Si de mai de desh borsh kai si amen le vurdona. Kakala vurdona dikhenpe pe sa e lumia, kana thas iek vurdon le manush dikhen ai zhanen kon sam. Ai na numa ke si shukar, vi vushoro le te ningeras len. Sar phendias e Asenata, iek phei anda e Polonia: “Le vurdona shukar le ai si defial vushoro te ningeras len kai trobusa te zhas!”.

 Pushliam tu kai iek data sar lasharen le vurdona?

 Ando 2001, le Phral kai Ningeren amen dikhle mishto te thon prame neve te predikilpe ande Francia, iek anda godola sas le vurdona. Zumade but vurdona te ninkeren le publikasionuria, numa o kher Betel alosardias iek, ai le phral ningerde len but borsh.

 So kerde le phral ande Francia ashilo defial mishto. Pala godia ando 2011 le Phral kai Ningeren amen dikhle mishto te thon vurdona ai skafidia te predikilpe ando Nueva York (Estados Unidos). Le Phral kai den but anda pengi vriama te ningeren le viesti dine po gor ke le vurdona sas len but prame lashe. Iek ejemplo si ke shai ningerenas les pe suako rig. Numa vi dine po gor ke sas uni prame kai trobunas te lasharen. Iek ejemplo si, ke le pervo vurdona sas kashtune, ai pala godo nas vushoro te anklen opre ai te fulen le skeri lentsa. Pala godo lasharde le vurdona te aven mai vushoro ai te aven mai zurale kana si barval. Vi kerde rhotsi mai bare te avel mai vushoro te ningeren len ai te na pharhadion. Vi thode vareso te mai thon publikasionuria.

 Sa so kerdilo anklisto mishto. Pala godia ando 2012 le Phral kai Ningeren amen dikhle mishto te thonpe vurdona te ninkeren le publikasionuria pe sa e lumia. Dikhliaspe mishto te delpe duma iekhe manushesa te lasharel but vurdona te aven zurale ai vushoro te ningerenpe.

 So nakhle le borsh dikhliaspe mishto te lasharen uni prame andal vurdona. Iek ejemplo si, ke katar o 2015 thodine vareso te arakhen le publikasionuria katar o brishind. Iek phei kai beshel ando Georgia kai bushelpe Dina, dikhlias mishto sa kacha buki, voi phenel: “Le publikasionuria kai si andel vurdona arakhade le katar o brishind”. Ando 2017, astarde te thonpe andel vurdona patretsi kai astardion korkorho ande uni shiba. Iek phral anda e Polonia, kai bushelpe Tomasz, phenel: “Te parhuvas le patretsi kai sas astarde pel vurdona sas amenge pharo. Numa akana kai si amen le patretsi kai astardion korkorho si amenge mai vushoro!”. Ando 2019, parhude uni prame andel vurdona te aven mai zurale ai te na pharhadion fugo.

 Iek manush kai si les iek rig kai lasharen sa le vurdona del te lashavon ai polme tradenpe pe sa e lumia. Agies, numa te kerdiol suako vurdon mol 43 dolaria. Zhi agies tradepe mai de 420.000 vurdona kal riga kai chidas amen pe sa e lumia, ai pokindiam mai de 16 millonuria dolaria ande kakala vurdona.

 Te arakhas le love kai savorhe das kinenpe but vurdona, ai vi shai kinenpe uni prame andal vurdona kana parhadiol vareso ai gadia chi trobus te kinas iek nevo.

 Le phral drago lenge te predikin kana ningeren le vurdona. Iek phei kai bushelpe Martina, katar e Ghana, phenel: “Kana predikis, amen trobus te pashuvas kal manush. Numa so plachal man katar le vurdona si ke le manush pashon amende. Sa godola kai nakhen ai dikhen den po gor ke das duma pa o Del”.

 Ande aver them anda o África iek mursh pashilo ka iek vurdon ai ningerdias peske publikasionuria ande peski shib. Nakhlo iek kurko, amboldias ai phendias le phralenge: “Gata chitosardem sa le publikasionuria, so mothon si iek bari prama, si te zhau ka murho foro te chiton len murhi familia”. E familia katar kako mursh beshelas 500 kilometria kotsar. Nakhlo dui shon ai o mursh amboldias pale ka o vurdon ai phendias: “Ande murho foro gata chitosarde sa le publikasionuria, ai plachaias len but so phenenas, kamen te kerdion marturia le Jehovaske. Numa pushenpe uni prame. Von zhanen ke trobun te boldion ai trobun te thonpe ando pai numa kotse kai beshas nai chi iek reko. Trobun te aven zhi katse te boldion?”. Le phral azhutisarde les te del duma iekhe phralesa kai del duma ande leski shib. De atunchara, le dui denpe duma.

 Ke shukar si, te dikhas ke le vurdona azhutin te ningerenpe le lashe viesti pe sa e lumia (Mate 24:14). Sa kakala vurdona shai kerdion pala sa le love kai tumen den anda sa e lumia. But anda lende denpe ando donate.ps8318.com, nais tumenge pala sa so den ilesa!