Jesusca shujcunahuan tranquilo causanata yachajuna canguichi nishpami yachachirca. Shinapash shuj viajeca paipa apostolcunamanga cashnami nirca: “Cai alpapi tranquilo ali causaigu tiachunmi shamushca yashpaca, na pensanachu canguichi. Ñucaca cangunapura tranquilo ali causachunga na shamurcanichu. Sino cangunapurapi contraricuna tiachunmi shamurcani. Ashtahuanbash familiapura contrarichunmi shamurcani. Churica paipa taitapa contrami tucunga. Ushica paipa mamapa contrami tucunga. Jachunbash paipa suedrapa contrami tucunga” nircami (Mat. 10:34, 35). Cai shimicunata nishpaca Jesusca ¿imatata ningapaj munarca?

Jesusca familiacuna contrarishpa separarichunga na munarcachu. Pero shina pasanataca alimi yacharca. Pipash Jesuspa catij tucushpa bautizarishpaca paicunapa familiacuna talvez chai decisionda agllashcata nimamanda nalicachinataca yariami cana can. Por ejemplo Jesuspa discípulo tucushcamanda cusa, huarmi o shuj familiar jarcaicunata churajpica, Jesuspa discípulo cashpa catinaca dificilmi caita ushan.

Bibliapica cristianocunataca: “Shujcunahuan tranquilo aliguta causaichi” ninmi (Rom. 12:18). Shinapash Jesuspa yachachishcacunamandami familia ucupica “contraricuna” tiaita ushan. Porque familiamanda huaquingunaca Jesuspa yachachishcacunatami pactachi callarin. Pero huaquingunaca Jesuspa yachachishcacunataca na alicachinllu. Y Jesús nishcashnaca “huasi ucupurallatami” ñucanchicuna Bibliamanda yachajui callarijpica contrai callarin (Mat. 10:36).

Shuj religionda charij familiacunahuan causashpaca Jesusta catijcunapaca Jehová Diosta, Jesusta juyashcata ricuchinaca dificilmi caita ushan. Porque paicunapa familiacunaca shuj shuj fiestacunata celebrachunmi atichita ushan. Chaimi paicunaca pipa ñaupapi ashtahuan ali quidangapaj munashcata decidina can. Jesusca nircami: “Ñucatapash yali paipa taitatara, paipa mamatara juyashpaca ñucapa discípulo caitaca na ushangachu” nircami (Mat. 10:37). Cai shimicunata nishpaca ñucanchi taitata o mamata juyashcata na ricuchina cashcataca Jesusca na nijurcachu. Ashtahuangarin ñucanchi causaipi ima ashtahuan importante cashcatami yachachingapaj munarca. Ñucanchi familiarcuna Jehová Diosta ama sirvishpa catichun jarcangapaj munajpica, aunque ñucanchi familiata juyashpa catishpapash Jehová Dios ñucanchipa ashtahuan importante cashcatami ricuchina capanchi.

Ñucanchi familiacunallata Jehová Diosta sirvinata jarcajpica ninandami llaquiyanchi. Shinapash Jesús nishca shimicunatami yarina capanchi: “Llaquicunata na aguantashpaca ñucapa catij caitaca na ushangachu” nircami (Mat. 10:38). Shinaca ñucanchicuna Jesuspa discipulocuna tucushpaca llaquicunata charinata, ñucanchi familiallata jarcaicunata churana cashcatami yaria cana capanchi. Shinapash paicunapash ima horapash Bibliamanda yachajuchunmi ñucanchicunaca ali ejemplota cushpa catina capanchi (1 Ped. 3:1, 2).