Kusisqan kashayku Jehová Diospa testigonkuna imachus ruwasqankumanta yachay munasqaykimanta. Kaypin reqsinki wakin utilizasqayku palabrakuna imaninanchus chayta, chay palabrakunatan utilizayku qelqakuna ruwasqaykupi. Imamantapas astawan yachayta munanki chayqa Jehová Diospa testigonkunaq sucursalninmanmi qelqawaq.

Asamblea. Qhaway:  Juj p’unchay asamblea nisqata.

Jehová Diospa testigonkunaq asamblea ruwananku localkuna. Chayqa Jehová Diospa testigonkunaq juñukunanku localmi, paykunataqmi chaykunamanta dueño kanku, chay localkunapiqa sapa kutillanmi askha iñiq t’aqakuna juñukunku. Chaytan nikullantaq “asambleata ruwanapaq local” nispa.

¡Rijch’ariy! Kay qelqataqa Jehová Diospa testigonkunan ruwanku, paykunataqmi rakinkupas. 1919 watamantapachan ruwayta qallarikurqan La Edad de Oro nisqa sutiwan, 1937 watapitaq Consolación nisqa sutiman cambiapurqanku, chaymantataq 1946 watamanta 22 agosto killamanta ¡Rijch’ariy! nisqa sutiman cambiarqanku. Llapa runakunan yachananku kay tiempopi imakunachus pasashasqanta. ¡Rijch’ariy! sutitan churakurqan imaraykuchus kay pachapi imaymana pasashasqanta runakuna allinta reparanankupaq. Chay revistaqa mundontinpi aswan rakisqa qelqakuna ukhupin tarikun.

Betel, Betelita, Betel wasipi llank’aqkuna. “Betel” simiqa hebreo simimantan jamun, chayqa “Diospa wasin” ninantan nin. Jehová Diospa testigonkunaqa Diospa simintan runakunaman willashanku, chayta allinta ruwakunanpaqmi Betelpi llank’aq hermanokunaqa yanapakunku. Chay localkunapi llank’aq hermanokunatan “Betelita” nispa nikun. Paykunaqa manan sueldoyoqchu kanku. Chaymantapas Betelpi llank’aq hermanokunaqa juj familia jinan kuska Diosta adoranku llank’anku ima, chaymi paykunataqa “Betel wasipi llank’aqkuna” nispa nikullantaq. Chaypi llank’aq hermanokunataqa manan jujkunamanta aswan allinpaqchu qhawarinku, nitaq jatunchasqapaschu kanku.

Sucursalmanta encargakuqkuna. Kinsa otaq más hermanokunan Jehová Diospa testigonkunaq jujnin sucursalninmanta encargakunku. Chay sucursalpi llank’aq hermanokunaqa juj nacionmanta, mayninpitaq askha nacionpi tiyaq iñiqmasikunaq llank’aynintan qhawarinku, chaymantapas chay hermanokunatan yanapanku Diosmanta willayta allinta aparinankupaq.

Sucursal wasi. Chaypi llank’aq hermanokunaqa Jehová Diospa testigonkunatan Dios serviyninkupi yanapanku, chaypi llank’aq hermanokunaqa mayninpiqa askha nacionmanta iñiqmasikunatan qhawarinku. Chaytan nikullantaq “Jehová Diospa testigonkunaq sucursalnin” nispa.

Hermano. Jehová Diospa testigonkunamanta bautizasqa qharitan hermano nispa nikun. Minusculallapin hermano nisqa palabrata utilizakun. Ichaqa yaqapaschá juj hermanomanta rimashaspa apellidonmanta payta nikunman. Chhayna kaqtinpas hermano palabraqa minusculallapin qelqakunman ejemplopaq, hermano Quispe. Ichaqa chayta nispaqa manan paytaqa jatunchakushanchu. Juj hermanatapas apellidonmanta nikullanmantaq hermana Quispe nispa (1 Pedro 5:9).

Circuito. Jehová Diospa testigonkunamanta askha juñunasqa iñiq t’aqakunatan chay sutiwan reqsikun.

 Juj p’unchay asamblea. Chay p’unchaypin Jehová Diospa testigonkunamanta askha iñiq t’aqakuna juñunakunku, watapi iskay kutitan juñunakunku. Chay juñunakuymanqa pipas rillanmanmi, chay juñunakuypiqa ajllasqa hermanokunan Bibliaq nisqanman jina yachachimunku. Chaymi chay asambleakunaqa chayman riqkunata yanapan Diosman astawan asuykunankupaq. Chaymantapas chay juñunakuykunaqa ruwasqa kashan wawakunata, tayta-mamakunata, wayna-sipaskunata, kuraqkunata yanapananpaq jinan. Chaymantapas actuacionkunatan rikukun, chaypin hermanokunaqa actuanku imaynatas imapipas tarikuspa Bibliaq nisqanman jina ruwankuman chayta. Chay asambleakunaqa askha llaqtakunapin Jehová Diospa testigonkunaq jatun localninkunapi, alquilasqa localkunapi ima aparikun, chaymantapas chay juñunakuytaqa qhawallankumantaqmi internetnintapas. Chay juñunakuykunaqa semana tukuytan aparikun. Gratisllan, manataqmi pimantapas qolqeta mañakunchu.

Watukuq umalli. Sucursalpa ajllasqan allin iñiyniyoq umalliqmi esposanwan askha iñiq t’aqakunata watapi iskay kutita visitan. Chay visita ruwasqanpin iñiqmasikunata iñiyninkupi allinta kallpachan. Chaymantapas chay iñiq t’aqapi umalliqkunata yanapakuq qharikunata iman sumaqta yuyaychan kallpachan ima. Watukuq umalliqkunaqa sapanka iñiq t’aqata visitanankupaqmi allinta preparakunku, chhaynapi visitasqanku iñiqmasikunata allinta kallpachanankupaq. Chay hermanokunatapas manan jatunchankuchu.

Iñiq t’aqa. Jehová Diospa testigonkunamanta juñunasqa iñiqmasikunatan chay sutiwan reqsikun, paykunaqa sapa kutillanmi kuska juñunakunku Diosta adoranankupaq. Juj iñiq t’aqapiqa kanmi umalliqkuna, paykunan chay iñiq t’aqapi iñiqmasikunata iñiyninkupi yanapanku, juñunakuypi yachachinku, chaymantapas sapanka iñiqmasitan iñiyninkupi yanapanku. Chay juñunakuykunamanqa pipas rillanmanmi. Gratisllan, manataqmi pimantapas qolqeta mañakunchu.

Jatun asambleakuna. Qhaway:  Askha nacionmanta asamblea,  kinsa p’unchay asamblea nisqata.

Umalliq. Jehová Diospa testigonkunamanta wakin allin iñiyniyoq hermanokunan ajllasqa kanku umalliq kanankupaq, paykunaqa iñiq t’aqapin sumaqta yachachinku kallpachanku ima. Juj hermano umalliq kananpaqqa 1 Timoteo 3:1-7; Tito 1:5-9; Santiago 3:17, 18; 1 Pedro 5:2 textokunapi kamachikuykunatan junt’ashanallan. Umalliqkunamanqa manan pipas paganchu, chaymantapas paykunaqa manan juj empleado jinachu qolqeta gananku. Manan sucursalmanta encargakuq hermanokunapas paykunamanqa pagankuchu. Yaqa llapa umalliqkunan juj iñiqmasikuna jina llank’anku mantenekunankupaq, familiankuta mantenenankupaqpas. Jehová Diospa testigonkunaqa manan alto puestoyoqpas kankuman jinatachu umalliqkunataqa qhawarinku. Manataqmi paykunataqa jatunchankuchu.

 Diosmanta willay. Llapa testigokunan runamasinkuman Diospa gobiernonmanta willanku. Chaytaqa ruwanku Jesuspa kamachisqanta kasukuspan. Paymi kamachirqan Diospa gobiernonmanta llapa runakunaman willanankupaq (Mateo 24:14; 28:19).

Galaad escuela. 1943 watapin chay escuelaqa qallarirqan, chay escuelaman riq hermanokunataqa misionero kanankupaqmi qallariypiqa capacitakurqan. Chay escuelapiqa pisqa killan Bibliapi kaq yachachikuykunata allinta estudianku. Galaad escuelamanta juj qelqapi rimakushaqtinqa escuela simitaqa minusculallapin qelqakun.

Jehová Diospa testigonkunata Umalliq T’aqa. Juj t’aqa hermanokunan ajllasqa kanku mundontinpi kashaq iñiqmasikunata pusarinankupaq, paykunatan Umalliq T’aqa nispa nikun. Paykunan encargakunku Bibliaq nisqanman jina qelqakunata ruwakamunanpaq. Paykunan qhawarinku pachantinpi tiyaq Jehová Diospa testigonkunaq llank’ayninta, ichaqa yachankun Jesucristo llapa iñiqmasikunata umallishasqanta. Umalliq T’aqaq oficinankunaqa Warwick, Nueva York, Estados Unidos nacionpin tarikun.

 Askha nacionkunamanta asamblea. Chay asambleakunaqa kinsa p’unchaymi mundontinpi wakin watakuna aparikun. Chaypaqqa ñaupaqmantan qhawarinku may llaqtakunapichus aparikunanta. Wakin nacionkunamanta Jehová Diospa testigonkunatan invitakun chay asambleaman rinankupaq. Chay juñunakuymanqa rillankumantaqmi pi runapas. Chaypi yachachimuq hermanokunaqa jujkunata kallpachanankupaq jinan rimamunku, chaymantapas chay asambleakunaqa yanapanmi mundontinpi tiyaq hermanokunata juj nisqalla kausayta yachanankupaq. Chay asambleakunata ruwakunanpaqqa jatun localkunatan alquilanku, chaymantapas chay asambleaqa viernes p’unchaymanta domingo p’unchaykaman aparikun. Gratisllan, manataqmi pimantapas qolqeta mañakunchu.

Jehová. Chaymi tukuy atiyniyoq tukuyta kamaq Diospa sutin, chaytan Bibliapi willashan (Salmos 83:18). Manan chay sutitaqa utilizakunmanchu Jehovaq runan nispaqa. Aswanpas Diosta serviq runamanta rimaspaqa nikunmanmi: “Jehová Diospa testigon otaq Jehová Diospa testigonkuna”, nispa.

 Jehová Diospa testigonkuna. Paykunaqa Jesucristotan qatikunku, chaymi cristianokuna kanku. Paykunaqa Jehová Diostan adoranku, kallpachakunkutaq Bibliamanta runamasinkuman yachachinankupaq. Astawanqa Diospa gobiernonmanta allin willakuykunatan jujkunaman willanku (Mateo 24:14). Juj religionkunawan paykunata ama pantanankupaqmi Bibliapi nisqanman jina chay sutita churakurqanku, chaymantapas chay sutin rikuchin Diosmanta willaypi ocupasqa kasqankuta. Juj runa Jehová Diospa testigon kananpaqqa Bibliamanta importante yachachikuykunatan entiendenan, chayman jinataq kausanan, juj hermanokunawan kuska Diosmanta willanan, chaymantapas Diosman entregakuspan bautizakunan. Juj hermanollamanta rimakushaspaqa “testigo” nikunmanmi, askha iñiqmasikunamanta rimaspataq “testigokuna” nispa nikunman otaq “Jehová Diospa testigonkuna” nispa (Isaías 43:10).

Jesucristo. Payqa Diospa phiwi churinmi (Juan 3:16). Jehová Diospa testigonkunaqa umalliqninkuta jinan Jesusta qhawarinku, kallpachakunkutaq pay jina kanankupaq, yachachisqanman jina kausanankupaqpas. Jehová Diospa testigonkunapaqqa manan pipas Jesús jinaqa kay pachapi karqanchu. Jesusqa Jehová Diospa ñaupaq kaq testigonmi karqan. Diosqa Jesustan kay pachaman kachamurqan runakunata salvananpaq, paywantaqmi runakunapaq llapa imachus munasqanta junt’anqa (Isaías 9:6, 7; Apocalipsis 1:5).

Jehová Diospa testigonkunaq juñunakunanku wasi. Chay localpin juj iñiq t’aqa otaq askha iñiq t’aqakuna juñunakunku. Chay localtan nikullantaq juñunakunanku wasi nispa. Ama jinachu kay, ama chay localniykuta iglesia niychu.

Jesuspa wañupusqanta yuyarinapaq juñunakuy. Jehová Diospa testigonkunaqa watapi juj kutitan Jesuspa wañupusqanta yuyarinku, chay juñunakuytaqa Señorpa cenan nikullantaqmi. Jehová Diospa testigonkunapaqqa ancha importanten chay juñunakuyqa, Jesuspunin discipulonkunata kamachirqan wañupusqanta yuyarinankupaq (Lucas 22:19, 20).

Chaupi semana juñunakuy. Chay juñunakuytaqa chaupi semanapin aparikun tardeyaykuyta otaq tutata. Chay juñunakuyqa kinsa partepin t’aqasqa kashan, chay juñunakuypi yachachikuykunan iñiqmasikunata yanapan Diosmanta allinta willamunankupaq. Chay juñunakuytaqa uyarillankumantaqmi internetpipas. Chay juñunakuyqa gratisllan manan qolqetaqa mañakunchu.

Yanapakuq qhari (siervo ministerial). Iñiq t’aqapi umalliqkunata yanapanankupaqmi wakin hermanokunata nombranku yanapakuq qhari otaq siervo ministerial kanankupaq. Juj hermano yanapakuq qhari kananpaqqa 1 Timoteo 3:8-10, 12, 13; Tito 2:2, 6-8 textokunapi kamachikuykunatan junt’anan. Yanapakuq qharikunaqa iñiq t’aqapin imaymanapi yanapakunku. Paykunamanpas manan qolqeta pagankuchu yanapakusqankumanta, manan sucursalmanta encargakuq hermanokunapas paykunamanqa pagankuchu. Yaqa llapa yanapakuq qharikunan llank’anku mantenekunankupaq, familiankuta mantenenankupaqpas. Wakin yanapakuq qharikunaqa tiempowanqa umalliqmi kapunku, chaypaqmi ichaqa umalliq kanankupaq kamachikuykunata junt’ananku. Manan paykunataqa jatunchakunchu.

Misionero. Bautizasqa testigokunan kanku, paykunaqa Jehová Diospa testigonkunata Umalliq T’aqaq kachasqanmi jinantinman rinku. Misionerokunaqa liston kashanku wasinkutapas tukuy imankutapas saqespa juj lado nacionkunaman astakunankupaq, jinaspa Diospa gobiernonmanta chaypi willamunankupaq (Mateo 24:14).

Mosoq Pacha Biblia. Jehová Diospa testigonkunaq t’ijrasqanku Biblian chay sutita apan. Chaypiqa kashan hebreo rimaymanta Antiguo Testamento, griego rimaymanta Nuevo Testamento llapa librokunan.

Precursor. Paykunaqa bautizasqa testigokunan kanku, askha horakunata Diosmanta willanku. Precursor regular nisqa iñiqmasikunaqa watapin 600 horasta Diosmanta willanku, chaypaqmi sapa killa 50 horasta jina Diosmanta willananku. Precursor auxiliar iñiqmasikunataq mayninpi 15 horasta otaq 30 horasta wakin killakuna Diosmanta willanku. Precursorkunamanqa manan qolqeta pagakunchu chayta ruwasqankumanta. Manan sucursalmanta encargakuq hermanokunapas paykunamanqa pagankuchu. Yaqa llapa precursorkunan llank’anku mantenekunankupaq. Manan paykunatapas jatunchakunchu.

Predicación. Qhaway:  Diosmanta willay nisqata.

Llapa runapaq juñunakuy. Sapa semananmi chay juñunakuyqa aparikun semana tukuyta, chaypin juj hermano 30 minutopi llapa runapaq juj yachachikuymanta rimamun. Chay qhepamantaq juj horapi jina Bibliamanta juj yachachikuyta estudianku Qhawaq revistaq yanapayninwan. Chay estudiopiqa ñaupaqmantan juj hermano tapuykunata ruwamun, uyariqkunataq chay tapuykunaman kutichinku. Chay juñunakuytaqa internetnintapas uyarinkumanmi, chay juñunakuypiqa manan qolqeta mañakunchu.

Publicador. Juj publicadorqa Jehová Diospa testigonkunawan kuskan runamasinman Diosmanta willan. Chaypaqqa ñaupaqtan entiendenanña Bibliamanta importante yachachikuykunata, Diospa kamachisqanman jinataq kausayninpas kanan. Paykunamanpas manan pagankuchu chayta ruwasqankumantaqa, manan sucursalmanta encargakuq hermanokunapas paykunamanqa pagankuchu. Manan paykunatapas jatunchankuchu.

 Kinsa p’unchay asamblea. Askha iñiq t’aqakunan watapi juj kutita juñunakunku chay asambleata aparinankupaq, chaypiqa Bibliaq nisqanman jina yachachikuykunatan uyarinku. Chay juñunakuymanqa pipas rillanmanmi. Chaypi yachachikuykunaqa ruwasqa kashan llapa runapaq jinan. Chay asambleataqa jatun localkunapin ruwakun, chaymantapas chay juñunakuykunapiqa pisillapin videokuna rikukun imaynatas iñiqmasikuna imapiña tarikuspapas Bibliaq nisqanman ruwankuman chayta. Wakin asambleakunaqa Jehová Diospa testigonkunaq jatun localninkunapin aparikun. Chay asambleakunaqa viernes p’unchaymanta domingo p’unchaykaman aparikun. Kay último watakunapin chay asambleata grabasqata internetpi churakurqan. Chay juñunakuyqa Jehová Diospa testigonkunaq llapa juñunakuyniyku jinan gratislla kallantaq, manataqmi pimantapas qolqeta mañakunchu.

Hermana. Jehová Diospa testigonkunamanta bautizasqa warmitan hermana nispa nikun. Chay simitaqa minusculallapin qelqakun. Mayqen hermanamantapas apellidonmanta rimakushaspaqa hermana palabraqa minusculallapin qelqakun, ejemplopaq hermana Castro. Chayta nispaqa manan hermanataqa jatunchakushanchu.

Qhawaq, Jehová Diospa Gobiernonmanta Willashan. Jehová Diospa testigonkunaq ruwasqanku revistan chay sut’ita apan. Chay revistataqa Qhawaq nispapas nikullantaqmi. Chay sutitaqa churakurqan Diospa munaynin junt’akushasqanmanta rijch’asqalla kashananchispaqmi (Mateo 24:42). Chay revistaqa ruwakullantaqmi llapa runakunaq leenanpaqpas. Gratisllataqmi chay revistataqa leeyta munaqkunaman qonku. Chaymantapas ruwakullantaqmi Qhawaq revistata Jehová Diospa testigonkunaq juñunakuyninpi estudianankupaq. Jinaspan sapa semana juj yachachikuyta estudianku, chaypaqmi juñunakuyta apariq hermano tapuykunata ruwan, uyariqkunataq chay tapuykunaman kutichinku imachus entiendesqankuman jina. Qhawaq revistataqa 1879 watamantapachan ruwakuyta qallarikurqan, chay revistaqa mundontinpi aswan rakisqa qelqakuna ukhupin tarikun.

WILLAKUY: Noqaykumanta qelqayta otaq willayta munanki chayqa, ama jinachu kay, Jehová Diospa testigonkuna nisqa sutita junt’asqata churay. Astawan yachanaykipaq jaykuy:  Jehová Diospa testigonkuna nisqaman.