CALLARI TEMA
Testigo de Jehovacunaca ¿picunata can?
California, Estados Unidosmanda Becky shuti huarmica ninmi: “Mikeca testigo de Jehovami can. Paitaca unaitami rijsini. Paipa religiondaca na intindinichu. ¿Pita Jehová can? ¿Imashpata Testigocunaca fiestacunapi na chapurin? Mike chai religionbi cajpimi preocuparin carcani” nishpa.
Ontario, Canadamanda Zenon shuti jarica ninmi: “Ñuca huasi ladopi causaj vecinocuna Testigocunahuan Bibliata yachajui callarijpica, ñucaca yanmi carcani: ¿Imashpashi chai religionga chai shutita charin? ¿Imatashi chai shutica ningapaj munan?” nishpa.
Washington, Estados Unidosmanda Kent shuti jarica ninmi: “Ñucapash ñuca huarmipash yanmi carcanchi, testigo de Jehovacunaca iglesiaman na rijcunata umachingapami shamun. Jatun religiongunatapash na catishpaca, maitashi Testigocunapa religiondaca catishun” nishpa.
Esbjerg, Dinamarcamanda Cecilie shuti huarmica ninmi: “Testigocuna picuna cajta, imata crijtaca na yacharcanichu” nishpa.
¿Nachu quiquinbash Testigocuna huasin huasin, callecunapi villachijujta, Bibliamanda librocunata saquijujta, Bibliamanda gratis yachachinajujta ricupashcangui? Tal vez cai revistatapash shuj testigo de Jehovami cushcanga. Shinapash, cai página callaripi gentecunashnachari quiquinbash pensapangui. Shinallata, testigo de Jehovacunaca ¿picunata can? nishpa tapuripanguichari.
Testigo de Jehovacunamanda imapash tapuicunata charishpaca ¿imatata rurana capangui? ¿Maipita yachajui ushapangui Testigocuna imata crijta, Tandanajui Huasicunata, librocunata rurangapaj culquita maimanda llujchijta? Shinallata ¿maipita yachajui ushapangui imamanda quiquinba huasipi visitajta o callepi villachijta?
Cecilieca ninmi: “Testigo de Jehovacunamanda Internetpi ashtacata liishpa, shuj gentecuna nalicunata Testigocunamanda nijta uyashpami, Testigocunamandaca nalita pensai callarircani” nishpa. Shinapash, Cecilieca Testigocunahuanbacha parlashpami paicunata intindi callarirca.
Testigo de Jehovacunata ashtahuan rijsingapaj munashpaca ¿nacha quiquinbash paicunahuanllata parlana capangui? Paicunami cai revistataca llujchishca. Shinaca, paicunami imapash tapuita aliguta intindichita ushan (Proverbios 14:15). Shamuj temacunami testigo de Jehovacuna picuna cajta, imata crijta, imata rurajtapash intindichun ayudanga.
