О мериба анел е манушенге бари дукх. Аке соске и Библия пхенел, кай о мериба си душмани. (1 Коринтяни 15:26) Андо 27 уроки сиклилян, кай о Йехова ка побединел калке душманиес. Ама со ка ачшол е манушенца, колато вече муле? Кавка уроки ка сикавел туке саво авер шукар обещание, дел амен о Дел. Ов обещинел те възкресинел буте манушен, за те овел лен шукар животос завинаги! Ащи ли о муле те живинен отново? Ко небес или ки пхув ка овен възкресиме?

1. Со мангел те керел о Йехова амаре близконенге, колато муле?

О Йехова бут мангел те възкресинел е мулен. Йекх мануш, колескоро алав сине Йов, сине сигурно, кай кана ка мерел, о Дел нанай те бистерел лес. Ов пхенгяс е Девлеске: „Ка викинес ман тай ме ка отговоринав туке [таро мимори].“ (Четине Йов 14:13-15.)

2. Катар жанас, кай о муле ка овен възкресиме?

Кана о Исусес сине ки пхув, о Йехова диняс лес сила те възкресинел манушен. О Исусес възкресингяс йекхе чшая, която сине 12 брешенгери, тай йекхе ромнякере чшавес, колакоро ром-да мулосас. (Марко 5:41, 42; Лука 7:12-15) По-късно е Исусекоро амал, о Лазарес, муло. Накхлесас щар диеса отсарто паронде е Лазарес, ама о Исусес възкресингяс лес. О Исусес молингяс пес е Девлеске тай само дикхляс кариг о мимори тай пищингяс: „Лазаре, икли!“ Тай „о мануш, ковато мулосас, иклило“ тай вече сине живдо! (Йоан 11:43, 44) Представине туке кизом щастлива сине е Лазарескере пхеня тай лескере амала!

3. Сави надежда иси те близконенге, колато муле?

И Библия обещинел: „Ка овел възкресение.“ (Деяния 24:15) О мануша, колен възкресингяс о Исусес андо пуране диеса, на геле ко небес. (Йоан 3:13) Ов възкресингяс лен те живинен атхе ки пхув тай он сине леске бут благодарна. Сиго о Исусес ка възкресинел буте манушен, за те овел лен шукар животос завинаги андо рай ки пхув. Ов пхенгяс, кай ка овен възкресиме „саворе, колато си андо миморя“, даже калка, колен о мануша бистерде, ама о Дел помнинел. (Йоан 5:28, 29)

 РОДЕ ПО-ХОРЕСТЕ

4. О Исусес сикавгяс, кай ащи те възкресинел е мулен

Ахальов со кергяс о Исусес пере амалеске, е Лазареске. Четинен Йоан 11:14, 38-44 тай хоратинен калке въпросиенге:

• Катар жанас, кай о Лазарес наистина мулосас? (Дикх о 39 стихи.)

• Ако о Лазарес гелосас ко небес, мислинес ли, кай о Исусес ка иринелас лес те живинел пак ки пхув?

Дикхен о КЛИПИ.

5. Бут мануша ка овен възкресиме!

Четинен Псалм 37:29 тай хоратинен калке въпросиеске:

• Кате ка живинен о мануша, колато ка овен възкресиме?

О Исусес нанай те възкресинел само е манушен, колато служинде е Йеховаске, а буте аверен-да. Четинен Деяния 24:15 тай хоратинен калке въпросиеске:

• Кас мангес те дикхес отново, кана ка овел възкресение?

• Сар и надежда, кай ка овел възкресение диняс утеха тай силес е чшаякере дадес тай лакере дая?

 СО СИКЛИЛЯМ

И Библия обещинел, кай бут мануша ка овен възкресиме. О Йехова мангел он те живинен отново тай диняс е Исусес и сила те възкресинел лен.

О най-важна букя таро уроки

• Катар жанас, кай о Йехова тай о Исусес бут манген те възкресинен е мулен?

• Кате ка живинен о възкресиме — ко небес или ки пхув? Со мислинес ту тай соске?

• Соске синян сигурно, кай о мануша, колен дехес, ащи те живинен отново?