1, 2. (a) Ked tano o poklon tuče važno? (b) Sose odova so o Isus dija po dživdipe tano najbaro poklon ando Devel?

KOVA tano najšužo poklon so dobijan dži akana? O poklon na valjani te ovel but skupo, te šaj te ovelče važno. Ked o poklon čerelatu bahtalo ja tano diso so čače valjaniče, tegani tu hijan but zahvalno.

² Kotar sa o poklonja kola dijamen o Devel, isi jekh poklon kova valjani amendže pobuter ando sa avera. Odova tano najbaro poklon kova o Devel dija e manušendže. O Jehova bičhaldža pe čhave e Isuse Hriste, te šaj amen te živina večno. Ko akava šero ka sikljova odoljestar (Čitinen Matej 20:28). O Jehova mothodža amendže baro mangipe, adžahar so bičhaldža e Isuse ki Phuv te del po dživdipe sar otkupnina.

3. Sose o manuša merena?

³ O Jehova oslobodija e manušen ando greh hem ando meribe prekalo odova so o Isus dija po dživdipe (Efeskonendže 1:7). Te šaj te haljova sose o Isus valjandža te del po dživdipe, amen valjani te džana so ulo angljeder but hiljada berša ko edensko vrt. O prva manuša, o Adam hem i Eva, grešije. Sebepi so grešije, on mulje. Amen mera sose nasledijam o greh ando Adam hem i Eva. Moljinatu dikh o 9. dodatko.

4. Ko hine o Adam hem so ov hinelje?

 ⁴ Ked o Jehova čerdža e prvone manuše e Adame, ov dijalje diso but vredno — savršeno dživdipe. Ov hinelje savršeno godi hem savršeno telo. Niked na valjandža te naborsaljol, te phurjol hem te merel. Sebepi so o Jehova čerdža e Adame, ov hine oljese sar dad (Luka 3:38). O Jehova vačerdža oljeja. Ov vačerdža e Adamese so adžičeri oljestar hem dijalje te čerel but šuži buti (1. Mojsieso 1:28-30; 2:16, 17).

5. Sose ki Biblija phenelape soj tano o Adam čerdo premalji Devljesi slika?

⁵ O Adam hine čerdo „premalji Devljesi slika“ (1. Mojsieso 1:27). O Jehova dijalje isto osobine save ov isilje, sar soj tane mangipe, mudrost, pravda hem moć. Ov dija e Adamese slobodno volja. O Adam na hine robot. O Devel čerdžalje adžahar te šaj kokri te birini da lji ka čerel šukar ja lošno. Ked bi o Adam birini te šunel e Devlje, ov šaj hine te živini večno ko raj ki Phuv.

6. (a) So našaldža o Adam ked na šuja e Devlje? (b) Sar odova utičini upro amende?

⁶ O Adam na šuja e Devlje, odoljese hine osudimo ko meribe hem adžahar platija bari cena. Ov našaldža poklo amaljipe e Jehova, po savršeno dživdipe hem našti hine te živini ko raj ki Phuv (1. Mojsieso 3:17-19). O Adam hem i Eva birije te na šunen e Devlje, odoljese na hine nada oljendže. Sebepi so o Adam grešija „ko sveto khudža o greh hem prekalo oljeste o meribe, hem adžahar o meribe alo ko sa o manuša sose sare grešije“ (Rimskonendže 5:12). Ked o Adam grešija ov „bikija“ kokri pes, a hem amen te ova robija e grehose hem e meribase (Rimskonendže 7:14). Da lji isimen disavi nada? Po, isimen.

7, 8. Sose bi valjani džiko te del diso but vredno nekase?

 ⁷ Sose bi valjani džiko te del diso but vredno nekase, na primer o dživdipe? Odova šaj te ovel sebepi duj buča. Sar jekhto, te ovel džiko oslobodimo ja te irinipe diso nekase. Dujto, te učharipe i šteta so džiko čerdža.

⁸ Nijekh manuš našti te platini i bari šteta so čerdža o Adam ked grešija hem andža o meribe upro amende. Ama, o Jehova arakhlja o drumo te oslobodini amen ando greh hem ando meribe. Sar ov čerdža odova? Savi korist isimen odoljestar?

9. Sar valjandža te ovel platimo o savršeno dživdipe?

⁹ Nijekh amendar niked našti te platini pe dživdipa, te šaj te ovelmen savršeno dživdipe kova o Adam našaldža. Sose našti? Sose sare amen hijam nesavršena (Psalam 49:7, 8). Te šaj te ovelmen savršeno dživdipe valjandža te merel jekh savršeno manuš. Adžahar bi oljeso džvdipe ovela isto sar o dživdipe kova hine našaldo (1. Timotejese 2:6). Odova dživdipe valjandža te vredini isto kobor o dživdipe kova o Adam našaldža.

10. So čerdža o Jehova te šaj te ovelmen dživdipe?

¹⁰ So čerdža o Jehova te šaj te ovelmen dživdipe? O Jehova bičhaldža pe najmanglje čhave ki Phuv. Odolje čhave, e Isuse, o Jehova čerdža angljeder o sa (1. Jovaneso 4:9, 10). O Isus hine spremno te ačhavi pe Dade hem po than ko nebo (Filipskonendže 2:7). O Jehova bičhaldža e Isuse kotar nebo ki Phuv te ovel bijando sar savršeno manuš bizo greh (Luka 1:35).

11. Sar šaj jekh manuš te del po dživdipe sa e manušendže?

¹¹ Ked o prvo manuš, o Adam, na šuja e Devlje, ov našaldža o savršeno dživdipe kova sa o manuša valjandže  te oveljen. Da lji šaj disavo aver manuš te cidel o meribe kotar sa e Adamese čhave? Po (Čitinen Rimskonendže 5:19). O Isus kova niked na grešija dija po savršeno dživdipe amendže (1. Korintskonendže 15:45). Oljeso savršeno dživdipe šaj te cidel o meribe kotar sa e Adamese čhave (1. Korintskonendže 15:21, 22).

12. Sose o Isus valjandža te nakhel sa odola muke?

¹² I Biblija mothovi so o Isus hinelje bare muke angljeder te merel. Ov hine šibimo, kovimo ko stubo hem hinelje bare dukha dži mulo (Jovan 19:1, 16-18, 30). Sose o Isus valjandža te nakhel sa odola muke? O Beng vačerdža so nijekh manuš našti te ačhol verno e Devljese ked ka ovelje but pharipa. O Isus mothodža so o savršeno manuš šaj te ačhol verno e Devljese, čak ked isilje najbare muke. O Jehova hine but ponosno upro Isus (Godžalje lafija 27:11). Moljinatu dikh o 15. dodatko.

13. So hine čerdo te šaj te ovelmen dživdipe?

¹³ So hine čerdo te šaj te ovelmen dživdipe? Ko 33. berš ki amari era ko 14. nisan, premalo jevrejsko kalendari, o Jehova muklja e Isusese dušmanjen te mudarenlje (Jevrejendže 10:10). Trin dive palo odova, o Jehova irija e Isuse ko dživdipe, na sar manuš nego sar duhovno osoba. Ama, o Isus niked na našaldža po pravo te živini sar savršeno manuš ki Phuv. Palo odova, ked o Isus irijape ko po Dad ko nebo ov dija odova poklo pravo e Devljese, te šaj o Devel odoljeja te činel sa e Adamese čhaven (Jevrejendže 9:24). O Jehova ljelja odova pravo hem odoljese amen šaj te ova oslobodime ando greh hem ando meribe (Čitinen Rimskonendže 3:23, 24).

14, 15. So valjani te čera te šaj te oven oprostime amare grehija?

¹⁴ Amen već akana isimen berečetija kotar najbaro poklon so dijamen o Devel. Ka dikha save berečetija isimen akana hem save ka ovelmen ko vakti so avela.

¹⁵ Amare grehija tane oprostime. But puča tano pharo te čera okova soj tano šukar. Amen grešina hem dijekh puti vačera hem čera diso so nane šukar (Koloskonendže 1:13, 14). Sar šaj te ovel amendže oprostimo? Amendže valjani te ovel but pharo sebepi so čerdžam diso lošno hem valjani ponizno te moljina e Jehova te oprostini amendže. Palo odova, šaj te ova sigurna so amare grehija tane oprostime (1. Jovaneso 1:8, 9).

16. So valjani te čera te šaj te ovelmen šukar savest?

¹⁶ Amen šaj te ovelmen šukar savest. Ked amari savest vačeri amendže so čerdžam diso lošno, tegani osetinamen so hijam kriva hem so na hijam nisose. Ama, ma de tut. Ako viljestar moljina e Jehova te oprostini amendže, šaj te ova sigurna so ov ka šunel amen hem ka oprostini amendže (Jevrejendže 9:13, 14). O Jehova mangela te vačera oljese sa amare problemija hem sa amare mane (Jevrejendže 4:14-16). Ked čera odova amen šaj te ova ko rahati e Devljeja.

17. Save berečetija šaj te ovelmen sebepi so o Isus mulo amendže?

¹⁷ Amen isimen nada so ka živina večno. Ko Rimskonendže 6:23 pisini: „Sose i plata ando greh tani o meribe, a e Devljeso daro tano o večno dživdipe prekalo Hrist Isus amaro Gospodari“. Odoljese so o Isus mulo amendže, amen šaj te živina večno hem te ovelmen savršeno sastipe (Pučaribe 21:3, 4). So valjani te čera te šaj te ovelmen odola berečetija?

18. Sar džana so o Jehova mangela amen?

¹⁸ Razmislin ando odova kobor tano pherdo to vilo ked džiko delatu jekh but šužo poklon. Odova so o Isus dija po dživdipe tano najbaro poklon kotar sa avera. Amen valjani te ova viljestar zahvalna e Jehovase ko odova poklon. Ko Jovan 3:16 pisini: „Odoljese so o Devel odoborkha manglja o sveto, ov dija pe jedinobijande Čhave“. Čače, o Jehova manglja amen odobor but so dija pe manglje čhave e Isuse amendže. O Isus hine spremno te merel amendže hem odoljeja mothodža so mangela amen (Jovan 15:13). Odova so o Jehova hem o Isus čerdže mothovi so čače mangena amen (Galatskonendže 2:20).

19, 20. (a) Sar šaj te ove e Jehovaso amal? (b) Sar šaj te mothove so hijan zahvalno so o Isus dija po dživdipe?

¹⁹ Akana ked sikljiljan ando Jehovaso baro mangipe, sar šaj te ove oljeso amal? Nane kolaj te mange džikas kas na pendžareja. Ko Jovan 17:3 pisini so amen šaj šukar te pendžara e Jehova. Ked čereja odova, toklo mangipe premalo oljeste ka ovel sa pobaro, ka čere odova so ov mangela hem ka ove oljeso amal. Odoljese hem ponodri pendžar e Jehova adžahar so ka sikljove andi Biblija (1. Jovaneso 5:3).

²⁰ Mothov so hijan zahvalno so o Isus dija po dživdipe. Ki Biblija pisini: „Ko verujini ko Čhavo, isilje večno dživdipe“ (Jovan 3:36). So značini te verujina ko Isus? Odova značini so valjani te čera odova so o Isus sikadža amen (Jovan 13:15). Amen našti samo te phena so verujina ko Isus. Te šaj te mothova so hijam zahvalna so ov dija po dživdipe, valjani te čera upri amari vera. Ko Jakoveso 2:26 pisini: „I vera bizo te mothovipe ko delija tani mulji“.

21, 22. (a) Sose valjani te ava ko Dive ked setinamen ko Isuseso meribe kova ičeripe svako berš? (b) Sostar ka vačeripe ko šovto hem ko eftato šero ki akija knjiga?

 ²¹ Aven ko Dive ked setinamen ko Isuseso meribe. Jekh rat angljeder te merel, o Isus pheja so valjani te setinamen ko dive ked mulo. Amen odova čera svako berš hem odoljese vičinipe o Dive ked setinamen ko Isuseso meribe (1. Korintskonendže 11:20; Matej 26:26-28). O Isus mangela te setinamen ko odova so ov dija poklo savršeno dživdipe amendže. Ov vačerdža: „Čeren akava te setinen tumen koro mande“ (Čitinen Luka 22:19). Ked aveja ko Dive ked setinamen ko Isuseso meribe, odoljeja mothoveja so setinejatu ko odova so ov dija po dživdipe hem so o Jehova hem o Isus isiljen baro mangipe premalo amende. Moljinatu dikh o 16. dodatko.

²² Odova so o Isus dija poklo dživdipe tano najbaro poklon so šaj džiko te ovelje (2. Korintskonendže 9:14, 15). Kotar odova but šužo poklon čak o milionja manuša kola mulje ka oveljen berečetija. Ko šovto hem ko eftato šero ki akija knjiga ka dikha sar šaj te ovel odova.