Bibliapica ñucanchi munai carana cashcata, tucui shunguhuan carana cashcatapashmi yachachin. Chashna rurajpica carajpi japijcunallaca na cushijungachu, ñucanchipashmi cushijushun (Proverbios 11:25; Lucas 6:38). Jesusca cashnami nirca: “Carajpi japijcunatapash yalimi carajcunaca, ninanda cushijun” (Hechos 20:35).

•  ¿Ima hora caranata ali canga?

•  ¿Ima hora caranata nali canga?

•  Caranamandaca Bibliapimi yachachin

 Ñucanchi munai carashpami Bibliapi nishcashnaca ali sintirishun. Bibliapica nijunmi: “Tucuicunallata cangunapaj shungupi yarichishcatami, carana canguichi. Na llaquirishpami carana canguichi. Mandajpillapash na caranachu canguichi. Taita Diosca, cushijushpa carajtami juyan” (2 Corintios 9:7).

 Taita Diosca paita juyajcunaca tucui shunguhuan carachun munan (Santiago 1:27). Imagutapash na charijcunaman carashpaca Taita Diostami ayudanajunchi. Chaimi Taita Diosca ñucanchiman dibinshna sintirin (Proverbios 19:17). Chashna rurajpica Bibliapi nishcashnami Taita Diosca bendicianga (Lucas 14:12-​14).

 Ñucanchipallata ali cachun caranami nali can. Caipi yuyapai:

•   Shujcuna ricuchunlla (Mateo 6:2).

•   Ñucanchiman imatapash carachunlla (Lucas 14:12-14).

•   Salvaringapajlla munaimanda carana (Salmo 49:6, 7).

 Taita Dios na gushtashca cosascunata ama rurashpa catichunmi culquita caranaca nali can. Caipi yuyapai: apostachun, machachun, drogarichun culquita caranaca nalichu can (1 Corintios 6:9, 10; 2 Corintios 7:1). Shinallata maijanbash trabajaita ushashpapash na trabajangapaj munanman culquita caranaca nalichu can (2 Tesalonicenses 3:10).

 Taita Diospa mandashcata na pactachijcunaman culquita caranami nali can. Bibliapica cusacunami paicunapa familiapa minishtirishcacunataca cuna can ninmi (1 Timoteo 5:8). Shujcunaman caraimanda paicunapa familiatara descuidanaca nalichu can. Shinallata taitamamacunapa minishtirishcacunata na carangapaj munajcunataca Jesusca nalicachishpami ricun carca. Paicunapa charishcacunaca “Taita Diosman carangapajmi tiajun” ninmi carca (Marcos 7:9-13).