¿DIOSTA sirvijcunaca llaquicunata charishpapash Taita Diostaca sirvishpa, adorashpa catita ushanllu? Diosta sirvij Job runaguca ashtaca llaquicunatami charirca. Paita ima pasashcata ricupashun.

Job runaguca Abrahanba familiami carca. Jobca cunanbi cashca Arabia llactapimi causarca. Shuj punllaca tucui angelcunami Jehovapa ñaupapi tandanajurca. Chaipica Satanaspashmi carca. Tucui angelcunapa ñaupapimi Jehová Diosca Job runagu paita tucui shungu sirvijushcamanda ninanda alicachishcata nirca. Shinapash Satanasca Jobca Taita Dios paita cuidajushcamandallami shina sirvijun nishpami juchachirca. Shinallata Job charishca tucui cosascunata Taita Dios quichujpica, Jobca Taita Diosta ñana adorashpa catingachu nircami.

Taita Diosca Satanastaca Job tucui charishca cosascunata, paipa huahuacunatapash quichushpa, Jobtapash llaquichichun saquirca. Jobca Satanás shina llaquichijushcataca na yacharcachu. Chaimandami Taita Dios chai llaquicunata charichun imamanda saquishcata na intindirca. Shinapash Jobca Taita Diosta adoranataca na saquircachu.

Shina llaquicunahuan cajpimi Jobtaca paipa quimsa amigocuna visitarca. Shinapash paicunaca Jobtaca rimaitarami rimai callarirca. Paicunaca Jobtaca paipa juchacunamanda Taita Dios castigajushcatami nirca. Shinallata paicunaca Taita Dios paita sirvijcunapi na preocuparijta, paita sirvijcunapi na confiajtami nirca. Shinapash Jobca chai nishcacunataca na crircachu. Paicunamanga Taita Diostaca huañungacamanmi siempre adorasha nirca.

Shina nijushpapash Jobca paimandallata difindiringapaj esforzarijuimandami pandarirca. Job parlajujpica Elihú runaguca uyajurcami. Elihuca Taita Diospa shutita santificanapa randi, Taita Dioslla mandana derechota charishcata ricuchinapa randi, pai charishca llaquicunapi ashtahuan preocuparijushcata ricushpami Jobtaca tacurirca. Shinallata Jobpa amigo nishcacunatapashmi Jobta ayudanapa randi rimaitara rimanajushcamanda shinllita tacurirca.

Jipamanga Jehová Diosllatami Jobtaca corrigirca. Jehová Diosca pai rurashca tucui cosascunahuan, Taita Dios charishca tucui ushaihuan gentecuna compararijpica gentecuna nima na cashcatami cuenta japichirca. Jobca humilde caimandami Jehová disciplinajpipash ali modos chasquirca. Jehová Diosca “ninanda llaquishpa juyaj” Dios caimandami Job ali tucuchun ayudarca. Shinallata pai tucui charishca cosascunatapash doblehuanmi bendiciarca. Shinallata diez huahuacunatapash chari usharca (Santiago 5:11). Llaquicunata charishpapashmi Jobca tucui shunguhuan Jehová Diostaca sirvishpa catirca. Jobpa ejemplomi Satanás llulla cashcata ricuchin. Shinallata Jobpa ejemplomi tucui gentecunallata llaquicunata charishpapash Jehová Diosta tucui shunguhuan sirvishpa, adorashpa cati ushashcata ricuchin.

(Job libropimi Jobpa causaimandaca parlan.)