MANAN hayk’aqpas kunan hinaqa askha religionkuna karanchu. Chayllaraq investigación ruwakusqanpin yachakun chunka isqonniyoq hatun religionkuna kasqanta, huch’uy religionkunataq chunka waranqa. Chhaynaniraq religionkuna kasqanta yachaspaqa tapukunkipaschá: “¿Haykupullaymanchu mayqen religionmanpas?” nispa.

Wakin runakunan ninku: “Ima religiomantaña kanchis chaypas hukllan tukuy atiyniyoq Diosqa, llapa religionkunataqmi paymanta yachachinku”, nispa. “Llapa religionkunapas huk cheqasllaman chayanapaq ñankuna hinan”, nispan chaywanqa nishanku.

Chaypaq yachasun religionpi aswan allin yachachiq wiraqocha Jesuspa nisqanmanta. Paymi qatikuqninkunata niran: “K’illku punkunta haykuychis”, nispa. ¿Imarayku chayta niran? Payllataqmi khaynata kutichiran: “Hatunmi punkuqa, hatuntaq chinkayman pusaq ñanpas, askhataqmi chayninta haykuqkunaqa; k’illkun punkuqa, k’illkutaq kausayman pusaq ñanpas, pisillataqmi chayta tariqkunaqa”, nispa (Mateo 7:13, 14, MR).

¿Wakin religionkunaqa ‘chinkaymanmi’ runakunata apayun, nispachu Jesús chaypi nisharan? Wakin  runakunan ninku: “Diospi mana iñiq runakunamantan chaytaqa nishan, Diospi iñiqkunaqa llapallanchismi ima religionmantaña kanchis chaypas k’illku ñanninta purishanchis”, nispa. ¿Cheqaqchu chay nisqanku?

Chayta yachanapaq astawan t’aqwirisun Jesuspa nisqanta. Kaytan niran: “Llulla profetakunamanta allinta cuidakuychis. Paykunan hamusunkichis ovejaman tukuspa, sonqonkupitaq ichaqa yarqasqa atoqkuna hina kanku”, nispa (Mateo 7:15). Chay qhepamanmi nillarantaq: “Manan llapa “¡Señor! ¡Señor!” niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa”, nispa (Mateo 7:21). Chay textokunapi ‘profetakuna’ nispa sutichasqanpi, Cristota ‘¡Señor! ¡Señor!’ nispa wakyakusqankupi iman yachanchis “chinkayman” pusaq runakunaqa religionkuna kasqanta. Arí, Jesusqa sut’itan chaywan willawashanchis mana llapa religionkunachu cheqaqta yachachisqankuta.

Ñawpaqpi yachasqanchis hina askha religionkunan kan manataqmi llapankuchu cheqaqta yachachinku, chhaynaqa, ¿imaynapin tariwaq kawsayman apaq religionta? Chayta yachanaykipaq kaypi yuyaykuy. Mana reqsisqayki llaqtapi chinkasqa kashawaq, hinaspa chaypi tiyaq runakunata tapukuqtiyki huknin nisunkiman: “Wichayman riy” nispa, huktaq: “Urayman riy” nispa, huktaq: “Maymanpas riy”, nispa. Chhaynata nisuqtiykikuqa “Yanqañamá tapukuni” niwaqchá. Chayllamanmi ichaqa huk runa mapata horqomuspa qhawachisunkiman may ñanninta rinaykipaq hinaspa mapanta saqeyusunkiman chayta qhawa-qhawayuspa chayanaykipaq. Chay mapawanqa chayawaqpunichá may risqaykimanpas.

Ñoqanchispas huk mapata hinan necesitanchis cheqaq religionta tarinapaq. ¿Kanchu chhayna hina mapanchis? Arí kanmi, chay mapaqa Biblian. Bibliallan “Diospa yuyaychasqan, chayraykun allinpuni yachachinapaq, anyanapaq, wanachinapaq, chanin kawsayta yachachinapaq” (2 Timoteo 3:16).

Quechua simipipas kanmi Bibliakuna, qanpapas kashanchá. Kay qelqakunata ruwaq Jehová Diospa testigonkunan ichaqa askha simikunapi kaq Traducción del Nuevo Mundo de las Santas Escrituras nisqa Bibliawan yachachinku. Cheqaq religionta tarinaykipaqqa mayqen Bibliatapas t’aqwiriwaqmi. Kay revistan ichaqa quechua simipi Bibliakunamanta qelqasqa kashan.

Kay temakunata leesqaykiman hina yachasqaykita tupanachiy Bibliaq yachachisqanwan. Yuyariy Jesuspa nisqanta: “Llapa allin sach’aqa allin rurukunatan rurun, mana allin sach’akunan ichaqa mana allin rurukunata rurun. Allin sach’aqa allintakamallapunin rurun, mana allin sach’ataq mana allintakamallapuni rurun” (Mateo 7:17, 18). Kunanmi ‘allin sach’ata’ otaq cheqaq religionta tarinapaq Bibliaq nisqanman hina qhawarisun kinsa rurukunamanta.