Kan Bondieu la kré domoun, li la désid ke bann relasion séksuèl lé rézèrvé rienk pou in mesieu èk in madam maryé ansanm (Jenèz 1:27, 28 ; Lévitik 18:22 ; Provèrb 5:18, 19). In bonom èk in madam ke lé pa maryé ansanm, na poin le droi fé lamour. La Bib i kondann osi bann pratik omoséksuèl sétadir ant deu bonom ansanm oubien deu madam ansanm (1 Korintien 6:18). Kosa i ve dir pratik séksuèl ? Sa i konsèrn tout kalité relasion séksuèl, kom karès le sèks in not moun, oubien mèt le sèks dan la bouch inn é lot, ou ankor mèt le sèks dann dèryèr inn é lot.

 La Bib i kondann bann relasion séksuèl ant deu moun mèm sèks. Mé li di pa détès domoun i fé sa. Bann krétien i doi « réspèk toulmonn » (1 Pièr 2:17, Bible des peuples).

 Èske lé posib in moun i né omoséksuèl ?

La Bib i di pa dirèk ousa i sort bann lanvi séksuèl in moun néna pou in not moun mèm sèks ke li. Mé, li mont ke depu nout nésans nout tout na tandans fé le kontrèr sak Bondieu i ve (Romin 7:21-25). Mèm si la Bib i ésplik pa ousa i sort bann lanvi omoséksuèl, li kondann bann pratik la.

 Koman fé plézir Bondieu malgré bann for lanvi omoséksuèl ?

La Bib i di : « Lès pa zot kor dominn azot. Tué tout lanvi pou bann pratik séksuèl ke lé mové » (Kolosien 3:5, Contemporary English Version). Pou « tué » bann mové lanvi, ki pous fé mové zafèr, zot i doi kontrol zot léspri. Si zot i mèt souvan dan zot tèt bann zidé ke lé prop, sra plu fasil pou fé sort zot mové lanvi (Filipien 4:8 ; Jak 1:14, 15). O komansman fodra petèt bien sobat, mé somanké avèk le tan sa va ni plu fasil pou zot. Bondieu i promé èd azot « fé in chanjman dan zot keur é zot léspri » (Éfézien 4:22-24, Bible en français courant).

 Domoun par milion i sobat osi pou gingn kontrol zot bann lanvi fé lamour, parske zot i ve suiv bann zansègnman la Bib. Par égzanp, bann sélibatèr ke lé pa sur maryé oubien sak zot mari ou zot madam i pe pa fé lamour, banna i désid kontrol zot for lanvi pou ninport kèl tantasion i ariv. Sa i anpèch pa zot èt ereu. Sak néna bann for lanvi omoséksuèl mé i ve vréman fé plézir Bondieu, i pe osi èt ereu dan zot vi (Detéronom 30:19).