¿IMATATA GENTECUNACA NIN? Cunan punllacunapi investigaciongunata rurajpica ñucanchi causajuj planetamandapash ashtahuan yali, ashtaca ashtaca millón planetacunami tian. Chaita yachashpami ashtaca gentecunaca yan, yangallami canchi. Maitashi Taita Diosca ñucanchita yaringa nishpa.

¿IMATATA BIBLIACA YACHACHIN? Jehová * Diosca Bibliata cushpapash ñucanchicunataca na cunganllu. Taita Diosca ninmi: ‘Candami ñuca ñavihuan ricuriasha’ nishpa (Salmo 32:8).

Egipto llactamanda Agar shuti huarmigu ima pasashcata ricushun. Paica Jesús shamungapaj casi 1.900 huatacuna faltajuj punllacunapimi causarca. Agarca Abrahanba huarmi Sarapa sirvienta cashpapash Sarata nali trataimandami jichushca pambacunaman shitai tucurca. Agar nalita rurajpica ¿Taita Diosca paita cungarcachu? Bibliapica ninmi, Mandaj Diospa ángel ricurishpami Agartaca nirca, Taita Diosca ‘canba llaquita uyashcami’ nishpa. Shina nijpimi Agarca nirca: ‘Canga ricujuj Taita Diosmi cangui’ nishpa (Génesis 16:4-13).

Taita Diosca quiquindapash yarijunmi. Imashinami mamacunaca tucuilla huahuacunata juyashpapash ashtahuan uchila huahuagutaca ashtahuan cuidarian, shinallatami Taita Diosca llaquilla, irquilla gentecunataca ashtahuan cuidarian. Taita Diosca ninmi: ‘Ñucaca ima juchapash illaj, jahua pachapimi causani. Llaquillacunata, shungupi na jariyajcunata ayudashpami causani’ nishpa (Isaías 57:15).

Shinapash ¿nachu tapuripashcangui: Taita Diosca ima yashpata ñucataca ricuhuan? ¿Jahua jahualla o ñuca shungu imashina cajta ricushpachu Taita Diosca llaquihuan? nishpa.