KONTINIÉ VÉYÉ !
Poukosa la politik i diviz domoun ? Kosa la Bib i di ?
Partou dési la tèr, bonpé nasion lé divizé akoz la politik. Dapré in lankèt k’in buro rochèrch zéta zuni la fé an 2022 dan 19 péi, « 65% domoun la di ké na poin lantant é défoi mèm néna bann gro ralé pousé ant sak i soutien lo bann parti politik. »
Èské la ousa ou viv, ou la romarké ké néna plizanpli la divizion dan la politik ? Akoz sa ? Néna in solusion pou sa ? Rogard bien kosa la Bib i di.
Bann konportman k’i diviz
La Bib lavé prévnu ké dan nout lépok, k’i apèl « bann dèrnié jour », sra difisil pou bann domoun mèt lunité. Poukosa ? Parské domoun nora bann konportman mové.
« Dan bann dèrnié jour, nora bann pèryod difisil pou suporté. Parské bann domoun va rod rienk zot prop lintéré, […] nora poin lantant » (2 Timoté 3:1-3).
Mèm si néna bonpé i ésèy mèt la min ansanm pou ké bann gouvèrnman i gingn mèt lunité, nou oi bien lo zafèr i march pa. Bann domoun ké néna bann fason pansé ké lé diféran i trouv lé difisil, pétèt mèm lé inposib travay min dan la min pou règ in problèm. Tousala i done rézon la Bib dan sak li la di dépi lontan.
« Lom i domine lom pou son malèr » (Éklézias 8:9).
Kan mèm sa, la Bib i done in solusion : in gouvèrnman avèk in chèf ké va gingn anlèv tout bann problèm lapou afébli bann domoun koméla.
In chèf gabié, k’i sousi ali pou nou
La Bib i di anou kisa i lé lo chèf vréman gabié pou jèr bann zafèr la tèr : Jézu Kris. Jézu néna lo pouvoir, lotorité, é li vé mèt la pé èk lunité pou tout domoun dési la tèr.
« Kan li va dirijé, bann jus va fléri é nora in bonpé la pé » (Psom 72:7).
« Tout bann nasion va sèrv ali » (Psom 72:11).
Jézu lé vréman lo méyèr chèf nou pé aoir, parské li néna vréman anvi èd bann domoun, é li fé vréman in kont avèk sak i sobat kont bann zinjustis.
« Li va sov lo moun lapré kri o sokour, é sak lé maléré é tout sak na poin pèrsone pou èd azot. Li nora pitié pou sak lé fèb é sak lé pov, é li va sov la vi bann pov. Li va sov sak lé krazé é li tir azot dan la violans » (Psom 72:12-14).
Vien aprann plis dési kosa i lé lo Roiyom Bondié, in gouvèrnman dann sièl k’i sra dirijé par Jézu. Vien oir koman son dominans sra profitab pou ou é osi koman fé mont out soutien pou li.
Rogard lo vidéo Kosa i lé lo Roiyom Bondié ?
Lir lartik « Le Royaume de Dieu : un gouvernement sans corruption. »
Agard sa osi…
BANN KÉSTION LA BIB I RÉPONN
Kosa i lé lo sign k’i amont ké nou viv bann « dèrnié jour », ou « lépok la fin » ?
Nou pé konèt kosa i lé bann dèrnié jour gras sak la Bib i di.
TOUR DE GARD
Kisa i lé le Roi dann roiyom Bondieu ?
Anparmi sak la ékri la Bib, néna in bonpe la donn bann zinformasion su le moun ke té sa devnir Roi le roiyom Bondieu. Anparmi tout domoun ke la viv su la tèr, néna rienk in seul moun i konkord bien avèk tout sak nou vièn dékri an o la.
