Manan llapa religionkunachu Diosman asuykunapaqqa yanapawanchis. Bibliapin willashan imayna religionkunas Diosta mana kusichinchu chayta. Chayta kaypi astawan yachasun.

Jujnin kaq t’aqa: Pantasqa dioskunata adoraqkuna

 Biblian nishan pantasqa dioskunata adorayqa mana allinchu kasqanta (Jeremías 10:3-5; 16:19, 20). Ñaupa tiempopi Israel llaqtantan Jehová Dios a nirqan: “Aman noqamanta waj diosniykiqa kanqachu”, nispa (Éxodo 20:3, 23; 23:24). Chaymantapas Israel runakuna waj dioskunata adoraqtinkun “Jehová Diosqa sinchita phiñakurqan” (Números 25:3; Levítico 20:2; Jueces 2:13, 14).

 Kunanpas Diosqa manan munanchu askha “dios nisqakunata” adorananchista (1 Corintios 8:5, 6; Gálatas 4:8). Jinaspapas payta serviyta munaq runakunatan nin pantasqa religionkunamanta lloqsipunankupaq. Khaynatan nishan: “Lloqsipuychis paykuna ukhumanta, arí, t’aqakuychis paykunamanta”, nispa (2 Corintios 6:14-17). Sichus llapa religionkuna yanapawasunman Diosman asuykunapaq chayqa, manan Diosqa chayta kamachinmanchu karqan.

Iskay kaq t’aqa: Diospa mana munasqanman jina adoraqkuna

 Israel runakunaqa tiempowanmi pantasqa dioskunata adorasqaku, costumbrenkuwanmi Jehová Dios adorayta qhellichapurqanku, jinan Jehová Diosqa paykunamanta karunchakapurqan (Éxodo 32:8; Deuteronomio 12:2-4). Jesuspas tiemponpi kaq religionpi umalliqkunatan juchacharqan Diosta mana allinta adorasqankumanta. Paykunaqa qhawarinallapaqmi Dios sonqo runa jina kasharqanku, ichaqa iskay uyakunan karqanku “kamachikuy simimanta aswan allin kaqkunatan mana ruwasharqankuchu, chaykunan karqan: chanin kay, khuyapayakuq kay, junt’aq kay ima” (Mateo 23:23).

 Juj religionllan Diosman asuykunanchispaqqa yanapawanchis, chay religionqa Bibliapi cheqaq yachachikuyman jinan kashan (Juan 4:24; 17:17; 2 Timoteo 3:16, 17). Bibliaq nisqan contra yachachiq religionkunaqa astawanmi runakunata Diosmanta karunchanku. Askha runakunan mana yachankuchu Trinidadmanta, mana wañuq almamanta, infiernomanta yachachikuykunaqa pantasqa kasqanta, chay yachachikuykunaqa pantasqa dioskuna yupaychaymantan rijurimurqan. Diosqa manan chaskinchu chay pantasqa yachachikuykunawan adoraq religiontaqa, chay religionqa Diospa kamachisqanta saqerparispa pantasqa religionkunaq costumbrenman jinan ruwashan (Marcos 7:7, 8).

 Chaymantapas, Diosqa cheqnikunmi iskay uya religionkunata (Tito 1:16). Diosman asuykunanchispaq yanapawaqninchis religionqa allinta kausananchispaqmi yanapawananchis. Biblian nin: “Pipas “Diosta adoraqmi kani” nishaspa qallunta mana watanmanchu chayqa, pay kikintan engañakushanman, yanqapaqtaqmi Diostapas adorashanman. Taytanchis Diospa qhawarisqanman jinaqa, ch’uya mana ima qhelliyoq adorayqa ñak’ariypi tarikuq wajcha wawakunata viudakunatawan cuidaymi, kay pacha kausaywanpas mana qhellichakuymi”, nispa (Santiago 1:26, 27). Ch’uya otaq cheqaq adoray imayna kasqanmantan La Palabra de Dios para Todos nisqa Bibliapi nin: “Ch’uya religión”, nispa.