Romanos 7:1-25
-
Leymanda imashina libre quidashcatami parlan (1-6)
-
Leyca pecado tiashcatami ricuchin (7-12)
-
Pecadohuanga shuj macanajuipishnami tianchi (13-25)
7 Huauquipanicuna, ñucaca Leyta rijsijcunamanmi escribijupani. Leyca gentecuna causajungacamanllami paicunataca mandajun. ¿Nachu chaitaca yachanguichi?
2 Por ejemplo leypica ninmi, shuj huarmica, paipa cusa causajungacamanmi paihuanga cazada can. Pero paipa cusa huañujpica, paipa cusamandaca* libremi quidan* nishpa.
3 Shinaca, paipa cusa causajujpillata, shuj jarihuan cazarashpaca, huainayana juchapimi* urmajun. Pero si paipa cusa huañujpica, paipa cusamandaca* libremi quidan. Chaimi, shuj jarihuan cazarashpaca, huainayana juchapica ñana urmajunman.
4 Ñuca huauquicunalla, shinallatami cangunapash Cristopa cuerpomandaca, Moisesman Cushca Leymandaca libre quidashcanguichi.* Shinami cangunaca, huañushcacunapuramanda jatarichi tucushca Cristopa tucushcanguichi. Cunanga Taita Diostami sirvi ushanchi.
5 Ñucanchi cuerpo munaicunata rurashpa causanajujpica, Moisesman Cushca Leymi, ñucanchi cuerpopa nali munaicuna pecadota rurachijujta cuenta japichirca. Juchami ñucanchitaca huañuiman apan.
6 Pero cunanga, ñami Leymandaca libre quidashcanchi. Porque Leyca ñana ñucanchitaca mandai ushanllu. Na punda escribishca Leycunamandachu, Taita Diospa esclavocuna tucuna canchi. Sino Taita Diospa espíritu santomandami Taita Diospa esclavocuna tucuna canchi.
7 Shinaca ¿imatata ninchiman? Leyca ¿nalichu cashca ninchimanllu? Na shina ninchimanllu. Porque Ley na tiajpica, pecado ima cajtaca ñucaca na yachaimanllu carcani. Por ejemplo, “Na ansiarinachu cangui” nishpa Leypi na escribishca tiajujpica, ansiarina ima cashcatapash na yachaimanllu carcani.
8 Cai mandamiento tiashcamandami pecadoca, imacunatalla ñuca ansiarishpa munashcata rurachihuarca. Cai mandamiento na tiashca cajpica, pecadoca na poderta charinmanllu carca.*
9 Ñucaca, Ley nara tiajpica causami carcani. Pero mandamiento tiai callarijpimi, ñucaca pecador cashcata cuenta japircani y huañurcani.
10 Mandamientoca, causaiman apanapa randica, huañuiman apajtami cuenta japircani.
11 Mandamiento tiaimandami, pecadoca umachishpa, huañuchihuarca.
12 Shinaca Leypica ima pandatapash na nijunllu. Mandamientopash ima pandapash illa, ali, gentecunata ayudangapami can.
13 Shinaca ¿Taita Diospa Leyca ali cashpatachu ñucataca huañuiman apahuarca? Na, na shinachu can. Pecadomi ñucataca huañuiman apahuarca. Leyca alimi can. Pero Leymandami ñucaca pecado huañuiman apajtaca cuenta japircani. Shinami mandamientoca, pecado nalipacha cashcata ricuchirca.
14 Leyca Taita Diospami can. Chaitaca yachapanchimi. Pero ñucaca pecadoman jatui tucushca pecadormi capani.
15 Porque ñucaca, imamanda imata rurashcataca ñucallatapash na intindipanichu. Ñucaca imata rurangapaj munashcataca na ruranichu. Sino imata na ricunayachishcatami rurani.
16 Ley ali cashcataca yachapanimi. Pero ñucaca, na rurangapaj munashcacunatarami rurashpa catini.
17 Pero cunanga, na ñucachu cai nalicunataca rurajuni. Sino ñucapi tiaj pecadomi chaicunataca rurachihuajun.
18 Ñucaca pecadormi capani. Y chaitaca yachapani. Ñucapica ima alipash na tianllu. Alita rurangapaj munashpapash, alita ruraitaca na ushanichu.
19 Alita rurangapaj munashcacunataca na ruranichu. Sino, nalicunata na rurangapaj munashcacunatarami rurani.
20 Shinaca, ñuca imata na munashcatara rurashpaca, na ñucachu chaitaca rurajuni. Sino ñucapi tiaj pecadomi chaitaca rurajun.
21 Chaimi cai ley ñucapi tiashcata cuenta japini. Alita rurangapaj munajpica, nalita rurana munairami ñucapica tian.
22 Ñuca shungu ucupica Taita Diospa leytami ninanda alicachipani o valichipani.
23 Pero ñuca cuerpopica shuj leymi tian. Chai leymi, ñuca umapi tiajuj Taita Diospa leyhuanga, shuj macanajuipishna causan. Chai leyca ñuca cuerpopi tiajuj pecadomi can. Chai leymi ñucataca mandahuajun.
24 Ñucaca juyaipa causajuj runami capani. ¿Pishi ñucataca, huañuiman apajuj cai cuerpomandaca salvahuanga?
25 Ñucaca Taita Diostami agradicipani. Paimi ñucataca ñucanchi Señor Jesucristota cachamushpa salvahuarca. Ñuca pensamientocunaca Taita Diospa leypa esclavomi can. Pero ñuca cuerpoca, pecadopa leypa esclavomi can.
Notacuna
^ Griego shimipica “paipa cusapa leymandaca” nijunmi.
^ O “saquirin”.
^ Griego shimipica “pornéia” nijunmi. Glosariopi “huainayana jucha” shimita ricupangui.
^ Griego shimipica “paipa cusapa leymandaca” nijunmi.
^ Griego shimipica “huañushca quidashcanguichi” nijunmi.
^ Griego shimipica “pecadoca huañushcashnami canman carca” nijunmi.
