BERŠENCAR, o kritičarija e Biblijakere vakerena sine kaj o Valtazar, kova soj spomnimo ko biblisko lil Daniel, tano izmislimi ličnost (Dan. 5:1). Ola verujnena sine ko akava soske o arheolozija na uspejngje te arakhen dokazija kaj o Valtazar čače postojngja. Ama, akava meningja pe ko 1854 berš. Soske?

Adava berš, jekh britansko konzuli so vikinela pe Džon Tejlor istražingja o ruševine tari purani diz Ur, kola so arakhljovena ko južno delo taro avdisutno Irak. Adari, ki jekh bari kula, akava istražuvači arakhlja nekobor cilindrija tari glina. Sekova jekh lendar sine dugačko okolu 10 santimija hem sine le natpis klinesto pismoja. Ko jekh lendar sine pišimi i molitva bašo baro životo e vavilonsko careskoro o Nabonid hem leskere najbare čhaveskoro, o Valtazar. Čak o kritičarija da mora sine te priznajnen — akava sine dokaz kaj o Valtazar čače postojnela sine.

Ama, i Biblija vakerela kaj o Valtazar na samo so postojnela sine nego isto agjaar kaj sine cari. O kritičarija na soglasingje pe ni adalea. Na primer, o Vilijam Talbot, jekh anglisko naučniko taro 19 veko, pišingja: „Nesave vakerena kaj o Velsarusur [Valtazar] vladingja ko isto vreme ple dadea, o Nabonid. Ama bašo akava nane nisave dokazija“.

Akaja dilema sine rešimi keda taro natpisija taro javera cilindrija sine otkrimo kaj o dad e Valtazareskoro, o cari o Nabonid, ponekogaš sine avrijal taro Vavilon čak po nekobor berš. So slučinela pe sine džikote ov na sine adathe? Sprema jekh enciklopedija, „keda na sine ki pli phuv, o Nabonid mukhela sine o prestol e Valtazareske hem mukhela sine leske baro delo tari vojska“ (En­cy­clo­pae­dia Bri­tan­ni­ca). Ko adava vreme, o Valtazar vladinela sine ko Vavilon ko than ple dadeskoro. Adaleske, o Alen Milerd, jekh arheologo hem lingvisti, vakerela kaj tano soodvetno so „ko lil Daniel, bašo Valtazar vakerela pe kaj tano ’cari‘“.

Džangjola pe, e Devleskere slugenge, ki Biblija isi o najvažna dokazija kaj o lil Daniel tano verodostojno hem tano taro Devel (2. Tim. 3:16).