Ko purano vreme o Izraelcija đelje ko mariba – sose amen avdije na đaja?
ĐI TRAJINĐA o Dujto svetsko rat, jekh nacističko oficiri phenđa disave Svedokonenđe: „Ako neko tumendar na mangela te borini pe protiv i Francuska hem i Engleska, sare ka meren.“ Iako o nacistička vojnikija kola hine naoružime hine othe paše, nijekh ando Jehovase svedokija na manglja te irini po dumo e Jehovase. Aso akava valjanđa bari hrabrost. Akava primer šukar mothovi savo stav isi amen premalo mariba. Amen na mangaja te borina amen ko mariba kola isi ko akava sveto. Čak iako o manuša phenena so ka mudaren amen ako na đaja ko mariba, amen aćhovaja neutralna.
Ama, nane len sare kola pese phenena soj tane hrišćanija asavko stav premalo mariba. But manuša mislinena so o hrišćanija šaj hem valjani te braninen pi država. On šaj razmislinena ađahar: „Ako o Izraelcija ko purano vreme, kola hine e Devleso narodo đelje ko mariba, sose o hrišćanija avdije na valjani te đan?“ Sar bi odgovorineja ko akava pućibe? Šaj te phene lenđe so i situacija ando Izraelcija ko purano vreme hine averćhane andi amari. Akana ka vaćera ando panđ buća ko kola hijam averćhane olendar.
1. E DEVLESO NARODO HINE DEO ANDI JEKH NACIJA
Ko purano vreme, o Jehova birinđa e Izraelcen te oven oleso narodo. Ov phenđa so on tane oleso „dragoceno vlasništvo maškaro sa o narodija“ (Izl. 19:5). Isto ađahar, o Jehova dinđa len jekh posebno deo andi phuv. Odolese, ked o Devel zapovedinđa lenđe te đan te borinen pe protiv avera narodija, on na borinđe pe niti mudarđe nekas ando Jehovaso narodo. a
Avdije, e Jehovase sluge avena ando „sa o narodija hem plemenija hem nacije hem ćhibja“ (Otkr. 7:9). Ako bi avdije e Devleso narodo đala ko maribe, tegani on bi borinena pe ja čak bi mudarena nekas ando narodo kova služini e Jehovase.
2. O JEHOVA PHENĐA E IZRAELCENĐE TE ĐAN KO MARIBA
Ko purano vreme, o Jehova odlučinđa ked hem sose o Izraelcija valjani te đan ko maribe. Na primer, o Devel phenđa e Izraelcenđe te đan hem te borinen pe protiv o Hanancija kola služinđe e hovavne devlenđe, ćerđe baro nemoral hem žrtvujinđe pe ćhaven. O Jehova phenđa e Izraelcenđe te uništinen e manušen kola ćerđe odola lošna buća ki Obećimi phuv, te na bi hem oleso narodo ćerela odova so on ćerđe (Lev. 18:24, 25). Ked o Izraelcija khuvđe ki Obećimi phuv, o Jehova podijekh puti phenđa lenđe so valjani te đan ko maribe te šaj te braninen i nacija Izrael ando dušmanija (2. Sam. 5:17-25). Ama, o Jehova niked na phenđa so o Izraelcija valjani kokri te odlučinen te đan ko maribe. Ked odova ćerđe, but putija ulje but lošna buća (Br. 14:41-45; 2. Let. 35:20-24).
Avdije, o Jehova na phenela e manušenđe te đan ko mariba. O manuša borinena pe aso odova so on mangena, a na aso odova so o Devel mangela. On šaj borinena pe sebepi so mangena olengi phuv te ovel pobari, te ovel len pobuter pare ja sebepi disavi političko ideja. Ama, isi hem okola so borinena pe ko Devleso anav te zaštitinen pe verovanja ja te mudaren e Devlese dušmanen. O Jehova ka arakhi pe slugen hem ka uništini e dušmanen ko jekh maribe kova ka ovel pana hari, a odova tano o Armagedon (Otkr. 16:14, 16). Ko odova maribe, ka borini pe olesi nebesko vojska, a na olese sluge kola tane ki phuv (Otkr. 19:11-15).
3. O IZRAELCIJA NA MUDARĐE OKOLEN KOLA MOTHOVĐE VERA KO JEHOVA
Da li o mariba ko avdisutno vreme zaštitinena e verno manušen sar so e Jehovaso maribe protiv o Jerihon zaštitinđa e Rava hem olake porodica?
Ko purano vreme, but putija o Izraelcija mothovđe milosrđe premalo okola so mothovđe vera ko Devel hem mudarđe samo okolen aso kola o Jehova phenđa so valjani te oven mudarde. Te dikha duj primerija. Iako o Jehova phenđa e Izraelcenđe te uništinen sa so hine ko Jerihon, on na mudarđe e Rava hem olake porodica sebepi olengi vera (Is. Nav. 2:9-16; 6:16, 17). Isto ađahar, o manuša kola živinđe ki diz Gavaon na hine mudarde odolese so mothovđe so poštujinena e Jehova (Is. Nav. 9:3-9, 17-19).
Avdije, i vojska na razmislini da li valjani te mudari okolen kola mothovena vera ja na. But putija, ko mariba merena hem o nedužna manuša.
4. O IZRAELCIJA MORANDILJE TE IĆEREN PE KO JEHOVASE MERILIJA ANDO MARIBA
Ko purano vreme, ando izraelska vojnikija o Jehova rodinđa te ićeren pe ko olese merilija đi hine ko mariba. Na primer, disavo puti o Jehova phenđa lenđe so angleder te napadinen disavi diz najangleder valjani te phenen so mangena te oven olencar ko mir (Pon. zak. 20:10). Isto ađahar, manglja te oven čista hem te ićeren pe ko olese moralna merilija (Pon. zak. 23:9-14). I vojska ando okolna narodija but putija silujinđa e đuvljen ko phuvja kola osvojinđe, ama o Jehova zabraninđa e izraelsko vojnikonđe te ćeren odova. Čak našti hine te ženinen pe dijekha đuvljaja koja hine zarobimi sa đi na nakhela masek dive sar osvojinđe odija diz (Pon. zak. 21:10-13).
Avdije, but phuvja potpisinđe disave međunarodna sporazumija so te ćeren ked đana ko mariba. Iako akala sporazumija tane ćerde te zaštitinen e manušen, but putija na poštujinena pe o pravilija ando odola sporazumija.
5. O DEVEL BORINĐA PE ASO PO NARODO
Da li o Jehova avdije borini pe aso bilo kova narodo sar so borinđa pe e Izraelcenđe ko Jerihon?
Ko purano vreme, o Jehova borinđa pe pekle narodose ađahar so ćerđa disave čudija te šaj on te pobedinen. Na primer, sar o Jehova pomožinđa pe narodose te osvojinen i diz Jerihon? Sar so o Jehova phenđa, ked o Izraelcija „ko sa o glaso vićinđe. . . o zidija đi o temelji rušinđe pe“ hem ađahar šaj hine polokho te osvojinen i diz (Is. Nav. 6:20). A sar pobedinđe ko maribe protiv o Amoncija? „O Jehova kotar nebo mukhlja upro lende bari kukudi. . . Pobuter mulje sebepi i kukudi, nego ando odova so o Izraelcija mudarđe len mačeja“ (Is. Nav. 10:6-11).
Avdije, o Jehova na borini pe aso nijekh narodo ki phuv. Oleso Kraljevstvo, kuri tano o Isus Kralj, „nane deo kotar akava sveto“ (Jov. 18:36). O Beng tano okova kova isi le vlast upro manušikane vladarija. Sa odola okrutna mariba kola hine hem kola tane akana mothovena kobor tano ov lošno (Luka 4:5, 6; 1. Jov. 5:19).
O PRAVA HRIŠĆANIJA DENA SA PESTAR TE OVEN KO MIR JEKH JEKHEJA
Sar so đi akana dikhljam, amari situacija tani averćhane ando purano vreme. Ama, odova nane jedino razlog sose amen avdije na đaja ko maribe. Isi hem avera razlogija. Na primer, o Devel phenđa so ko poslednja dive okola kolen ov ka sikavi „više na ka sikljon te maren pe“ niti ka učestvujinen ko mariba (Is. 2:2-4). Uzo odova, o Isus phenđa so olese učenikija na ka oven „deo ando akava sveto“ hem so na ka mešinen pe ki politika, već so ka oven neutralna (Jov. 15:19).
O Hrist phenđa so olese učenikija ka ćeren pana diso. Ov sikavđa len te na ićeren i holi ando peste hem te na holjanen, sose odova legari đi o maribe (Mat. 5:21, 22). Isto ađahar, ov sikavđa pe učenikonen te oven ko mir sarinencar hem te mangen pe dušmanen (Mat. 5:9, 44).
Sar šaj svako amendar te ćerel akava? Amen verovatno na mangaja te borina amen ađahar so ka đa ko disavo maribe. Ama, da li disavo puti avela amenđe ki godi so neko ki skupština tano amaro dušmani? Hajde te da sa amendar te cida amendar odova andi godi (Jak. 4:1, 11).
Amen na đaja ko mariba, već trudinaja amen te ova ko mir jekh jekheja hem te manga jekh jekhe (Jov. 13:34, 35). Hajde te da sa amendar te ova neutralna sa đi na avela o dive ked o Jehova zauvek ka ćhinavi sa o mariba (Ps. 46:9).
a Disavo puti, o Izraelska plemenija borinđe pe jekh protiv aver, ama odova na hine premali Devlesi volja (1. Kralj. 12:24). Ama, podijekh puti odola mariba hine premali olesi volja sebepi so disave plemenija irinđe lese po dumo ja ćerđe disave avera ozbiljna grehija (Sud. 20:3-35; 2. Let. 13:3-18; 25:14-22; 28:1-8).
