Daniel capítulo 4​pica Taita Diospa Gobiernoca 1914 huatapi jahua cielopi mandai callarishca profeciatami ricuchin.

 Imashinata cai profeciaca pactarina carca. Taita Diosca Babilonia llactamanda rey Nabucodonosortami shuj muscuita muscuchirca. Rey Nabucodonosorca jatun jatun yura fiti tucushcata shinallata chai yura fitishca tronco na viñashpa “canchis huatacaman” yalina cashcatami muscurca. Chai yura fitishcaca canchis huata pactajpimi cutin viñana carca (Daniel 4:1, 10-16).

 Imashinata cai profeciaca pactari callarirca. Cai jatun yuraca rey Nabucodonosortallatami ricuchijurca, rey Nabucodonosorca loco tucushpami rey tucunata saquirca shinami chai yuyai fiti tucushcashna quidarca. Loco tucushcamandaca 7 huatacunami yalirca. Rey Nabucodonosor ali tucushpaca cutinmi rey tucurca shinapash Taita Dioslla mandangapaj autoridadta charijtami intindirca (Daniel 4:20-22, 25, 34-36).

 Cai profeciaca Taita Diospa Gobiernohuanmi ashtahuan pactarina carca. Cai profeciapi imata ningapaj munashcata ricupashun: “Runacuna mandana llactataca, jahua pachapi causajuj Dios mandajujta cai pachapi causajcuna yachachunmi, chashna villarca. Chai mandanataca pai piman cungapaj munashpapash cujlla cajta, pai munashpaca tucuicunata yali yangalla runatapash mandanapi churajlla cajta yachachunmi, shina villarca” (Daniel 4:17). ¿Jariyashca Nabucodonosortachu Taita Diosca paipa mandanapi churanman carca? Na. Taita Diosca shuj profeciapica ni paipash, ni shuj mandajcunapash na mandana cashcatami ricuchirca. “Taita Diosllatami ima horapash na tucuchi, tucuna mandana llactata churanga” (Daniel 2:31-44).

 Taita Diosca punda tiempopica pailla mandana derechota charishcata ricuchingapami Israel llactataca agllarca. Israel llactata mandajcuna na cazushcamandami chai llactataca llaquichirca. Shinapash mandanata japingapaj shamugrijujmanmi Taita Diosca paipa autoridadta cugrijurca (Ezequiel 21:25-27). Bibliapica Jesusmi ima horapash na tucuchi tucuna gobiernota japina derechota charishcata ricuchin (Lucas 1:30-33). Rey Nabucodonosorca jariyashcami carca. Daniel capítulo 4​pi nishcashnaca Jesusca “humildemi can” (Mateo 11:29).

 Rey Nabucodonosor muscushca yuraca ¿ima profeciatata ricuchin? Huaquinbica Bibliapi yuracunamanda parlashpaca gobiernocunatami ricuchin (Ezequiel 17:22-24; 31:2-5). Daniel capítulo 4​pi jatun yuramanda parlashca profeciaca Taita Diospa Gobiernotami ricuchi.

 Fiti tucushca yuraca ¿imatata ricuchin? Chai fitishca yuraca rey Nabucodonosor shuj tiempota na mandashcatami ricuchin. Cai alpapi Taita Diospa Gobiernohuanbash chashnallatami pasarca. Rey Nabucodonosor, Jerusalén llactata llaquichishpami Taita Dios churashca reycunataca tucuchirca. Mandaj Dios cushca tiarinapi tiarijcunaca Taita Diospa randimi mandan carca (1 Crónicas 29:23).

 “Siete tiempoca” ¿ima cashcatata ricuchin? “Siete tiempo” nishpaca shuj tiempota llactacunallata mandachun Taita Dios saquishcatami ningapaj munan. Chai llactacunapica Taita Dios agllashca shuj gobiernoca na tiarcachu. Jesús cai alpaman shamungapaj 607 huatacuna faltajpimi Babiloniaca Jerusalenda llaquichirca chai huatapimi siete tiempo nishcaca callarirca (2 Reyes 25:1, 8-10). a

 “Siete tiempo” nishcaca ¿imashna tiempotata paran? Nabucodonosorpa causaipica siete tiempoca, siete huatacunatallami pararca. Taita Diospa Gobiernohuan diferente cashcata ricuchingapami, Jesusca cai shimicunata nirca: “Na judío llactacunapa señalashca tiempo pactaringacamanmi, Jerusalén llactataca na judío llactacuna chaquihuan sarunshna charinajunga” (Lucas 21:24). Cai profeciapi nishcashnaca Taita Diosca paipa autoridadta na Judío llactacunapa señalashca tiempo pactaringacaman sarunshna charianajuchunmi saquirca. Chai tiempoca Daniel capítulo 4​pi parlajuj “siete tiempo” nishcashnallatami can. Jesús Lucas 21:24​pi shimicunata nijujrasca siete tiempoca nara tucurircachu.

 Bibliallatami “siete tiempo” imashna tiempota parashcata ricuchin. Bibliapica quimsa tiempo chaupica 1.260 punllacunatami ricuchin. Shinaca “siete tiempoca” quimsa tiempo chaupi yali doblemi can chaimi 2.520 punllacunata charishcata ricuchin (Apocalipsis 12:6, 14). Shinallata Bibliapa profeciacunapica “shuj punlla, shuj huata cashcatami ricuchin” (Números 14:34; Ezequiel 4:6). Bibliapa nishcata pactachishpaca 2.520 punllacunaca 2.520 huatacuna cashcatami ricuchin. Shinaca “siete tiempo” nishcaca octubre de 1914 huatapimi tucurirca.