¿Imaynatan allinta preparakusunman?

¹⁵ ¿Imaynatan allinta preparakusunman? Ñaupaqtaqa Diospa santo espirituntan mañakunanchis (Luc. 11:13; 1 Juan 5:14). Chaymantataq leenanchis titulota, subtítulo nisqakunata, qhawananchismi chaypi kaq fotokunata, recuadrokunatapas. Chaymantataq sapanka parrafota leenanchis entiendenanchiskama, atispaqa llapa textokunatan leenanchis. Imachus yachasqanchispitaq piensananchis astawanqa mayqen yachachikuykunatas comentayta munanchis chaykunapi. Aswan allinta preparakusun chayqa, allintan entiendesun, mana manchakuspataq comentasun (2 Cor. 9:6).

16. ¿Ima programakunatan utilizashanki? ¿Imaynatan utilizanki?

¹⁶ Tabletpi, celularpi, computadorapi programakunata utilizasun. Jehová Diosmi llaqtanwan imaymana programakunata qowanchis allinta preparakunanchispaq. Celularninchispi otaq tabletninchispin JW Library^® nisqa programata instalasunman, jinaspa chaypi descargasunman juñunakuypi utilizanapaq qelqakunata. Chaytaqa maypipas otaq ima ratopipas leesunman, estudiasunman otaq uyarisunman. Wakinqa llank’anankupi, escuelankupi samananku rato estudianku, jujkunataq viajaspa. Watchtower Library nisqa, INTERNETPI QELQANCHISKUNA^™ nisqa programakunapas yanapawasunmanmi aswan allinta estudianapaq.

17. a) ¿Imaraykun askha comentariokunata preparakunanchis? b) ¿Imatan yacharanki Jehová Diospa amigon kay: Juñunakuypi kutichinaykipaq preparakuy videopi?

¹⁷ Sapanka estudiopaq askha comentariokunata preparakusun. Juñunakuyta dirigiqqa manan makinchista sapa kuti oqariqtinchischu comentachiwasun. Yaqapaschá jujkunapas makinkuta oqarinqaku, jinaspa dirigiqqa payta asignanman comentananpaq. Jinaspapas tiempollanpi juñunakuyta tukunanpaqmi mana llapanchistachu comentachiwasun. Chaymi qallariypi mana comentachiwaqtinchisqa mana phiñakunachu, nitaq desanimakunachu. Askha comentariokunata preparasun chayqa, atisunmi comentayta. Yaqapaschá makinchista oqarisunman Bibliamanta textota leenapaq otaq entiendesqanchisman jina comentasunman. *

18. ¿Imaraykun pisillata rimaspa comentananchis?

 ¹⁸ Pisillata rimaspan comentananchis. Pisillata rimaspa comentariokunan astawanqa kallpachawanchis. Chaymi kuskan minuto jinallata duranan comentasqanchisqa (Prov. 10:19; 15:23). Astawanqa askha watakunaña Jehová Diosta serviqkunan chaypiqa ejemplo kananku. Sichus paykuna comentashaspa imaymanamanta rimanqaku iskay-kinsa minuto jina chayqa, mosoqkunan mana munankumanchu comentayta, “manan chay hermanokuna jinaqa comentayta atiymanchu” nispanku. Chaymantapas pisillata rimaspa comentasun chayqa, jujkunapas comentaytan atinqaku. Sichus juj parrafopi tapuyta ruwaq ñaupaqta asignawanchis chayqa, tapusqallantan kutichinanchis, manan llapa parrafomantachu rimananchis. Chay qhepamanmi ichaqa chay parrafomanta jujkuna comentankuman (qhaway “ ¿Imakunamantan comentawaq?” nisqa recuadrota).

19. ¿Imaynatan estudiota dirigiq yanapawasunman? Ichaqa, ¿imatan ruwananchis?

¹⁹ Estudio dirigiqtan nisunman ima parrafotas comentayta munasqanchista. Sichus chayta ruwayta munanchis chayqa, manaraq juñunakuy qallarishaqtinmi dirigiqta nisunman. Comentananchis parrafopaq tapuyta ruwaqtintaq usqhayta makinchista altota oqarinanchis rikuwananchispaq.

20. ¿Imaynapin juñunakuyninchiskuna comparakun amigonchiskunawan kuska mijusqanchiswan?

²⁰ Juñunakuyninchiskunaqa comparakun amigonchiskunawan kuska mijusqanchiswanmi. Sichus hermanonchiskuna wasinkuman invitawasunman chayqa, noqanchispas apananchismi imallatapas. Qallariypiqa manapaschá yachasunmanchu ima apayta. Chaywanpas allinta piensaykuspaqa llapanman gustasqantan apanchis. Diosninchispas imaymanatan juñunakuykunapi yachananchispaq preparan, paytaqmi invitawanchispas (Sal. 23:5; Mat. 24:45). Payqa kusikunmi atisqanchisman jina imallatapas apaqtinchis. Chhaynaqa allinta preparakusun, atisqanchisman jinataq comentasun. Chayta ruwaspaqa manan noqallanchischu Diospa mesanmanta mijusun jujkunapas mijullanqakutaqmi.